ރަސްމާލެ މެރީނާ: އާމްދަނީއާއި ފައިދާ އެހެން އިންވެސްޓްމަންޓްތަކާއި ނުބައްދަލު

ދިވެހިރާއްޖެއަކީ ދުނިޔޭގެ ނިސްބަތުންވެސް އަޑުހަރު ޤައުމެއް ނަމަވެސް، ބިމުގެ ގޮތުންނާއި އާބާދީގެގޮތުން ކުޑަ ޤައުމެކެވެ. ޖުމްލަ އާބާދީ ބައި މިލިޔަން ކިރިޔާ ހުރަސްކުރާއިރު ޖަޒީރާވަންތަ ރާޢްޖޭގެ އިޤްތިޞާދަށް ބޭނުންވަނީ ލިބޭ އާމްދަނީ އިތުރުކުރެވޭނެ ގޮތެކެވެ.

ޕްރޮޖެކްޓަކީ މަޑުދުވެލީގައި ކުރިއަށް ދުއްވަމުންދާ ދިވެހިންގެ އިޤްތިޞާދުގެ ގިއަރު އެތައް ހަރުފަތަކަށް މައްޗަށް ޖައްސާނެ މަޝްރޫޢެކެވެ. މިދިޔަ މަހުގެ 21 ވަނަ ދުވަހު ސޮއިކުރެވުނު މަޝްރޫޢު އަސާސީ ނަޒަރަކުން ބަލާނަމަ، މިއީ ރިއަލްއެސްޓޭޓް މަޝްރޫޢުއެކެވެ. ރަސްމާލޭގެ 1000 އެއްހައި ހެކްޓަރުގެ ތެރެއިން 500 ހެކްޓަރުގައި ތަރައްޤީކުރާނެ މިމަޝްރޫޢުގައި މިވަގުތު ސޮއިކޮށްފައިވަނީ ކޮމާޝަލް ޓަރމްސް އެގްރީމެންޓް ގައެވެ. ދެން އޮތީ މި އެއްބަސްވެވުނު އަސާސްތަކުގެ މައްޗަށް ދައިމީ އެއްބަސްވުމަކަށް ގޮސް މަސައްކަތް ފެށުމެވެ.

ފަތުރުވެރިކަމުގެ ސިނާޢަތަށް ވުރެ އާމްދަނީ ބޮޑު އިންވެސްޓްމެންޓެއް

ރަސްމާލޭގައި "މޯލްޑިވްސް ވޯޓަރފްރަންޓް އެންޑް މެރީނާ" ތަރައްޤީކުރަން އެކުވެރި އަރަބި އިމާރާތުގެ އީގަލް ހިލްސް ހަވާލުވި ވާހަކަ އަޑުއިވުނު އިރު އެންމެ ފުރަތަމަ ނޫސްތަކުގެ ފަލަ ސުރުޙީއަށް އެރީ، 20 ބިލިޔަން ޑޮލަރެއްގެ ވާހަކައެކެވެ. މިއީ އެކުންފުނިން މިމަޝްރޫޢުއަށް ކުރާނެ ހޭދަ ނުވަތަ ދިވެހިރާއްޖެއަށް ވަންނާނެ ބޭރުފައިސާގެ އަދަދެވެ. ނަމަވެސް މުޅި މަޝްރޫޢުއަށް މަސައްކަތްތައް 10 އަހަރު ތެރޭ ނިމިގެންދާއިރު މި އަދަދު 31 ބިލިޔަން ޑޮލަރަށްވުރެ މައްޗަށް އަރާނެ ކަމަށް، އެކުންފުނިން ލާފަކުރެއެވެ. އެއީ އެކުންފުނީގެ ސީދާ އިންވެސްޓްމެންޓާއި ވިއްކާ ތަންތަނަށް އިންވެސްޓްމެންޓްތައް ލައިގެންނެވެ.

