މާލެ އޮތް ޙާލަތަށް ބޮޑެތި ބަދަލުތަކެއް އައިސްފައިވާކަމަށާއި، ދަފްތަރާ ގުޅޭ ޒަމާނީ ޤާނޫނީ އޮނިގަނޑެއް ތައްޔާރުކުރަން ޖެހޭކަމަށް ފެންނަކަމަށް ރައްޔިތުންގެ މަޖިލީހުގެ ޤައުމީ ތަރައްޤީއާއި ތަރިކައިގެ ކޮމިޓީން ވިދާޅުވެއްޖެއެވެ. ކޮމިޓީން މިހެން ވިދާޅުވީ ސަރުކާރުގެ ބޯހިޔާވަހިކަމުގެ ސިޔާސަތާ، ހިޔާ މަޝްރޫޢުގެ ފްލެޓްތައް ދިނުމާ ގުޅޭގޮތުން ޤައުމީ ތަރައްޤީއާއި ތަރިކައިގެ ކޮމިޓީން ނެރެފައިވާ ދިރާސާ ރިޕޯޓްގައެވެ.
ދަފްތަރު ތަޢާރަފްކޮށްފައިވަނީ 1960ގައެވެ. މިހާރުވެސް ދަފްތަރުގައި މީހުން ރަޖިސްޓްރީ ކުރަމުންދަނީ މީގެ އެތައް އަހަރެއްކުރިން 1979ގައި ފާސްކޮށްފައިވާ ޤާނޫނެންގެދަށުންނެވެ. އަދި އޭގެފަހުން މިކަމާ ގުޅޭ ޤަވާއިދެއްވަނީ ހަދާފައެވެ.
ރަށްރަށުން މާލެ ބަދަލުވެ މާލޭގެ ދަފްތަރުގައި މީހުން ޖައްސަން ފަށާފައިވަނީ 1994ވަނަ އަހަރުން ފެށިގެންނެވެ. އެއަހަރުން ފެށިގެން 2021ވަނަ އަހަރުގެ މިހާތަނަށް މާލޭ ދަފްތަރުގައި ޖެހިފައިވާ މީހުންގެ އަދަދު 7736އަށް އަރައެވެ.
ތަފާސް ހިސާބުތަކަށް ބަލާއިރު އެންމެ ގިނަ ބަޔަކު ދަފްތަރުގައި ޖެހިފައިވަނީ 2018ވަނަ އަހަރުއެވެ. އެ އަހަރު 1972މީހުން ދަފްތަރުގައި ޖެހިފައިވެއެވެ. އެއީ މީގެ ކުރިން އެންމެ ގިނަ އަދަދަކަށް މީހުން ދަފްތަރުގައި ޖެހުނު 2008ވަނަ އަހަރަށްވުރެ ތިން ގުނަ އިތުރު އަދަދެކެވެ.
މަޖިލީހުގެ ރިޕޯޓުގައި ބުނެފައިވަނީ 2018ވަނަ އަހަރުގެ ހިޔާ މަޝްރޫޢާއި ގުޅިގެން ގިނަ އަދަދެއްގެ ބަޔަކު ދަފްތަރުގައި ޖެހިފައިވާކަމަށެވެ. މީގެތެރެއިން ބައެއް މީހުން މާލެ ދަފްތަރުގައި ޖައްސާފައިވަނީ ރަށްރަށުގެ ރަޖިސްޓްރީން ނުކެނޑިކަމަށް ރިޕޯޓްގައިވެއެވެ. އެއްފަހަރާ ގިނަ އަދަދެއްގެ ބަޔަކު ދަފްތަރުގައި ޖެހިފައިވާ އުސޫލު ސާފުނުވާތީ، މާލެ ސިޓީ ކައުންސިލުން އެކަން ރަނގަޅަށް ދިރާސާކުރުމަށް ވަނީ އަންގާފައެވެ.
2018ވަނަ އަހަރު ދަފްތަރުގައި ގިނަ ބަޔަކު އެއްފަރާ ޖެހުން ގުޅޭނީ ބޯހިޔާވަހިކަމުގެ މަޝްރޫއުތަކާއެވެ. މާލޭގައި ބޯހިޔާވަހިކަން ނެތް ގިނަ އާއިލާތައް ތިބިއިރު، ދަފްތަރުގައި ޖެހިފައިވާ ފަރާތްތަކަށް ބޯހިޔާވަހިކަން ފޯރުކޮށްދެވޭނެ ގޮތާމެދު މާލެ ސިޓީ ކައުންސިލާއި ޕްލޭނިންގ މިނިސްޓްރީން ކަންބޮޑުވުން ފާޅުކޮށްފައިވާތީ އެކަމަށް ޙައްލެއް ހޯދަން ޖެހިފައިވާކަމަށްވެސް ރިޕޯޓްގައިވެއެވެ. އަދި ދަފްތަރުގައި މިހާތަނަށް ޖެހި ބޯހިޔާވަހިކަން ހަމަޖެހިފައި ނުވާ މީހުންނާއި، މާލޭގެ ރައްޔިތުންގެ ތެރެއިން ބޯހިޔާވަހިކަން ހަމަޖެހިފައި ނުވާ ފަރާތްތަކަށް ސަރުކާރުން އަވަސް ޙައްލެއް ހޯދައިދިނުމަށްވެސްވަނީ އެދިފައެވެ.
އެންމެ މުހިންމު ކަމެއްގެ ގޮތުން ހުށައަޅާފައިވަނީ މި މަސައްލައަށް އަވަސް ޙައްލެއް ހޯދާ ދަފްތަރާ ގުޅޭގޮތުން ހަރުދަނާ ސިޔާސަތުތަކެއް އެކުލަވާލުމަށެވެ. ކޮމިޓީގެ ރިޕޯޓުގައި ބުނެފައިވަނީ ދަފްތަރު ތަޢާރަފުކުރިއިރު ދިވެހިރާއްޖެ އަދި ޚާއްސަކޮށް މާލޭގެ ޙާލަތުއޮތްގޮތަށް މިހާރު ބޮޑެތިި ބަދަލުތަކެއް އައިސްފައިވާތީ، ދަފްތަރާ ގުޅޭ ހަރުދަނާ ޤާނޫނީ އޮނިގަނޑެއް ބޭނުންވެފައިވާކަމަށެވެ. އެގޮތުން ޒަމާނާ އެއްގޮތަށް އާ ޤާނޫނީ އޮނިގަނޑެއް ތައްޔާރުކުރަށް ފެންނަކަމަށާ، އެފަދަ ނިޒާމެއް ޤާއިމުކުރުމުގެ މަސައްކަތް ސިޓީ ކައުންސިލުން ކުރިއަށްގެންދިއުމަށް ކޮމިޓީގެ ހުށައެޅުމުގައިވެއެވެ.