އެމްޓީސީސީއަކީ ރާއްޖޭގެ ރަށްރަށުގައި އެންމެ ގިނަ އަދަދަކަށް ތަރައްޤީގެ މަޝްރޫޢުތައް ހިންގާ ދިވެހި ކުންފުންޏެވެ. ކުންފުނީގެ ޢަމާޒު މިހާރު ހުރީ މި މަސައްކަތުގައި ވީހާވެސް ގިނަ ދިވެހި މުއައްޒަފުން ބައިވެރިކޮށް، ވަޒީފާގެ ބާޒާރަށް ދިވެހިން ނެރުމެވެ. އެ ކުންފުނިން މިހާރު މިވަނީ ދިވެހިންނަށް ޚާއްސަކޮށްގެން 250އަށްވުރެ ގިނަ ވަޒީފާގެ ފުރުޞަތު ހުޅުވާލާފައެވެ.
އެމްޓީސީސީއަކީ ރަށްރަށުގެ ބަނދަރުގެ ޢަމަލީ މަސައްކަތުން ފެށިގެން، އެއަރޕޯޓް ފަދަ ބޮޑެތި މަޝްރޫޢުތަކަށްވެސް ކުރަމުންދާ ކުންފުންޏެކެވެ. މިވަގުތުވެސް އެ ކުންފުނިންދަނީ ރާއްޖޭގެ އެކި ރަށްރަށުގައި 50މަޝްރޫޢެއްގެ މަސައްކަތް ހިންގަމުންނެވެ. އަދި އިތުރު 21މަޝްރޫޢެއް ފެށުމަށްދަނީ ތައްޔާރުވަމުންނެވެ. އެމްޓީސީސީން މަޢުލޫމާތުދޭ ގޮތުގައި އަންނަ މަހުވެސް މުޅިން އާ 11މަޝްރޫޢެއް ފެށުމަށްވެސްދަނީ ތައްޔާރުވަމުންނެވެ.
އެމްޓީސީސީއިން މިހާރު މިވަނީ އެކުންފުނީގެ މަސައްކަތްތަކުގައި ދިވެހިންނަށް ވަޒީފާގެ ފުރުޞަތު ފަހިކޮށްދިނުމަށްޓަކައި ޚާއްސަ ޕްރޮގްރާމެއް ފެށުމަށް ނިންމާފައެވެ. އެގޮތުން އެމްޓީސީސީގެ ސައިޓުގައި މަސައްކަތްކުރުމަށް، 6 ދާއިރާއަކުން ދިވެހިން ހޯދުމަށްވަނީ އިޢުލާންކޮށްފައެވެ. މީގެތެރޭގައި ހިމެނެނީ ހެވީ ވެހިކަލް އޮޕަރޭޓަރުންނާއި، ވެލްޑަރުންނާއި، ކާޕެންޓަރުންނާއި، މޭސަނުންނާއި، މެކޭނިކުންގެ އިތުރުން އިންޖިނިއަރިން ދާއިރާއިން ހުޅުވާލާފައިވާ ވަޒީފާތަކެވެ. މި މަޤާމުތަކަށް 250 މުޢައްޒަފުން ނެގުމަށްވަނީ ހަމަޖެހިފައެވެ.
މިކަމާ ގުޅޭ މަޢުލޫމާތު ދެއްވަމުން އެމްޓީސީސީގެ ސީއީޢޯ ޢާދަމް ޢާޒިމް ވިދާޅުވީ ކުންފުނިން އަބަދުވެސް މަސައްކަތް ކުރަމުންދަނީ ކުންފުނީގެ މަސައްކަތްކުގައި ދިވެހި މުއައްޒަފުން ބައިވެރިކުރުމަށްކަމަށެވެ. އަދި މި މަޤާމުތަކަށް ހޮވާ މީހުންނަށް އެކަށީގެންވާ ތަމްރީންތައްވެސް ދޭނެކަމަށްވަނީ ބުނެފައެވެ.
"ކުންފުނިން ހިންގާ ޕްރޮޖެކްޓްތައް މިދަނީ އިތުރުވަމުން. ޢަމާޒަކީ ކުންފުނީގެ މަސައްކަތްތަކުގައި ދިވެހި މުއައްޒަފުންގެ ބައިވެރިވުން އިތުރުކުރުން. ޕްރޮޖެކްޓް ސައިޓްގެ ވަޒީފާތަކުގައި ދިވެހިންނަށް ޚާއްސަ އިސްކަމެއް ދޭނަން." އާދަމް އާޒިމް ވިދާޅުވިއެވެ.
ވަޒީފާތަކަށް ކުރިމަތިލާން ބޭނުންވާ މީހުންނަށް ވޯކް-އިން އިންޓަވިއުތައް 4 މަރޗް އިން 11 މަރޗްއަށް ކުރިއަށް ގެންދިއުމަށްވަނީ ހަމަޖެހިފައެވެ. އިންޓަރވިއުތައް އޮންނާނީ މިމުއްދަތުގެ ތެރޭގައި ހުކުރުދުވަސް ފިޔަވައި ކޮންމެ ދުވަހަކުވެސް މެންދުރުފަހު 2 އިން ފަހަކަށް ކަމަށް އެމްޓީސީސީން މަޢުލޫމާތުދެއްވައެވެ. އިންޓަވިއުތައް އޮންނަ ދުވަސްތަކާ ގަޑިތަކަކީ:
އިންޓަވިއުތައް އޮންނަ ދުވަސްތަކާ ގަޑިތަކަކީ:
4 މާރޗް 2021 (ބުރާސްފަތި) ގެ 14:00 އިން 17:00
6 މާރޗް 2021 (ހޮނިހިރު) ގެ 14:00 އިން 17:00
7 މާރޗް 2021 (އާދިއްތަ) ގެ 14:00 އިން 17:00
8 މާރޗް 2021 (ހޯމަ) ގެ 14:00 އިން 17:00
9 މާރޗް 2021 (އަންގާރަ) ގެ 14:00 އިން 17:00
10 މާރޗް 2021 (ބުދަ) ގެ 14:00 އިން 17:00
11 މާރޗް 2021 (ބުރާސްފަތި) ގެ 14:00 އިން 17:00
އެމްޓީސީސީން ވިދާޅުވީ މި މަޤާމުތަކުގެ މުސާރަ 10000އަށްވުރެ ބޮޑުވާނެކަމަށެވެ. އެމްޓީސީސީގައި މިވަގުތު 2183މުއައްޒަފުން މަސައްކަތް ކުރަމުންދެއެވެ. މީގެތެރޭގައިވެސް ގިނައީ ދިވެހި މުއައްޒަފުންކަމަށް އެ ކުންފުނިން މަޢުލޫމާތުދެއެވެ.