2022 ވަނަ އަހަރު ޤަތަރުގައި ބޭއްވުމަށް ހަމަޖެހިފައިވާ ފީފާ ވާރލްޑް ކަޕަށް ކޮލިފައިވުމަށް ޔޫރަޕް ސަރަހައްދުގެ ކޮލިފައިންގ ގްރޫޕް ޖީގައި ނެދަލަންޑްސް އާއި ލެޓްވިއާ ބައްދަލުކުރިމެޗް ނެދަލަންޑްސް ކާމިޔާބުކޮށްފިއެވެ. ނެދަލަންޑްސްގެ އެމްސްޓަޑަމްގައި ކުޅުނު މިމެޗް އެޓީމް ކާމިޔާބުކުރީ ދެލަނޑު ސުންލަނޑުންނެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ނެދަލަންޑްސްއިންނެވެ. މިމެޗްގައި ނެދަލަންޑްސްއިންވަނީ ތުރުކީވިލާތާއި ދެކޮޅަށް ކުޅުނު މެޗްގައި ދެއްކި ކުޅުމާއި ހިލާފަށް މޮޅު ކުޅުމެއް ދައްކާފައެވެ. މިމެޗް ބެލުމުގެ ފުރުސަތު ވަނީ ފަސް ހާސް ކުޅިބެލުންތެރިންނަށް ދީފައެވެ. މިމެޗްގައި ނެދަލަންޑްސްގެ ފުރަތަމަ ލަނޑު މެޗްގެ 32 ވަނަ މިނެޓްގައި ޖަހައިދިނީ ސްޓީވަން ބަރގުއިސްއެވެ. އަދި ދެވަނަ ލަނޑު މެޗްގެ 69 ވަނަ މިނެޓްގައި ޖަހައިދިނީ ލޫކް ޑި ޖޮންގއެވެ. މިމެޗްގައި މީގެއިތުރުންވެސް ލަނޑު ޖަހާނެ ގިނަ ފުރުސަތު ނެދަލަންޑްސްއަށް ލިބި ބޭކާރުވިކަން ފާހަގަ ކޮށްލެވެއެވެ.
މީގެއިތުރުން މިމެޗްގައި ރެފްރީކަން ކުރި ސްޓެފަނީ ފްރެޕަރޓް ވެގެން ގޮސްފައިވަނީ ވާރލްޑް ކަޕް ކޮލިފައިންގ މެޗެއްގައި ރެފްރީކަން ކުރި ފުރަތަމަ އަންހެން ރެފްރީއަށެވެ. ފަރަންސޭސިވިލާތުގެ ސްޓެފަނީ ވަނީ މީގެކުރިން ޔޫރަޕިއަން ކްލަބް މެޗްތަކުގައި ރެފްރީކަން ކޮށްފައެވެ.
މިމެޗް ކާމިޔާބު ކުރުމާއެކު ނެދަލަންޑްސް މިހާރު އުޅެނީ ކުޅުނު ދެމެޗުން ލިބިފައިވާ ތިން ޕޮއިންޓާއެކު ގްރޫޕް ޖީގެ ތިންވަނައިގައެވެ. މި ގްރޫޕްގައި ރޭ ތުރުކީވިލާތާއި ނޯވޭ ބައްދަލުކުރިމެޗް ތިންލަނޑު ސުންލަނޑުން ތުރުކީވިލާތް ކާމިޔާބުކުރިއިރު މޮންޓެނެޓްރޯ އާއި ޖިބްރޯލްޓަރ ބައްދަލުކުރިމެޗް 4 ލަނޑު އެއްލަނޑުން ކާމިޔާބުކުރީ މޮންޓެނެގްރޯއެވެ. ގްރޫޕް ޖީގެ އެއްވަނައިގާ އުޅެނީ ހަ ޕޮއިންޓާއި ފައިދާ ފަސް ގޯލާއެކު ތުރުކީވިލާތެވެ. އަދި ދެވަނައިގާ މޮންޓެނެގްރޯ އުޅެނީ ހަ ޕޮއިންޓާއި ފައިދާ ހަތަރު ގޯލާއެކު ދެވަނައިގައެވެ.