އިންޑިއާގެ ޚާރިޖީ ވަޒީރު ރާއްޖެއަށް ކުރައްވާ ދަތުރުފުޅާއި ގުޅިގެން މާދަމާއާއި އާދިއްތަދުވަހު މާލޭގެ ގިނަ ސަރަޙައްދުތަކެއްގައި އުޅަނދުތަކުގައާއި ހިނގާފައި އުޅުން މަނާވާނެކަމަށް ފުލުހުން ވިދާޅުވެއްޖެއެވެ.
ފުލުހުން ވިދާޅުވީ އިންޑިއާގެ ޚާރިޖީ ވަޒީރު ޑރ.ސުބްރަމާނިއަމް ޖައިޝަންކަރް ރާއްޖެއަށް ކުރައްވާ ދަތުރުފުޅާއި ގުޅިގެން މާދަމާގެ ބައެއް ވަގުތުތަކުގައި ބްރިޖުން ފެށިގެން ކަޅުތުއްކަލާކޮށްޓާއި ހަމައަށް އަދި ބްރިޖުން ފެށިގެން ހުޅަނގަށް ޖުމްހޫރީ މައިދާނާ ހަމައަށް މާލޭގެ ބޭރު މަގު ބަންދުވާނެއެވެ. އަދި މިމަގުތަކާއި ގުޅިފައިވާ ގޯޅިތައްވެސް ބަންދުވާނެކަމަށް ފުލުހުން ވިދާޅުވެއެވެ.
މި ސަރަޙައްދު ބަންދުކުރާނީ މާދަމާ މެންފުރުފަހު 2:00 އިން ހަރަކާތްތައް ނިމެންދެންކަމަށް ފުލުހުން ވިދާޅުވެއެވެ. އަދި މާދަމާގެ މެންދުރު 12:00ގެ ކުރިން، ކާނިވާ ސަރަޙައްދާއި ޖުމްހޫރީ މައިދާނާ ދެމެދުގެ ސަރަޙައްދުގައި ޕާކުކޮށްފައި ހުރި އުޅަނދުތައް ނެގުމަށްވެސް ފުލުހުން ވިދާޅުވެއެވެ.
ޚާއްޞަ އިވެންޓަކާ ގުޅިގެން، ޗާޓުގައި ފާހަގަ ކޮށްފައިވާ ސަރަޙައްދުތައް 2021 ފެބުރުވަރީ 21 ވަނަ ދުވަހުގެ 07:00 އިން ފެށިގެން އިވެންޓް ނިމެންދެން ޢާންމު ދަތުރުފަތުރަށާއި ހިނގާބިނގާވެ އުޅޭ މީހުންނަށް ބަންދު ކުރެވޭނެވާހަކަ ދަންނަވަމެވެ. pic.twitter.com/lQy3k9JU8Q
— Maldives Police (@PoliceMv) February 19, 2021
ފުލުހުން ވިދާޅުވީ އާދިއްތަ ދުވަހުވެސް މާލޭގެ ގިނަ ސަރަޙައްދުތަކެއް ހިނގާ މީހުންނާއި ދުއްވާ އުޅަނދުތަކަށް ބަންދުވާނެކަމަށެވެ. އެގޮތުން ބޮޑުތަކުރުފާނު މަގުގެ ފަތާ ޓްރެކް ސަރަޙައްދުން ފެށިގެން ޖުމްހޫރީ މައިދާނާ ހަމައަށް ބަންދުކުރާއިރު އެމަގާ ގުޅިގައިވާ ގޯޅިތަކާއި ރައްޔިތުންގެ މަޖިލިސް ހިމެނޭ ސަރަޙައްދުވެސް ބަންދުކުރުމަށް ވަނީ ހަމަޖެހިފައެވެ.
އާދިއްތަ ދުވަހު ބަންދުކުރާ ސަރަޙައްދުތައް ބަންދުވާނީ ހެނދުނު 7:00 އިން ފެށިގެން ހަރަކާތްތައް ނިމެންދެންކަމަށް ފުލުހުން ވިދާޅުވެއެވެ. އަދި މާދަމާރޭ 12:00ގެ ފަހުން ކާނިވާ ސަރަޙައްދާއި ޖުމްހޫރީ މައިދާނާ ދެމެދުގެ ސަރަޙައްދުގައި އުޅަނދު ޕާކު ނުކުރުމަށާއި އަދި ޕާކުކޮށްފައިވާ އުޅަނދުތައް އެސަރަޙައްދުން ނެގުމަށްވެސް ފުލުުހުން ވަނީ އަންގާފައެވެ.