އިންގްލިޝް ޕްރިމިއަރ ލީގުގައި ވެސްޓް ހޭމް ޔުނައިޓެޑާއި ޓޮޓްނަމް ހޮޓްސްޕަރ ބައްދަލުކުރިމެޗް ވެސްޓް ހޭމް ކާމިޔާބުކޮށް ޕޮއިންޓް ތާވަލްގެ ހަތަރުވަނައަށް ކުރިއަށް ޖެހިލައިފިއެވެ. ވެސްޓް ހޭމްގެ ދަނޑުގައި ކުޅުނު މިމެޗް އެޓީމް ކާމިޔާބުކުރީ 2 ލަނޑު އެއްލަނޑުންނެވެ.
ފޯރިގަދަ ކުޅުމެއް ދެޓީމްގެ ފަރާތުންވެސް ފެނިގެންދިޔަ މިމެޗްގައި ވެސްޓް ހޭމްގެ ފުރަތަމަ ލަނޑު މެޗްގެ 5 ވަނަ މިނެޓްގައި ޖަހާދިނީ މިކައިލް އެންޓޯނިއޯއެވެ. އަދި އެޓީމްގެ ދެވަނަ ލަނޑު މެޗްގެ 47 ވަނަ މިނެޓްގައި ޖަހައިދިނީ ޖެސީ ލިންގާރޑްއެވެ. މިއީ ވެސްޓް ހޭމްއަށް އޭނާ ކާމިޔާބުކޮށްދިން ތިންވަނަ ލަނޑެވެ. މިލަނޑު އެންމެ ފުރަތަމަ އޮފް ސައިޑް ލަނޑަކަށް ދެއްކި ނަމަވެސް ވީއޭއާރު ބެލުމަށްފަހު ރެފްރީ ވަނީ މިއީ ރަނގަޅު ލަނޑެއްކަމަށް ނިންމާފައެވެ. މިމެޗްގެ ދެވަނަ ހާފްގައި ޓޮޓްނަމުން އެޓީމުގެ ކުޅުން ރަނގަޅުކޮށް ވެސްޓް ހޭމްގެ ގޯލަށް ނުރައްކާ ކުރިއެވެ. މިގޮތުން މެޗްގެ 64 ވަނަ މިނެޓްގައި ގެރެތު ބެއިލް ތަނަވަސްކޮށްދިން ފުރުސަތެއްގައި ލޫކަސް މޮއުރާވަނީ ލަނޑެއް ޖަހާފައެވެ. މީގެއިތުރުން ބެއިލް އާއި ސޮން ހެއުންގ މިން ފޮނުވާލި ދެހަމަލާއެއް ވަނީ ގޯލް ދަނޑިއަށް އަމާޒުވެފައެވެ.
މެޗަށްފަހު ވާހަކަ ދައްކަމުން ވެސްޓް ހޭމްގެ ކޯޗް ޑޭވިޑް މޮއިސް ހާމަކުރިގޮތުގައި ނަތީޖާއާމެދު ހިތްހަމަޖެހޭ ކަމަށާއި ނަމަވެސް އޭނާގެ ކުޅުންތެރިންނަށް މިއަށްވުރެވެސް ރަނގަޅަށް ކުޅެވޭނެކަމަށެވެ. އަދި ކުޅުންތެރިންވަނީ އެމީހުންގެ މަސައްކަތް ވަރަށް ފުރިހަމައަށް ކޮށްފައިކަމަށާއި ނަސީބަކީވެސް މިކަހަލަ މެޗްތަކުގައި ވަރަށް މުހިންމު އެއްޗެއް ކަމަށެވެ.
މިމެޗުން މޮޅުވުމުން ވެސްޓް ހޭމް މިވަނީ ކުޅުނު 25 މެޗުން ލިބިފައިވާ 45 ޕޮއިންޓާއެކު ތާވަލްގެ ހަތަރުވަނައަށް ކުރިއަށް ޖެހިލާފައެވެ. އަދި ޓޮޓްނަމް އުޅެނީ ކުޅުނު 24 މެޗުން ލިބިފައިވާ 36 ޕޮއިންޓާއެކު ތާވަލްގެ 9 ވަނައިގައެވެ.