ކުއްލި ޙާލަތު އިޢުލާންކުރެވުމުން ކޯޓް އަމުރެއްނެތި މީހުންނާއި ތަންތަނާއި ގެތައް ފާސްކުރުމަށް ބާރުލިބިގެންދާނެކަމަށް މިނިސްޓަރ އުމަރު ނަސީރު ވިދާޅުވެއްޖެއެވެ.
ޕަބްލިކް ސާރވިސް މިޑީއާ އަށް ދެއްވި ޚާއްޞަ ބަސްދީގަތުމެއްގައި މިނިސްޓަރ އުމަރު ނަސީރު ވިދާޅުވީ، މިހާރުވެސް ވަރަށް ގިނަ ހަތިޔާރު ފެނިފައިވާ ކަމަށާއި، އަދިވެސް އިތުރު ހަތިޔާރު އާއްމުންގެ އަތުގައި ހުރިކަމަށް ވަރަށް ބޮޑަށް ތުހުމަތު ކުރެވޭކަމަށެވެ. މިކަމަށް އެންމެ ބޮޑަށް ތުހުމަތު ކުރެވޭ ސަބަބަކީ، މިދިޔަ އާދިއްތަ ދުވަހުގެ ރޭ ބޮމެއް ގޮތަށް ތައްޔާރުކުރެވިފައިވާ ގޮވާއެއްޗެއް ފެނުމުން ކަމަށްވެސް މިނިސްޓަރ ވިދާޅުވިއެވެ. އެހެން ކަމުން ޤައުމުގައި މިއަދު ކުއްލި ޙާލަތު އިޢުލާންކުރީ އާއްމު ބައެއްގެ އަތުގައި ގޮވާ ތަކެއްޗާއި ހަތިޔާރު ހުރި ކަމުގެ ތުހުމަތު ކުރެވިގެން، ރައްޔިތުންގެ ސަލާމަތާއި ރައްކާތެރިކަމަށްޓަކައި ކަމަށް މިނިސްޓަރ އުމަރު ފާހަގަކުރެއްވިއެވެ.
މިނިސްޓަރ އުމަރު އިތުރަށް ވިދާޅުވީ، ރައްޔިތުންގެ ސަލާމަތާއި ރައްކާތެރިކަމަށްޓަކައި އަޅަންޖެހުނު ކޮންމެ ފިޔަވަޅެއް ފުލުހުންނާއި ސިފައިން އަޅަމުންދާނެކަމަށާއި، މި ދަނޑިވަޅުގައި ބަލަންޖެހިއްޖެ ހާލަތެއްގައި ދަންވަރުވެސް ގޭގެއަށް ވަދެ ބަލައި ފާސްކުރާނެކަމަށެވެ. އަދި ޗެކް ކުރެވޭ ކޮންމެ ގެއަކީ ގޮވާތަކެތި ހުރިގެއަކަށް ނުވެދާނެކަމަށާއި، ނަމަވެސް ލިބޭ މަޢުލޫމާތަކަށް ބަލައި އެކަން ކުރަންޖެހިދާނެކަމަށެވެ. އެހެން ކަމުން މި އުނދަގޫ ދަތި ދަނޑިވަޅުގައި ރައްޔިތުން ސަރުކާރަށް އެއްބާރުލުންދީ، ސަރުކާރާއި އެކު ތިބުމަށްވެސް މިނިސްޓަރ އެދިވަޑައިގެންނެވިއެވެ.
ކުއްލި ނުރައްކަލުގެ ޙާލަތު އިޢުލާންކުރުމާއި އެކު ޤާނޫނު އަސާސީގައި ކަނޑައެޅިފައިވާ ބައެއް ހައްޤުތައް ވަގުތީ ގޮތުން ހިފަހައްޓާއި ހަނިކުރުމުގެ ފުރުޞަތު ލިބިގެންދެއެވެ. މިގޮތުން ހަނިކުރެވިގެންދާ
ބައެއް ހައްޤުތަކުގެ މައްޗަށް އަލިއަޅުވާލައްވަމުން، ހޯމް މިނިސްޓަރ އުމަރު ނަސީރު ވިދާޅުވީ، ސުލްހަވެރިކަމާއި އެކު އެއްވެއުޅުމުގެ މިނިވަންކަމުގެ ޙައްޤު ހަނިކުރެވިގެން ދިޔައީ އެމްޑީޕީން މި މަހުގެ 6 ވަނަ ދުވަހު ބާއްވަން އުޅޭ އެއްވުން ހުއްޓުވަން ކުރެވުނު ކަމެއް ނޫންކަމަށެވެ. އެހެންނަމަވެސް އެފަދަ އެއްވުމެއްގެ ތެރެއަށް ބަޔަކު ވަދެ ހަޅުތާލު ހިންގާ ނުވަތަ އެއްޗެއް ގޮއްވައިފިނަމަ ގިނަ ބަޔަކަށް އެކަމުގެ ތަކުލީފު އުފުލަންޖެހި ބައެއްގެ ފުރާނައަށް ގެއްލުންވުމަކީ އެކަށީގެންވާކަމެއް ކަމަށް މިނިސްޓަރ ފާހަގަކުރެއްވިއެވެ.
ކުއްލި ޙާލަތު އިޢުލާން ކުރި ނަމަވެސް އެއްވެސް ރައްޔިތަކަށް ވަކި ގަޑިއެއްގައި ބޭރަށް ނިކުތުން ފަދަ ޙައްޤެއް ނުގެއްލޭނެކަން ހޯމް މިނިސްޓަރ އުމަރު ނަސީރު ފާހަގަކުރެއްވިއެވެ.