ފ. އަތޮޅުގެ އިތުރު 2 ރަށެއްގައި ރިސޯޓު ތަރައްޤީކުރުމަށް ހުޅުވާލުމަށް ހަމަޖެހިފައިވާކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހް ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ އެމްޑީޕީން ކުރިއަށްގެންދާ "ރަށްވެހި ފަތިސް" ކެމްޕެއިނުގައި ފ.އަތޮޅަށް ޚާއްސަކޮށްގެން ބޭއްވި ބައްދަލުވުމުގައި ވާހަކަފުޅު ދައްކަވަމުންނެވެ.
ރައީސް ޞާލިޙް ވިދާޅުވީ ފ. އަތޮޅު ދެ ރަށެއްގައި ފަތުރުވެރިކަން ތަރައްޤީކުރުމަށް މިއަހަރުތެރޭ ހުޅުވާލާނެ ކަަމަށެވެ. އަދި މިހާރުވެސް ފ.އަތޮޅުގައި ފަތުރުވެރިކަން ތަރައްޤީކުރުމަށް 3 ރަށެއް ދޫކޮށްފައިވާއިރު، އެރަށްތަކުގައި އެއްވެސް މަސައްކަތެއް ކުރިއަށް ނުދާކަން ރައީސް ފާހަގަކުރެއްވިއެވެ.
" ފަތުރުވެރިކަން ތަރައްޤީކުރުމަށް މިއަހަރު ބީލަމަށް ހުޅުވާލަން ދެ ރަށެއް އެބައޮތް، އެއީ އެނބުލުފުށިއާއި، ޖިންނަތުގައު، ލަސްތަކެއް ނުވެ އެދެރަށް ހުޅުވާލާނަން، އަދި މިހާރުވެސް ރިސޯޓް ތަރައްޤީކުރަން ކުރީގެ ސަރުކާރުން އެބައޮތް ތިން ރަށް ދޫކޮށްފައި، އެއީ ހިމިއްޗާއި، މިނިމަސްގަލި އަދި މާފުށި، މިރަށްތަކުގައި އެއްވެސް މަސައްކަތެއް ކުރިއަކަށް ނުދޭ،" ރައީސް ވިދާޅުވިއެވެ.
ރައީސް ވިދާޅުވި މި ތިން ރަށުގައި ރިސޯޓު ތަރައްޤީކުރުމުގެ އެއްވެސް މަސައްކަތެއް ކުރިއަށް ނުދާތީ ޓޫރިޒަމް މިނިސްޓްރީއާ ގުޅިގެން މިފަދަ ރަށްތަކާއި މެދު ގޮތެއް ނިންމުމުގެ މަސައްކަތްކުރަމުންދާ ކަމަށެވެ.
ފ. އަތޮޅުގައި މި ވަގުތު އޮތީ އެންމެ ރިސޯޓެކެވެ. އެއީ ފިލިތެޔޮ އައިލެންޑް ރިސޯޓެވެ.