އަދަބީ ތަރިކަ ޙިމާޔަތްކުރުމުގައި ކައުންސިލްތައް ބާރުވެރިކުރުމަށް، މުޅި ރާއްޖެއަށް ހުޅުވާލައިގެން ޚާއްސަ ވެބިނާއެއް ބާއްވައިފިއެވެ. މި ވެބިނާއަކީ ދިވެހި ބަހުގެ އެކެޑަމީއާ ލޯކަލް ގަވަމަންޓް އޮތޯރިޓީ ގުޅިގެން ކުރިއަށްގެންދިޔަ ވެބިނާއެކެވެ.
ރާއްޖޭގެ ހުރިހާ ރަށްރަށުގެ ކައުންސިލްތަކަށް ޚާއްސަކޮށްގެން ބޭއްވި "ދިވެހި ތާރީޚާ އަދަބީ ތަރިކައިގެ ވެބިނާ"ގައި ރަށްރަށުގެ ކައުންސިލްތަކުން 400އަސްވުރެ ގިނަ މީހުންވަނީ ބައިވެރިވެފައެވެ. މި ވެބިނާއަކީ ޤައުމީ ތާރީޚް ދުވަސް ފާހަގަކުރުމަށް ކުރިއަށްގެންދިޔަ ވެބިނާއެކެވެ.
ވެބިނާގައިވަނީ ދިވެހިރާއްޖޭގެ ޤައުމީ ބަހަށް އިސްކަންދިނުމުގެ ޤާނޫނާ، ސަޤާފީ ތަރިކަ ރައްކާތެރިކުރުމާބެހޭ ޤާނޫނުގައި ހިމެނޭ ކަންކަމާގުޅޭ މަޢޫލޫމާތު ފޯރުކޮށް، ދާއިރާގެ ޤާނޫނުތަކަށް ކައުންސިލްތައް ހޭލުންތެރިކޮށްފައެވެ. އަދި ރާއްޖޭގެ އެކި ސަރަޙައްދުތަކުގައި ހުރި އާސާރީ ތަންތަނުގެ މަޢުލޫމާތު މިހާތަނަށް އެއްކުރަމުން އައިސްފައިވާގުތުގެ މަޢުލޫމާތުވަނީ ދީފައެވެ. މީގެއިތުރަށް ތަރިކައަކީ ކޮބައިކަން ދެނެގަންނާނެގޮތާ، ތަރިކައިގެ ބާވަތްތަކާ އަދި އެކަންކަން ދެނެގަނެ މަޢުލޫމާތު އެއްކުރުމާ، ރަށުފެންވަރުގައި އެފަދަ ތަންތަނާ ތަކެއްޗާ އަދި ކަކަން ޙިމާޔަތްކޮށް ދެމެހެއްޓުމަށް ކުރެވޭނެ ކަންކަމާ ގުޅޭ މަޢުލޫމާތުވަނީ ދީފައެވެ.
މި ވެބިނާވަނީ ތިން ގައޑިއިރަށް ކުރިއަށް ގެންގޮސްފައެވެ. ވެބިނާ ފެށުމުގެ ގޮތުން ބައިވެރިވެވަޑައިގެން، ފަންނާ ސަޤާފަތާ ތަރިކައިގެ ވަޒީރު ޔުމްނާ މަޢުމޫނު ވިދާޅުވީ، ޤައުމީ ތާރީޚް ދުވަހާ ގުޅިގެން މިއަހަރު ޚާއްސަކުރުމަށް ހަމަޖެހިފައިވަނީ ޒަމާނީ ގޮތްތައް ބޭނުންކޮށްގެން މަޢުލޫމާތު ރައްކާކޮށް، އެ މަޢުލޫމާތު ފޯރުކޮށްދިނުމަށްކަމަށެވެ. އަދި ކޮންމެ ރަށަކަކުންވެސް އެރަށެއްގެ ފެންވަރުގައި މިފަދަ މަޢުލޫމާތުތައް އެއްކޮށް ވީހާވެސް ގިނަ ބަޔަކަށް ފޯރުކޮށްދެއްވުމަށް އެދިލެއްވިއެވެ.
"ކައުންސިލްތަކުގެ ދަޢުރު މިކަމުގައި ބޮޑު. މިހާރާއި އަންނަން އޮތް ޖީލުތަކަށްވެސް މި މަޢުލޫމާތުތައް މުހިންމު. އެ ރަށެއްގައި ހުރި ޚާއްސަ ސިފަތަކާ، ސަޤާފަރާ ބަހުރުވަތަށް ރައްކާތެރިކުރުން މުހިންމު." މިނިސްޓަރ ޔުމްނާ ވިދާޅުވިއެވެ.
އަދަބީ ތަރިކަ ކުރިއެރުވުމަށް ދިވެހި ބަހުގެ އެކެޑަމީއިންދަނީ ގިނަގުނަ މަސައްކަތްތަކެއް ކުރަމުންނެވެ. އެގޮތުން އަތޮޅުތަކަށް ގޮސް އެރަށްރަށުގައިހުރި އަދަބީ ތަރިކައާއި ގުޅޭ މަޢުލޫމާތު ހޯދާ ރައްކާކުރުން ހިމެނެއެވެ. މި މަސައްކަތް ގިނަ އަތޮޅުތަކެއްގައި މިހާރުވެސް ކުރިއަށް ގެންގޮސްފައިވެއެވެ. އަދި އަދަބިއްޔާތަށް މުޖުތަމަޢު ހޭލުންތެރިކުރުމުގެ އެކި ކަހަލަ ޕްރޮގްރާމްވެސްވަނީ ކުރިއަށް ގެންގޮސްފައެވެ.