އިންޖީނުގޭގައި އަލިފާން ރޯވެ ބޯޑެތި ގެއްލުންތަކެއްވި ތ.ވޭމަނޑޫގެ އާ އިންޖީނުގޭގެ މަސައްކަތް ވަރަށް އަވަހަށް ފަށާނެކަމަށް ފެނަކަ ކޯޕަރޭޝަނުން ވިދާޅުވެއްޖެއެވެ. ތ.ވޭމަޑޫ އިންޖީނުގެ ބޭނުން ނުކުރެވޭވަރަށް ހަލާކުވެފައިވަނީ މިދިޔަ ބުދަ ދުވަހު އެރަށު އިންޖީނުގޭގައި އަލިފާން ރޯވެ ހިނގި ނުރައްކާތެރި ޙާދިސާގައެވެ.
ފެނަކަ ކޯޕަރެޝަނުން ތ.ވޭމަންޑޫގައި ހިންގަމުން އަންނަ އިންޖީނުގެއަކީ މުޅި ރަށަށް ކަރަންޓުގެ ޚިދުމަތް ފޮރުކޮށްދޭ ނިޒާމެވެ. އެރަށަށް ކަރަންޓު ދިނުމަށް ބޭނުންކުރަމުންދާ 3 އިންޖީނާއި އެކަމަށް ބޭނުންކުރާ އެހެނިގެން ވަސީލަތްތަކަށް އަލިފާނުގެ ޙާދިސާގައި ބޮޑެތި ގެއްލުންތަކެއްވެ މުޅިރަށުން ކަރަންޓުގެ ޚިދުމަތް މުޅިން މެދުކެނޑުނެވެ. ބުދަ ދުވަހާއި ބުރާސްފަތި ދުވަހުވެސް ރަށުގެ ރައްޔިތުން ހޭދަކުރީ ކަރަންޓާ ނުލައެވެ.
ނަމަވެސް މި ޙާދިސާއާ ގުޅިގެން ފެނަކައިން ވަނީ އަވަސް ފިޔަވަޅުތަކެއް އަޅާފައެވެ. އެގޮތުން އަލިފާން ނިއްވުމުގެ މަސައްކަތާއި ބޭނުންކުރެވޭގޮތަށް ހުރި ސާމާނު ސަލާމާތްކުރުމާ އަދި ރަށަށް ވީހާވެސް އަވަހަށް ކަރަންޓު ދެވޭނެ ގޮތް ވަނީ ހަމަޖައްސާފައެވެ.
ފެނަކައިން ވިދާޅުވީ މިފަދަ ބޮޑު ހާދިސާއެއްގައި، އެންމެ އަވަހަށް އަލުން ކަރަންޓުގެ ޚިދުމަތް އިއާދަކުރެވުނު ރަށަކީ ވޭމަންޑޫކަމަށެވެ. މިހާދިސާގެ ސަބަބުން ވޭމަންޑޫގައި ބޭނުންކުރަމުން އައި 600 ކިލޯވޮޓާއި، 500 ކިލޯވޮޓާއި، 450 ކިލޯވޮޓުގެ އިންޖީނުވެސް ބޭނުން ނުކުރެވޭވަރަށް ހަލާކުވިއެވެ.
ނަމަވެސް އަވަސް ފިޔަވަޅުތަކާއެކު ޖެހިގެން އައި ދުވަހުގެ ހެނދުނު ފެނަކައިންވަނީ އެ އަތޮޅު ގުރައިދޫގައި އިން 360ކިލޯ ވޮޓްގެ ޖެނެރޭޓަރަކާ، ދިޔަމިގިލިން 250ކިލޯވޮޓްގެ ޖެނެރޭޓަރެއް ވޭމަނޑުއަށް ގެންގޮސްފައެވެ. ފެނަކައިގެ މުވައްޒަފުންނާއި ރަށުގެ ރައްޔިތުންގެ އެހިތެރިކަމާއެކު 2 އިންޖީނު، ރަށުގެ ކަރަންޓުގެ ވިއުގައާ ގުޅާލައި ރަށަށް އަލުން ކަރަންޓު ދިނުމުގެ ޚިދުމަތް ފެށުނީ، 33ގަޑިއިރުފަހުން ޖެހިގެން އައި ދުވަހުގެ ރޭގަނޑު 11:40ހާއިރުއެވެ.
މިވަގުތަށް ވޭމަންޑުއަށް ފޯރުކޮށްދީފައިވަނީ ކަރަންޓުގެ ވަގުތީ ޙައްލެކެވެ. ނަމަވެސް އާ އިންޖީނުގެއެއް ހަދައި ދާއިމީ ޙައްލެއް ހޯދައިދިނުމުގެ މަސައްކަތް ވަރަށް އަވަހަށް ފަށާނެކަމަށް ފެނަކައިން ވިދާޅުވެއެވެ.
މި ޙާދިސާއާ ގުޅިގެން ފެނަކައިގެ މެނޭޖިންގ ޑައިރެކްޓަރ އަޙުމަދު ސަޢީދު މުޙައްމަދާއި އެންވަޔަރަންމަންޓް މިނިސްޓަރ ޑރ.ހުސައިން ރަޝީދު ހަސަނާއި ފެނަކައިގެން ޓީމެއް މާލެއިން އެރަށަށް ގޮސްފައިވެއެވެ.
ފެނަކައިން ވިދާޅުވީ ކުރިއަށް އޮތް ތަނުގައި މިފަދަ ޙާދިސާއެއް ހިނގިޔަ ނުދިނުމަށާއި ދިމާވާ ޙާދިސާތަކުން ލިބޭ ގެއްލުން ކުޑަކުރުމަށް ކުރަންޖެހޭ އެންމެހާ މަސައްކަތްތައް ފެނަކައިން ކުރަމުންގެންދާނެކަމަށެވެ. އަދި ރައްޔިތުންނަށް ފޯރުކޮށްދޭ ޚިދުމަތަކީ ދެމެހެއްޓެނިވިގޮތެއްގައި ރައްކާތެރިކަމާ އިތުބާރާއެކު ފޯރުކޮށްދޭ ޚިދުމަތެއްކަން ކަށަވަރުކުރާނެކަމަށްވެސް އެކޯޕަރޭޝަނުން ވިދާޅުވެއެވެ.