ދައުލަތަށް މިމަޝްރޫޢުގެ ތެރެއިން ލިބޭ އާމްދަނީއަށް އެކަނި ބެލިނަމަވެސް މަޝްރޫޢުގެ ފައިދާ ފެނިގެންދެއެވެ. މަޝްރުޢޫ ނިމުމުން އަހަރެއްގެ ތެރޭގައި 1 މިލިޔަން ފަތުރުވެރިން ރާއްޖެ ޒިޔާރަތް ކުރާނެ ކަމަށް ލަފާކުރެވެއެވެ. ހަމައެކަނި މިމަޝްރޫޢުން ފަތުރުވެރިކަމަށް ލިބޭ އާމްދަނީ 2 ބިލިޔަން ޑޮލަރަށް ވުރެ އިތުރުވާނެ ކަމަށް، ލަފާކުރެވެއެވެ. އަދި މަޝްރޫޢުގެ މަސައްކަތް ކުރިއަށްދާ މުއްދަތުގައި އާމްދަނީގެ ގޮތުގައި 11 ބިލިޔަން ޑޮލަރު ލިބޭނެ ކަމަށް ލަފާކުރެވެއެވެ.

މިއީ ރާއްޖޭގެ ފަތުރުވެރިކަމުގެ ސިނާޢަތަށް މިހާތަނަށް ކުރެވިފައިވާ އިންވެސްޓްމަންޓާއި އަޅާކިޔާނަމަ އެތައް ގުނަ ބޮޑު އިންވެސްޓްމެންޓެކެވެ. އިޤްތިޞާދު ސިންދަފާތުވުމަށް އެޅިގެންދިޔަ މުހިންމު ފިޔަވަޅެކެވެ.

މަޝްރުޢުގެ ހުރިހާ މަރުހަލާއެއްގައިވެސް ދިވެހިންނަށް ފައިދާ

އެހެން މަޝްރޫޢުތަކާއި ހިލާފަށް މި މަޝްރޫޢޫގެ ތެރެއިން ކަށަވަރުކުރެވޭ އެއް ކަމަކީ މި އަދަދު ދައުރުވާނީ ދިވެހިރާއްޖޭގެ ބޭންކިން ނިޒާމުގެ ތެރެއިން ކަމެވެ. ބޭރުގެ ބައެއް މަޝްރޫޢުތައް ކުރިއަށް ގެންދާ އުސޫލަށް ބަލާއިރު، އެކުންފުންޏެއްގެ ބޭރުގައި ޤާއިމްކޮށްފައިވާ އެކައުންޓަކުން އެެކުންފުނިން ކުރާ ޚަރަދަށްވާ ފައިސާ ރާއްޖޭގެ މާލީ ނިޒާމުން ބޭރުން ހަމަޖައްސާލައެވެ. މިކަމުގެ ސަބަބުން ބޭންކިން ނިޒާމުގައި ބޭރުފައިސާ ދައުރުނުވެ، ބޭރުފައިސާގެ ތާށިކަމަށް ބާރުދެއެވެ. މީގެ އިތުރުން މި މަޝްރޫޢުގެ ދަށުން ވިއްކާ ނުވަތަ ކުއްޔަށްދޭ ތަންތަނަށް ލިބޭ ހުރިހާ ފައިސާއެއް ބަހައްޓަންޖެހެނީ ދިވެހިރާއްޖޭގެ ބޭންކުތަކުގައި ހުޅުވާ އެސްކްރޯ އެކައުންޓްތަކުގައެވެ. މިއީވެސް ދިވެހި މާލީ ނިޒާމަށް ބައިނަލްއަޤްވާމީ އިންވެސްޓަރުންގެ އިތުބާރު ޤާއިމްކުރަން އެޅޭނެ ފިޔަވަޅެކެވެ.

