ދުނިޔޭގެ ބާރުތަކުން އީރާނާއިއެކު ވެފައިވާ ނިއުކްލިޔަރ އެއްބަސްވުމުގައި އެމެރިކާއިން އަލުން ބައިވެރިވުމާއި އެއްބަސްވުމާއި އެއްގޮތަށް އީރާނުން އަމަލުކުރުމާއި ގުޅޭ މަޝްވަރާތައް ކުރުމަށް ތައްޔާރަށް އޮތްކަމަށް އެމެރިކާއިން ބުނެފިއެވެ.
2015ވަނަ އަހަރުގައި ދުނިޔޭގެ ބާރުތަކާއިއެކު އީރާނުން ވެފައިވާ " ޖޮއިންޓް ކޮމްޕްރިހެންސިވް ޕްލޭން އޮފް އެކްޝަން"ގެ ދަށުން އީރާނުގެ ނިއުކުލިޔަރ މަސައްކަތްތައް މަދުކުރުމުގެ ބަދަލެއްގެ ގޮތުން އެ ޤައުމާއި ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލުމަށްވަނީ އެއްބަސްވެފައެވެ. އެ އެއްބަސްވުމުގައި އެމެރިކާ، އިނގިރޭސިވިލާތް، ރަޝިޔާ، ޖަރުމަނުވިލާތް، ފަރަންސޭސިވިލާތް، ވިލާތުގެ އިއްތިޙާދު އަދި ޗައިނާއިން ވަނީ ބައިވެރިވެފައެވެ. ނަމަވެސް 2018ވަނަ އަހަރުގެ ތެރޭގައި އެމެރިކާގެ ވެރިކަމާއި ރައީސް ޑޮނަލްޑް ޓްރަމްޕު ޙަވާލުވެވަޑައިގަތުމަށްފަހު އެމެރިކާއިންވަނީ އެ އެއްބަސްވުމުން ވަކިވެ، އީރާނާއި ދެކޮޅަށް ދަތިކުރުމުގެ ގިނަ ފިޔަވަޅުތަކެއް އަޅާފައެވެ. އޭގެ ސަބަބުން އީރާނުންވަނީ އެއްބަސްވުމާއި ޚިލާފަށް ބައެއް ކަންތައްތައް ކުރަން ފަށައިފައެވެ.
އެމެރިކާގެ އައު ސަރުކާރުން ބުނަމުންދަނީ އީރާނުން ނިއުކުލިއާ އެއްބަސްވުމާއި އެއްގޮތަށް އަމަލުކުރުމަށް ރުޖޫޢަވެއްޖެނަމަ އެމެރިކާއިން އެއްބަސްވުމުގައި އަލުން ބައިވެރިވާނެކަމަށެވެ. އެމެރިކާގެ ސެކެޓްރީ އޮފް ސްޓޭޓް އެންތޮނީ ބްލިންކެންވެސްދަނީ ހަމަ އެ މޭރުމުން ވާހަކަދައްކަވަމުންނެވެ. އީ3ގެ ޤައުމުތަކުގެ ގޮތުގައި ހިމެނޭ އިނގިރޭސިވިލާތާއި ފަރަންސޭސިވިލާތާއި ޖަރުމަނުވިލާތުގެ ޚާރިޖީ ވަޒީރުންނާއިއެކު ބްލިންކެން ބޭއްވެވި ބައްދަލުވުމެއްގައިވެސް އެނާ ވަނީ އެވާހަކަތައް ތަކުރާރު ކުރައްވާފައެވެ. އެ ބައްދަލުވުމަށްފަހު ހަތަރު ޤައުމުން އެކުގައި ނެރުނު ބަޔާނެއްގައި ބުނީ އެއްބަސްވުމާއި އެއްގޮތަށް އީރާނުން އަމަލުކުރާނަމަ އެމެރިކާއިންވެސް އެގޮތަށް އަމަލުކޮށް، އެއްބަސްވުމާއި ގުޅޭ ގޮތުން މަޝްވަރާކުރަން ތައްޔާރަށް އޮތްކަމަށެވެ.
ނަމަވެސް އީރާނުން ބުނަމުންދަނީ އީރާނުން އެއްބަސްވުމާއި އެއްގޮތަށް އަމަލުކުރާނީ އެ ޤައުމާއި ދެކޮޅަށް އެމެރިކާއިން އަޅާފައިވާ ދަތިކުރުމުގެ ފިޔަވަޅުތަކަށް ލުއި ދިނުމުންކަމަށާއި ފުރަތަމަ ފިޔަވަޅު އަޅަންޖެހޭނީ އެމެރިކާއިންކަމަށެވެ. އީރާނުގެ ޚާރިޖީ ވަޒީރު މުޙައްމަދު ޖަވާދު ޒާރިފް ވިދާޅުވީ ނިއުކުލިއާ އެއްބަސް ދެމެހެއްޓުމުގެ ޒިންމާ އީރާނުގެ ބޮލުގައި އެޅުވުމުގެ ބަދަލުގައި އީ3ގެ ޤައުމުތަކާއި ވިލާތުގެ އިއްތިޙާދުން އެ ޤައުމުތަކުން އެއްބަސްވެފައިވާ ގޮތަށް ޢަމަލުކުރަންޖެހޭކަމަށެވެ. އަދި އެމެރިކާގެ ކުރީގެ ރައީސް ޑޮނަލްޑް ޓްރަންޕު އީރާނާއި މެދު ގެންގުޅުއްވި "އިޤްތިޞާދީ ނިރުބަވެރި"ކަމުގެ ސިޔާސަތު ނިމުމަކަށް ގެންނަންޖެހޭކަމަށްވެސް އީރާނުގެ ޚާރިޖީ ވަޒީރު މުޙައްމަދު ޖަވާދު ޒާރިފް ވިދާޅުވިއެވެ.
އީރާނާއި ދެކޮޅަށް އެމެރިކާއިން އަޅާފައިވާ ދަތިކުރުމުގެ ފިޔަވަޅުތައް އުވާލުމަށް އީރާނުންވަނީ އެމެރިކާއަށް އަންނަ ހަފުތާއާއި ނިޔަލަށް ވަގުތު ދީފައެވެ. އީރާނުންވަނީ އެ ޤައުމުން ކަނޑައަޅާފައިވާ ތާރީޚުގެ ކުރިން އެމެރިކާއިން އަޅާފައިވާ ދަތިކުރުމުގެ ފިޔަވަޅުތައް އުވާލުމުގެ މަސައްކަތް އެމެރިކާއިން ނުފަށައިފިނަމަ އެއްބަސްވުމާއި ޚިލާފަށް އެ ޤައުމުން ބޮޑު ފިޔަވަޅެއް އަޅާނެކަމަށެވެ. އެއީ ދުރާލާ އެންގުމަކާއި ނުލާ އދގެ އިންޓަނޭޝަނަލް އެޓޮމިކް އެނާޖީ އޭޖެންސީ، އައިއޭއީއޭއަށް އީރާނުގެ ނިއުކުލިއާ ސައިޓުތައް ފާސްކުރުމުގެ ޙުއްދަ ދިނުން ހުއްޓާލުމެވެ. އިނގިރޭސިވިލާތާއި ފަރަންސޭސިވިލާތާއި ޖަރުމަނުވިލާތް އަދި އެމެރިކާއިންވަނީ އެފަދަ ފިޔަވަޅެއް ނޭޅުމަށް އީރާނަށް ގޮވައިލައިފައެވެ.