ލަންކާގައި އުޅޭ ދިވެހިންނަށް ކުރިޔަށް އޮތް ލޯކަލް ކައުންސިލް އިންތިޚާބުގައި ވޯޓްލުމަށް ރަޖިސްޓްރީވުމުގެ ފުރުސަތު ހުޅުވާލައިފިއެވެ. ސްރީލަންކާގައި އުޅޭ ދިވެހިން ވޯޓުލާން ރަޖިސްޓްރީ ކުރުން ކުރިޔަށްދަނީ އެގައުމުގައި ހުންނަ މޯލްޑިވިއަން އެޑިޔުކޭޝަނަލް އެންޑް ކަލްޗަރަލް ސެންޓަރުގައެވެ.
އިލެކްޝަން ކޮމިޝަނުން ހުޅުވާލާފައިވާ މި ފުރުޞަތުގައި ލަންކާގައި އުޅޭ ދިވެހިން ވޯޓުލާން ރަޖިސްޓްރީ ކުރުމަށް އެދޭ ފޯމު މިއަދުން ފެށިގެން ސޯސަންވިލާއިން ލިބެން ހުންނާނެކަމަށް މައުލޫމާތު ލިބެއެވެ.
ވޯޓުލާން ރަޖިސްޓްރީކުރާ ފޯމު ސޯސަންވިލާއިން ބަލައިގަތުމަށް ހަމަޖެހިފައިވަނީ ހޯމަ، އަންގާރަ، ބުދަ، ބުރާސްފަތި ދުވަހު ކޮންމެ ދުވަހެއްގެ ހެނދުނު 9:00 އިން މެންދުރު ފަހު 13:00 އަށެވެ. ހުކުރު ދުވަހު ފޯމު ބަލައިގަތުމަށް ހަމަޖެހިފައި ވަނީ މެންދުރު ފަހު 15:00 އިން 17:00 އަށެވެ. ހޮނިހިރު ދުވަހާއި އާދީއްތަ ދުވަހު ސޯސަންވިލާއިން ފޯމު ބަލައިގަންނާނީ ހެނދުނު 10:00 އިން މެންދުރު ފަހު 15:00 އަށެވެ.
ސްރީލަންކާއަކީ ގިނަ އަދަދެއްގެ ދިވެހިން ދިރިއުޅެމުން އަންނަ ގައުމެކެވެ. އެހެންވެ ހުރިހާ އިންތިޚާބެއްގައިވެސް އިލެކްޝަން ކޮމިޝަނުން ދަނީ ލަންކާގައި ވޯޓު ފޮށި ބަހައްޓަމުންނެވެ.
ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގައި ވޯޓުލާން ރަޖިސްޓަރީވެފައިވާ ތަން ނޫން އެހެން ތަނެއްގައި ވޯޓުލުމަށް ރަޖިސްޓަރީވުމުގެ ފުރުޞަތު އިލެކްޝަންސް ކޮމިޝަނުން ހުޅުވާލީ މިމަހުގެ 2 ވަނަ ދުވަހުއެވެ. އަންނަ އޭޕްރީލް މަހުގެ 10 ވަނަ ދުވަހު ބާއްވާ އިންތިޚާބަށް ރީރަޖިސްޓްރީވުމުގެ ފުރުސަތު ހުޅުވާލާފައިވަނީ މިމަހުގެ 11 ވާ ބުރާސްފަތި ދުވަހުގެ ނިޔަލަށެވެ.
މި މުއްދަތުގެ ތެރޭގައި ރަޖިސްޓަރީވުމަށް އެދި ހުށަހަޅާނީ މިދިޔަ އެޕްރީލު މަހުގެ 4 ވަނަ ދުވަހު ބޭއްވުމަށް ނިންމުމަށްފަހު ފަސްކުރި އިންތިޚާބުގައި ރަޖިސްޓްރީކުރި ތަން ނޫން އެހެންތަނަކަށް ވޯޓްލާން ބޭނުންވާ ފަރާތްތައް ކަމަށް އިލެކްޝަންސް ކޮމިޝަނުން ވިދާޅުވެއެވެ. އެހެން ނަމަވެސް ރިސޯޓްތަކާއި ޖަލުތަކާއި ކުއަލަލަންޕޫރާއި، ލަންޑަންގައި ވޯޓުލާން ރަޖިސްޓަރީކޮށްފައިވާ މީހުން މިފަހަރުގެ އިންތިޚާބުގައި ވޯޓްލާނަމަ އަލުން ރީ ރަޖިސްޓްރީވާން ޖެހޭނޭކަމަށް އިލެކްޝަނުން ވިދާޅުވެއެވެ.
އެހެންކަމުން މިހާރު ރަޖިސްޓަރީވެފައިވާ ތަން ނޫން ތަނަކަށް ވޯޓުލާން ބޭނުންނަމަ، ރީރަޖިސްޓްރޭޝަނަށް ހުޅުވާލާފައިވާ މުއްދަތުގެ ތެރޭގައި އެމީހަކު ވޯޓުލުމަށް ރަޖިސްޓަރީ ކުރަންވާނޭކަމަށް އިލެކްޝަނުން ވިދާޅުވެއެވެ.