ރ.ދުވާފަރަކީ 2004ވަނަ އަހަރުގެ ޑިސެމްބަރުމަހު ކުރިމަތިވި ސުނާމީ ކާރުސާގައި އެންމެ ބޮޑު ގެއްލުމެއް ލިބުނު އެއަތޮޅު ކަނދޮޅުދޫ މީހުން އާބާދުވުމަށް އަލުން މީހުން އާބާދުކޮށް ތަރައްޤީކުރި ރަށެވެ. ރ.ކނދޮޅުދޫ މީހުންނަށް ދުވާފަރުގައި ދާއިމީ ބޯހިޔާވަހިކަމެއް ޤާއިމުކޮށް، އެރަށަށް މީހުން ބަދަލުކޮށްފައިވަނީ 2008ވަނަ އަހަރުގެ ޑިސެމްބަރުމަހުއެވެ.
ރ.ދުވާފަރުގެ މިހާރުގެ އާބާދީ 3000އަށް އަރައެވެ. އާބާދީ ބޮޑުވެ ދުވާފަރަށް މިހާރު ކުރިމަތިވެފައިވާ އެންމެބޮޑު ދަތިކަމަކީ ރަށުގެ ބިމުގެ ޖާގައިގެ ދަތިކަމެވެ. ބިން ފުރިފައިވުމުގެ ސަބަބުން ރަށުން އިތުރަށް ބޯހިޔާވަހިކަން ފޯރުކޮށްދިނުމަށްވަނީ ހުރަސްއެޅިފައެވެ. އަދި ބިމުގެ ދަތިކަމުގެ ސަބަބުން ރަށުގައި އާ ވިޔަފާރިތަށް ފުޅާވެގެންއައުމަށްވެސްވަނީ ގޮންޖެހުންތައް ކުރިމަތިވެފައެވެ.
ދުވާފަރުގައި ކުރިއަށް ގެންދިއުމަށް ސަރުކާރުގެ ބަޖެޓުގައި މިއަހަރު 6 މަޝްރޫޢުއެއް ހިމަނާފައިވެއެވެ. މިގެތެރެއިން ރަށުގެ ރައްޔިތުންގެ އުއްމީދާ އެންމެބޮޑަށް ގުޅިފައިވާ މަޝްރޫޢުއަކީ ރަށުގެ ބިން ހިއްކުމުގެ މަޝްރޫޢުގެ މަސައްކަތެވެ. މީގެކުރިން އެތަށްފަހަރެއްގެ މަތިން ބަޖެތުކުރިނަމަވެސް، މި މަޝްރޫޢުގެ ޢަމަލީ މަސައްކަތް އޮތީ ނުފެށިއެވެ.
ރައްޔިތުންގެ އުންމީދުތަކަށް ނިމުމެއްއައިސް، މިހާރު މިވަނީ ދުވާފަރުގެ ބިން ހިއްކުމުގެ ޢަމަލީ މަސައްކަތް ފަށާފައެވެ. އެމްޓީސީސީއާ ހަވާލުކޮށްގެން ކުރިއަށްގެންދާ މި މަޝްރޫޢުގއ ޢަމަލީ މަސައްކަތް ފެށީ މިދިޔަ މަހުގެ 27ވަނަ ދުވަހުއެވެ. އެގޮތުން ބިން ހިއްކާ ސަރަޙައްދުގެ ބައުންޑް ވޯލްގެ މަސައްކަތް ނިންމައި، ބިންހިއްކާ ސަރަޙައްދަށް ވެލިއެޅުމަށް މަހާ ޖައްރާފު މިހާރުވަނީ ދުވާފަރަށް ގޮސްފައެވެ.
މި މަޝްރޫޢުއަށް ރަށުގެ ރައްޔިތުން އުންމީދު ކުރަމުންއައި މިންވަރު އެނގެނީ މަހާ ޖައްރާފަށް ރަށުގެ ރައްޔިތުން ކީ ހޫނު މަރުޙަބާއިންނެވެ. މަހާ ޖައްރާފް އެރަށަށް ގޮސްފައިވަނީ ހުކުރު ދުވަހުގެ ހަވީރުއެވެ. ރަށުގެ ކުދި ބޮޑު އެންމެންވަނީ މަހާ ޖައްރާފަށް މަރުޙަބާ ކިޔުމަށް ބަނދަރުމައްޗަށް ނިކުމެފައެވެ. އަދި ދޯނިދޯނީގައި ކަނޑުމައްޗަށް ނިކުމެ ވަނީ އުފާ ފާޅުކޮށްފައެވެ. އެގޮތުން ރަށުގައި ސަރުކާރުން ފަށައިގެން ކުރިއަށްގެންދާ މަޝްރޫޢުތަކާ ގުޅޭގޮތުން ޚާއްސަ ލަވައެއްވެސް ހަދާފައިވެއެވެ. މި ލަވައިގައި ރައްޔިތުން މި މަޝްރޫޢަށް ކުރަމުން އައި އުންމީދުތަކާ، އަދި މަޝްރޫޢުތައް ފެށުމުން ރައްޔިތުންގެ އުފާވެރި ޝުޢޫރުވަނީ ފާޅުކޮށްފައެވެ. އަދި މިކަން ފާހަގަކުރުމަށް ބަނދަރުމަތީގައި ސަޤާފީ އެކިއެކި ހަރަކާތްތައްވެސް ކުރިއަށްގެންދިޔައެވެ.
ދުވާފަރު ފަޅުން 22.2 ހެކްޓަރުގެ ސަރަޙައްދެއް ހިއްކުމަށްވަނީ ހަމަޖެހިފައެވެ. ދުވާފަރުގެ މިހާރުގެ ބިމުގެ ބޮޑުމިނަކީ 49.5 ހެކްޓަރެވެ. ބިންހިއްކުމުގެ ޢަމަލީ މަސައްކަތް ފަށާފައިވާއިރު މި މަޝްރޫޢުގެ ތެރެއިން 423 މީޓަރުގެ ސަރަޙައްދެއްގައި ބޮޑު ހިލައިގެ ރިވެޓްމެންޓް ޖެހުމުގެ މަސައްކަތް ކުރިއަށްދާނެއެވެ. އަދި 70 މީޓަރުގެ ސަރަޙައްދެއްގައި ބޭރު ތޮށި ލުމުގެ މަސައްކަތްވެސް ކުރާނެއެވެ.
ދުވާފަރު ބިން ހިއްކުމުގެ މަޝްރޫޢުއަށް ދައުލަތުގެ މިއަހަރުގެ ބަޖެޓުގައި 32 މިލިއަން ރުފިޔާވަނީ ކަނޑައަޅާފައެވެ. މުޅި މަޝްރޫޢުގެ އަގަކީ 54 މިލިއަން ރުފިޔާއެވެ.