އެސްޓްރަޒެނެކާގެ ޚާއްޞަ ޙުއްދައެއްގެ ދަށުން އިންޑިޔާގެ ސީރަމް އިންސްޓިޓިއުޓުގައި ތައްޔާރުކުރާ ކޯވިޑް-19ގެ ވެކްސިންކަމަށްވާ ކޮވިޝިލްޑު ބޭރު ޤައުމުތަކަށް ފޯރުކޮށްދިނުން އެ ޤައުމުން މެދުކަނޑާލައިފިއެވެ. އިންޑިޔާއިން ކޮވިޝިލްޑު ވެކްސިން ބޭރުކުރުން މެދުކަނޑާލައިފައިވަނީ އެ ޤައުމުގައި ކޯވިޑް-19 ފެތުރޭ މިންވަރު އަނެއްކާވެސް އިތުރުވެފައިވާ ދަނޑިވަޅެއްގައެވެ.
އިންޑިޔާގެ ޚާރިޖީ ވުޒާރާގެ ވެބްސައިޓުގައި ޙިއްޞާކޮށްފައިވާ މަޢުލޫމާތު ދައްކާގޮތުގައި މާރިޗު މަހުގެ 18ވަނަ ދުވަހުން ފެށިގެން އިންޑީޔާއިން ވެކްސިން ބޭރުކުރުންވަނީ މެދުކަނޑާލައިފައެވެ. ބެލެވޭ ގޮތުގައި ދުނިޔޭގެ ދެވަނައަށް އެންމެ ބޮޑު އާބާދީއެއް އޮންނަ އިންޑިޔާއިން އެގޮތަށް ނިންމާފައިވަނީ އެ ޤައުމުގެ ބޭނުމަށް ފުދޭ މިންވަރަށް ވެކްސިން ކަށަވަރު ކުރުމަށެވެ. އިންޑިޔާގެ ޙާލަތު ރަނގަޅު ވަންދެން ބޭރު ޤައުމުތަކަށް ވެކްސިން ނުފޮނުވާނެކަމަށް ބައެއް މަސްދަރުތަކުން ބުނެއެވެ.
އިންޑިޔާގެ ނިންމުމުގެ ސަބަބުން ޤައުމުތަކަށް ހަމަހަމަކަމާއެކު ވެކްސިން ފޯރުކޮށްދިނުމަށް ދުނިޔޭގެ ޞިއްޙަތު ޖަމުޢިއްޔާ ޑަބްލިޔުއެޗުއޯއިން އިސްވެ ޤާއިމުކޮށްފައިވާ ކޮވެކްސް މަޝްރޫޢުއަށް އަސަރުކުރާނެއެވެ. އެ މަޝްރޫޢުގެ ދަށުން ފަޤީރު 64 ޤައުމަކަށް ހެޔޮ އަގުގައި ކޮވިޝިލްޑް ވެކްސިން ފޯރުކޮށްދިނުމަށްވަނީ ހަމަޖެހިފައެވެ. ޔުނިސެފުން ބުނީ އިންޑިޔާގެ ނިންމުމުގެ ސަބަބުން ކުރިން ރާވާފައިވާ ގޮތަށް މާރިޗު މަހާއި އެޕްރިލް މަހުގެ ތެރޭގައި އެ ޤައުމުތަކަށް ވެކްސިން ފޯރުކޮށްދިނުމުގައި ދަތިތަކަކާ ކުރިމަތިލާން ޖެހޭނެކަމަށެވެ. އެކަމަށް ޙައްލެއް ހޯދުމަށް އިންޑިޔާގެ ސަރުކާރާ މަޝްވަރާ ކުރަމުންދާކަމަށް ޔުނިސެފުން ބުންޏެވެ.