ސްކޫލްތަކަށް ދަރިވަރުން ވެއްދުމާއި އެއް ސްކޫލުން އަނެއް ސްކޫލަށް ކުދިން ބަދަލުކުމުގެ އުސޫލަށް ގިނަ އިޞްލާހުތަކެއް ހިއުމަން ރައިޓްސް ކޮމިޝަން އޮފް ދަ މޮލްޑިވްސް (އެޗްއާރުސީއެމް)އިން ހުށަހަޅައިފިއެވެ. އެއުސޫލަށް އެޗްއާރުސީއެމް އިން ވަނީ 7 އިޞްލާހެއް ހުށަހަޅާފައެވެ.
އެޗްއާރުސީއެމްއިން ހުށަހެޅި އިސްލާހުތަކުގެ ތެރޭގައި ސްކޫލަށް ނުދާ އަދި ނުފޮނުވާ ކުދިން ދެނެގަނެ، ސްކޫލަށް ފޮނުވުމަށް އިހުމާލުވާ ބެލެނެވެރިން ފާހަގަކޮށް ފިޔަވަޅު އެޅޭނެ ނިޒާމެއް އެކުލަވާލުން ހިމެނެއެވެ. އަދި ސިއްޙީ ހާލަތެއް ނުވަތަ އެނޫންވެސް ހާލަތަކާގުޅިގެން ސްކޫލަށް ހާޒިރުނުވެވޭ ކުދިންނަށް ތަޢުލީމު ފޯރުކޮށްދެވޭނެ އިންތިޒާމްތައް ހަމަޖެއްސުމަށްވެސް އިޞްލާޙުގައި ވަނީ ހިމަނާފައެވެ.
މީގެ އިތުރުން ގްރޭޑް 1އަށް ވައްދާ ކުދިންގެ ތެރެއިން ފައުންޑޭޝަން ސްޓޭޖް ފުރިހަމަ ކޮށްފައިނުވާ ކުދިން ފާހަގަކޮށް އެކުދިންގެ ފެންވަރު ބެލުމަށްފަހު އިންޑިވިޖުއަލް އެޑިއުކޭޝަން ޕްލޭނެއް ތައްޔާރުކޮށް އެޕްލޭންގެ ދަށުން އުނގެނުމުގެ ހައްޤު ކަށަވަރުކޮށްދިނުމަށް ބޭނުންވާ އިންތިޒާމް ހަމަޖެއްސުމުގެ އިތުރުން ތަފާތު ކުރުމެއްނެތި ފުރުސަތު ދިނުމަށްވެސް ވަނީ ހުށަހަޅާފައެވެ.
އެގޮތުން ރާއްޖޭގައި ދިރިއުޅޭ ބިދޭސީ ކުދިންނަށް އެއްވެސް ތަފާތުކުރުމެއް ނެތި ސަރުކާރު ސްކޫލުތަކުގައި ތަޢުލީމު އުނގެނެވޭނެ ހަމަހަމަ ފުރުސަތު ހަމަޖެއްސުމާއި، މި އުސޫލުގެ ދަށުން ޝަކުވާ ހުށަހެޅޭނެ އަދި ޝަކުވާ ބެލޭނެ ނިޒާމާގުޅޭ މާއްދާއެއް އުސޫލުގައި ހިމެނުމަށްވެސް ވަނީ ހުށަހަޅާފައެވެ.
ސްކޫލްތަކަށް ދަރިވަރުން ވެއްދުމާއި، އެއް ސްކޫލުން އަނެއް ސްކޫލަށް ކުދިން ބަދަލުކުމުގެ އުސޫލަކީ، ޅަފަތުގެ ތަޢުލީމާއި ތަރުބިއްޔަތާއި ފަށާ ތަޢުލީމާއި ދަށު ޘާނަވީ އަދި މަތީ ޘާނަވީ މަރުޙަލާތަކުގައި ކިޔަވައިދޭ ސްކޫލްތަކަށް ކުދިން ވެއްދުމާއި، އެއް ސްކޫލުން އަނެއް ސްކޫލަށް ދަރިވަރުން ބަދަލުކުރުމުގައި މި އަހަރަށް އަހަރަށް ޢަމަލުކުރާނެގޮތުގެ އުޞޫލެވެ.