ޖިންސީ ގޯނާގެ މައްސަލައަކާއި ގުޅިގެން ރ.މަޑުއްވަރީގައި ބަޔަކު ކުރިއަށްގެންދިޔަ އިޙުތިޖާޖުން 10 މީހަކު ހައްޔަރުކޮށްފިއެވެ.
ފުލުހުން ވިދާޅުވީ ހައްޔަރުކޮށްފައިވަނީ މުޅިންވެސް ދިވެހި ފިރިހެނުންކަމަށާއި މި އެންމެންވެސް ހައްޔަރުކޮށްފައި ވަނީ ކޯޓު އަމުރެއްގެ ދަށުންކަމަށެވެ. އަދި އެމީހުން ހައްޔަރުކުރީ ހަމަނުޖެހުން ހިންގާ، ދަޢުލަތުގެ މުދަލަށް ގެއްލުންދީފައިވާތީކަމަށެވެ މީގެއިތުރުން ފުލުހުންނަށް ހަމަލާދިން މައްސަލައެއްވެސް ތަޙުޤީގުކުރަމުންދާކަމަށް ފުލުހުން ވިދާޅުވެއެވެ.
މަޑުއްވަރީގައި ބަޔަކު އިހުތިޖާޖުކޮށްފައިވަނީ މި މަހުގެ 3 ވަނަ ދުވަހު އެރަށުގައި ހިނގި ޖިންސީ ގޯނާގެ މައްސަލައެއް ފެންމަތިވެ، އެމައްސަލައިގައި މިހާތަނަށް މީހަކު ހައްޔަރުކޮށްފައި ނުވާތީއެވެ.
ފުލުުހުން ވިދާޅުވީ މިމަހުގެ 3 ވަނަ ދުވަހު އުތުރުގެ ރަށެއްގައި 18 އަހަރު ނުފުރޭ އަންހެން ކުއްޖަކަށް ޖިންސީ ގޯނާކުރުމުގެ ޢަމަލެއް ހިންގާފައިވާކަމަށް ބުނާ މައްސަލައެއް މިމަހުގެ 11 ވަނަ ދުވަހު ހުށަހަޅާފައިވާކަމަށެވެ. ފުލުހުން ވިދާޅުވީ މި މައްސަލައިގައި ވަކި މީހެއްގެ މައްޗަށް ތުޙުމަތުކުރެވޭ ހެކި މިހާތަނަށް ތަޙުޤީގަށް ލިބިފައިނުވާކަމަށެވެ. ނަމަވެސް އަދިވެސް އިތުރަށް މިމައްސަލަ ތަޙުޤީގުކުރަމުންދާކަމަށް ފުލުހުން ވިދާޅުވެއެވެ.
ފުލުހުން ވިދާޅުވީ މިފަދަ މައްސަލަތަކަކީ ނާޒުކު މައްސަލަތަކަކަށްވާތީ، ހެކި ހޯދުމަށް ކުރާ މަސައްކަތްތަކުގެ ތަފްސީލަކީ ޙާމަކުރެވޭނެ މަޢުލޫމާތެއް ނޫންކަމަށެވެ.