ސްޕެނިޝް ލަލީގާގައި އެފްސީ ބާސެލޯނާ އާއި ހުއެސްކާ ބައްދަލުކުރިމެޗް ބާރސާ ކާމިޔާބުކޮށްފިއެވެ. ބާރސާގެ ދަނޑުގައި ކުޅުނު މިމެޗް އެޓީމް ކާމިޔާބުކުރީ 4 ލަނޑު އެއްލަނޑުންނެވެ.
މިމެޗްގައި ބާރސާއިން ޖެހި ފުރަތަމަ ލަނޑު މެޗްގެ 13 ވަނަ މިނެޓްގައި ޖަހައިދިނީ ބާރސާއަށް 767 ވަނަ މެޗް ކުޅެމުންދިޔަ ކެޕްޓަން ލިއޮނެލް މެސީއެވެ. މިމެޗްގައި ކުޅުމާއެކު މެސީ މިވަނީ ބާރސާއަށް އެންމެ ގިނަ މެޗް ކުޅެގެން ޒާވީ ހެނާންޑޭޒް ހަދާފައިވާ ރިކޯޑާއި އަރާ ހަމަކޮށްފައެވެ. އަދި ދެން ކުޅޭ މެޗާއި އެކު ބާރސާއަށް އެންމެ ގިނަ މެޗް ކުޅުން ކުޅުންތެރިޔާގެ ރިކޯޑް މެސީއަށް ގާއިމް ކުރެވޭނެއެވެ.
މިމެޗްގައި ބާރސާއިން ޖެހި ދެވަނަ ލަނޑު މެޗްގެ 35 ވަނަ މިނެޓްގައި ކާމިޔާބުކޮށްދިނީ އެންޓޮއިން ގްރީޒްމަންއެވެ. މިމެޗްގައި ހުއެސްކާއިން ޖެހި ހަމައެކަނި ލަނޑު މެޗްގެ ފުރަތަމަ ހާފްގެ އިތުރު ވަގުތުގައި ޖަހައިދިނީ ލިބުނު ޕެނަލްޓީއަކުން ރަފާ މީރުއެވެ. މިމެޗްގައި ބާރސާގެ ތިންވަނަ ލަނޑު މެޗްގެ 53 ވަނަ މިނެޓްގައި ޖަހައިދިނީ އޮސްކަރ މިންގުއޭޒާއެވެ. އަދި ފަހު ލަނޑު މެޗްގެ ފަހު މިނެޓްގައި ޖަހައިދިނީ ފުރަތަމަ ލަނޑުވެސް ޖަހައިދިނިން މެސީއެވެ.
މިކާމިޔާބީއާއެކު ބާރސާއަށް މިވަނީ ކުޅުނު 27 މެޗުން ލިބިފައިވާ 59 ޕޮއިންޓާއެކު ތާވަލްގެ ދެވަނައަށް އަނެއްކާވެސް އަރާފައެވެ. އަދި އެއްވަނައިގާ އުޅޭ އެޓްލެޓިކޯ މެޑްރިޑާއި ދެމެދުގައިވާ ފަރަގު ހަތަރު ޕޮއިންޓަށް ކުޑަކޮށްފައެވެ. މިމެޗުން ބަލިވި ހުއެސްކާ އުޅެނީ ކުޅުނު 27 މެޗުން ލިބިފައިވާ 20 ޕޮއިންޓާއެކު ތާވަލްގެ އެންމެ ފުލުގައެވެ.