އެންބީއޭ ބާސްކެޓްބޯޅަ މުބާރާތުގައި ފިލަޑެލްފިއާ ސެވަންޓީ ސިކްސަރސް އާއި ލޮސް އެންޖަލިސް ލޭކަރސް ބައްދަލުކުރިމެޗް ސިކްސަރސް ކާމިޔާބުކޮށްފިއެވެ. މިމެޗް ސިކްސަރސް ކާމިޔާބުކުރީ 109 ޕޮއިންޓް 101 ޕޮއިންޓުންނެވެ.
ފޯރިގަދަ ކުޅުމެއް ފެނިގެންދިޔަ މިމެޗްގައި ސިކްސަރސްއަށް އެންމެ ރަނގަޅު ކުޅުމެއް ދެއްކީ އެޓީމަށް 28 ޕޮއިންޓް ހޯދައިދިން ޑެނީ ގްރީންއެވެ. އަދި ލޭކަރސްއަށް އެންމެ ރަނގަޅު ކުޅުމެއް ދެއްކީ އެޓީމަށް 20 ޕޮއިންޓް ހޯދައިދީ 11 އެސިސްޓް ދިން ޑެނިސް ޝްރޮޑަރއެވެ.
މިމުބާރާތުގައި ލޮސްއެންޖަލިސްއަށް ނިސްބަތްވާ ދެވަނަ ޓީމް ކަމަށްވާ ކްލިޕަރސްއާއި ސެން އެންޓޯނިއޯ ސްޕަރސް ބައްދަލުކުރިމެޗް 98 ޕޮއިންޓް 85 ޕޮއިންޓުން ކާމިޔާބުކުރީ ކްލިޕަރސްއެވެ. މިމެޗްގައި ކްލިޕަރސްގެ ޕޯލް ޖޯޖްވަނީ އެޓީމަށް 24 ޕޮއިންޓް ހޯދައިދީ 13 ރީބައުންޑް ނަގައިދީފައެވެ. އަދި ސްޕަރސްއަށް އެންމެ ރަނގަޅު ކުޅުމެއް ދެއްކީ 18 ޕޮއިންޓް ހޯދައިދިން ޑިޖޫންޓޭ މަރީއެވެ. މީގެއިތުރުން ޕޯޓްލަންޑް ޓްރެއިލް ބްލޭޒަރސް އާއި މައޭމީ ހީޓް ބައްދަލުކުރިމެޗް 125 ޕޮއިންޓް 122 ޕޮއިންޓުން ކާމިޔާބުކުރީ ޓްރެއިލް ބްލޭޒަރސްއެވެ. މިމެޗްގައި ބްލޭޒަރސްއަށް އެންމެ ރަނގަޅަށް ކުޅުނީ 35 ޕޮއިންޓް ހޯދައިދީ 8 އެސިސްޓް ދިން ސީޖޭ މެކްކޮލަމްއެވެ. އަދި ހީޓްއަށް އެންމެ ރަނގަޅަށް ކުޅުނީ 29 ޕޮއިންޓް ހޯދައިދީ 9 ރީބައުންޑް ނަގާ 7 އެސިސްޓް ދިން އާރްޖޭ ބެރެޓްއެވެ.
މިމުބާރާތުަގައި ކުޅުނު އެހެން މެޗްތަކަށް ބަލާލާއިރު ނިއުޔޯކް ނިކްސް އާއި ވޮޝިންގޓަން ވިޒަޑްސް ބައްދަލުކުރިމެޗް 106 ޕޮއިންޓް 102 ޕޮއިންޓުން ނިކްސް ކާމިޔާބުކުރިއިރު ސެކްރެމެންޓޯ ކިންގްސް އާއި ގޯލްޑަން ސްޓޭޓް ވޮރިއަރސް ބައްދަލުކުރިމެޗް 141 ޕޮއިންޓް 119 ޕޮއިންޓުގެ ތަފާތު ބޮޑު ނަތީޖާއަކުން ކާމިޔާބުކުރީ ކިންގްސްއެވެ.