ބިޔަ އިންވެސްޓްމެންޓަކާއި އެކު އެންމެ ފުރަތަމަވެސް ކޮންމެ ފަރާތަކުން އަހާލާނީ މީގެ ފައިދާއެވެ. މިމަޝްރޫޢު ކުރިއަށް ގެންދާއިރު، އެޑްވާންސް ނުވަތަ އެކުއިޒިޝަން ފީގެ ގޮތުގައި 500 މިލިޔަން ޑޮލަރު ނުވަތަ 7.7 ބިލިޔަން ރުފިޔާ އީގަލް ހިލްސް ކުންފުނިން ހޭދަކުރާނެއެވެ. ނަގުދު ފައިސާގެ ބަދަލުގައި އެކުންފުނިން 3 ކޮޓަރީގެ 5000 ހައުސިން ޔުނިޓް ހުޅުމާލޭގައި ތަރައްޤީކޮށްދޭން ވަނީ ހަމަޖެހިފައެވެ. މީގެ އެންމެ މުހިންމު ކަމަކީ ދައުލަތަށް އިތުރު ދަރަންޏެއް ނުނަގާ ބޯހިޔާވަހިކަމުގެ ބިޔަ މަޝްރޫޢުއެއް ކުރިއަށް ގެންދެވުމެވެ.

ރަސްމާލެ "މޯލްޑިވްސް ވޯޓަރފްރަންޓް" އިން ވިއްކާ ނުވަތަ ކުއްޔަށްދޭ ކޮންމެ ތަނެއްގެ ފުރަތަމަ މުޢާމަލާތުން ދައުލަތަށް %10 ގެ އާމްދަނީއެއް ލިބޭނެއެވެ. ހުޅުމާލޭގައި އަޅާ 500 މިލިޔަން ޑޮލަރުގެ ފްލެޓްތަކަކީ މި %10 ގެ ޙިއްޞާއިން ކަނޑައިގެން، ދިވެހިންނަށް އަވަހަށް މަންފާ ހޯދައިދިނުމަށް އެއްބަސްވެފައިވާ އެޑްވާންސެކެވެ.

މީގެ އިތުރުން، ޕްރޮޕަޓީ ފުރަތަމަ ފަހަރަށް ވިއްކާއިރުވެސް، އަދި އޭގެ ފަހުން މިލްކުވެރިކަން ބަދަލުކުރާ ކޮންމެ ފަހަރަކުވެސް ޕްރޮޕަޓީގެ އަގުގެ %4 ދައުލަތަށް ލިބޭނެއެވެ. ކޮންމެ ވިއްކުމެއް އަދި ބަދަލުކުރުމެއްވެސް ކުރިއަށްދާނީ ސަރުކާރުގެ ހުއްދައާއެކުގައެވެ. މިއީ ދައުލަތަށް ދާއިމީގޮތެއްގައި އާމްދަނީ ކަށަވަރުވެގެންދާނެ ނިޒާމެކެވެ.

މިފަދަ ބިޔަ މަޝްރޫޢުއަށް އަންނައިރު ވަރަށް ގިނަ ފަހަރަށް ޓެކްސްގެ ލުއިތަކާއި އަދި އެނޫންވެސް ލުއިތައް، ޑީމާންޑް އިންވެސްޓަރުންގެ ފުށުން ހުށަހަޅައެވެ. ނަމަވެސް މިމަޝްޜޫޢުއަށް ސަރުކާރާއި އީގަލް ހިލްސްއާއި ދެމެދު ކުރެވުނު މަޝްވަރާތަކުން އެއްވެސް ޓެކްސްގެ ލުއިއެއް އަދި މަޝްރޫޢުގެ ކުރިއަށްގެންދަން ޑިއުޓީ މަޢާފްވެސް ކޮށްނުދޭނެއެވެ. މާނައަކީ މަޝްރުޢޫގެ ތަރައްޤީއަށް ބޭނުންވާ ހުރިހާ ކަމެއް ރާއްޖޭގެ މާލީ ނިޒާމުގެ ތެރެއިން ކުރެވި، ދިވެހި ދައުލަތައް އާމްދަނީ ލިބެން އޮތް ހުރިހާ ގޮތަކުން މަންފާ ލިބޭނެކަން ކަށަވަރު ވެގެން ދިއުމެވެ. މިފަދަ ބިޔަ މަޝްރޫޢުއެއް އަންނައިރު މިއީ ރާއްޖެ ފަދަ ކުޑަ ޤައުމަކަށް ހާސިލްކުރެވުނު ބޮޑު ކާމިޔާބީއެއް ކަމަށް ބެލުމުގެ ފުރުސަތު ހުރިހާ ގޮތަކުންވެސް އެބައޮތެވެ.