ރާއްޖޭގައި ޗުއްޓީ ހޭދަކުރުމަށް އައި ކުޑަކުއްޖަކު މޫދަށް ވެއްޓުމާއި ގުޅިގެން، އެ ކުއްޖާ ސަލާމަތްކުރި އެމްއޭސީއެލްގެ ދެ މުޢައްޒަފުންނާއި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ބައްދަލުކުރައްވާ، ޝުކުރު އަދާކޮށްފިއެވެ.
މި ބައްދަލުކުރެއްވުން އޮތީ ރައްޔިތުންގެ މަޖިލީހުގައެވެ. ޗުއްޓީ ހޭދަކުރުމަށް މިދިޔަ ހުކުރުދުވަހު ރާއްޖެއައި ރަޝިޔާ އާއިލާއެއްގެ 8 އަހަރުގެ ކުއްޖާ އެއަރޕޯޓް ޖެޓީ ކައިރިން މޫދަށް ވެއްޓިފައިވަނީ ޖެޓީކައިރީގައި ކުޅެން އުޅުމުގެ ތެރޭގައެވެ. މޫދަށް ވެއްޓުނު ކުއްޖާ ސަލާމަތްކޮށްފައިވަނީ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް އެމްއޭސީއެލްގެ ޓަރމިނަލް ސަރވިސްގައި މަސައްކަތްކުރަމުންދާ ހަސަން ޒަރީރުއާއި އަބްދުލް ޢަޒީޒު އަބޫބަކުރުއެވެ.
މިދެ މީހުންނާ ބައްދަލުކުރައްވައި ރައްޔިތުންގެ މަޖީލީހުގެ ރައީސް ދެއްކެވި ވާހަކަފުޅުގައި އެދެމީހުން ދެއްކި ހިތްވަރަށް ޝުކުރު އަދާކޮށް ހިތްވަރުދެއްވިއެވެ. އެމަނިކުފާނުވަނީ މި ދެއްކި ރީތި ނަމޫނާއަކީ މުޅި ރާއްޖެއަށް ރީތި ނަން ލިބިގެންދިޔަ ކަމެއްގެ ގޮތުގައި ފާހަގަކުރައްވާފައެވެ. އަދި މިގޮތުގައި ޚިދުމަތުގައި ދެމިތިބުމަށް ހިތްވަރުދެއްވިއެވެ.
މި ބައްދަލުކުރެއްވުމުގައި މަޖިލީހުގެ ނާއިބު ރައީސް އީވާ އަބްދުﷲއާއި ބައެއް މެންބަރުން ބައިވެރިވެ ވަޑައިގެންނެވިއެވެ.