މިސީޒަން ނިމުމުން އަނެއްކާވެސް ރެއާލް މެޑްރިޑަށް އެނބުރި ދާން ބޭނުންވާކަމަށް ޓޮޓްނަމް ހޮޓްސްޕަރއަށް ލޯން އެއްބަސްވުމެއްގެ ދަށުން މިސީޒަންގައި ކުޅެމުންދާ ގެރެތު ބޭލް ހާމަކޮށްފިއެވެ. ރެއާލް އާއި އެކު ބޭލް ހަދާފައިވާ އެއްބަސްވުން ނިމުމަކަށް އަންނާނީ މިއަންނަ އަހަރުއެވެ.
ރެއާލްގައި ކުޅުމުގެ ފުރުސަތު ނުލިބި ގިނައިން ބެންޗުގައި އިންނަން ޖެހުމުގެ ސަބަބުން މިސީޒަންގައި ސްޕަރސްއަށް ބަދަލުވި ބޭލް އެނބުރި ރެއާލްއަށް ދާން ބޭނުން ނުވާނެކަމަށް ގިނަ ބަޔަކަށް ހީވި ނަމަވެސް އޭނާ މިވަނީ ގިނަ ބަޔަކަށް ހައިރާން ކަން ގެނުވާފައެވެ. ބޭލް މިވަގުތު ދަނީ 2022 ވަނަ އަހަރުގެ ވާރލްޑް ކަޕަށް ކޮލިފައިވުމަށް ވޭލްސް އާއި ބެލްޖިއަމް ކުޅޭ މެޗަށް ތައްޔާރުވުމުގެ ގޮތުން ވޭލްސް ޓީމާއެކުއެވެ. އަދި ކްލަބްގައި ދިމާވާ މައްސަލަތަކާހެދި ވޭލްސް ޓީމަށް އޭނާ ދޭ އަހައްމިއްޔަތާއި ސަމާލުކަމަށް އެއްވެސް ބަދަލެއް ނާންނާނެކަމަށް ވެސް ބޭލް ހާމަކުރެއެވެ. މިސީޒަންގައި އޭނާ ސްޕަރސްއަށް ބަދަލުވުމުގެ އެންމެ ބޮޑު ބޭނުމަކަށްވީ ގަވައިދުން ކުޅެން ބެނުންވުން ކަމަށާއި އަދި މިފަހަރުގެ ޔޫރޯ އައްނަންވާއިރަށް ފިޓްކޮށް ހުންނަން ބޭނުންވީމަކަށެވެ. އަދި ޔޫރޯއަށްފަހު އޭނާ ބޭނުންވަނީ އެނބުރި ރެއާލްއަށް ދާން ކަމަށްވެސް ބޭލް ހާމަކުރިއެވެ.
ރެއާލްއާއެކު ބޭލްވަނީ ޗެމްޕިއަންސް ލީގުގެ ތަށި ހަތަރު ފަހަރު އުފުލާލާފައެވެ. އަދި ލަލީގާ ތަށި ދެފަހަރު ކާމިޔާބުކޮށްފައިވާއިރު ކޮޕާ ޑެލްރޭ ތަށި އެއްފަހަރު އަދި ޔުއޭފާ ސުޕަރ ކަޕާއި ކްލަބް ވާރލްޑް ކަޕްގެ ތަށި ތިން ފަހަރު ހޯދާފައިވެއެވެ. މިސީޒަންގައި ސްޕަރސްއަށް ބަދަލުވުމަށްފަހު ކުރީކޮޅު އޭނާއަށް ގަވައިދުން ކުޅުމުގެ ފުރުސަތު ލިބިފައި ނުވި ނަމަވެސް ފަހަކަށް އައިސް ބޭލްވަނީ ރަނގަޅު ކުޅުމެއް އަލުން ދައްކަން ފަށާފައެވެ. މިގޮތުން މިހާތަނަށް ކުޅުނު 25 މެޗުގައި 10 ލަނޑު އެޓީމަށް ކާމިޔާބުކޮށްދީފައިވެއެވެ.