އެން.ބީ.އޭ. ބާސްކެޓްބޯޅަ މުބާރާތުގައި ޔޫޓާ ޖޭޒް އާއި ލޮސް އެންޖަލިސް ލޭކަރސް ބައްދަލުކުރިމެޗް ޖޭޒް ކާމިޔާބުކޮށްފިއެވެ. މިމެޗް ޖޭޒް ކާމިޔާބުކުރީ 114 ޕޮއިންޓް 96 ޕޮއިންޓުންނެވެ.
ވާދަވެރި ކުޅުމެއް ފެނިގެންދިޔަ މިމެޗްގައި ޖޭޒްއަށް އެންމެ ރަނގަޅު ކުޅުމެއް ދެއްކީ 24 ޕޮއިންޓް ހޯދައިދިން ޑޮނޮވަން މިޝޭލްއެވެ. އަދި ރޫޑީ ގޮބަރޓްވަނީ އެޓީމަށް 23 ޕޮއިންޓް ހޯދައިދީފައެވެ. މިމެޗްގައި ކްލިޕަރސްއަށް އެންމެ ރަނގަޅު ކުޅުމެއް ދެއްކީ 16 ޕޮއިންޓް އެޓީމަށް ހޯދައިދިން ލޮއު ވިލިއަމްސްއެވެ.
މިމުބާރާތުގައި ފިލަޑެލްފިއާ ސެވަންޓީ ސިކްސަރސްއާއި ހިއުސްޓަން ރޮކެޓްސް ބައްދަލުކުރިމެޗް 118 ޕޮއިންޓް 113 ޕޮއިންޓުން ކާމިޔާބުކުރީ ސިކްސަރސްއެވެ. މިމެޗްގައި ސިކްސަރސްގެ ޖޮއެލް އެމްބިޑްވަނީ އެޓީމަށް 31 ޕޮއިންޓް ހޯދައިދީ 11 ރީބައުންޑް ނަގާ 9 އެސިސްޓް ކޮށްފައެވެ. އަދި ރޮކެޓްސްއަށް އެންމެ ރަނގަޅު ކުޅުމެއް ދެއްކީ 28 ޕޮއިންޓް އެޓީމަށް ހޯދައިދިން ޖޯން ވޯލްއެވެ. މީގެއިތުރުން ގޯލްޑަން ސްޓޭޓް ވޮރިއަރސް އާއި މައޭމީ ހީޓް ބައްދަލުކުރިމެޗް 120 ޕޮއިންޓް 112 ޕޮއިންޓުން ކާމިޔާބުކުރީ ވޮރިއަރސްއެވެ. މިމެޗްގައި ވޮރިއަރސްގެ ސްޓެފަން ކަރީވަނީ އެޓީމަށް 25 ޕޮއިންޓް ހޯދައިދީ 11 އެސިސްޓް ކޮށްފައެވެ. އަދި ހީޓްއަށް ބަލާލާއިރު ޖިމީ ބަޓްލަރވަނީ އެޓީމަށް 13 ޕޮއިންޓް ހޯދައިދީ 12 ރީބައުންޑް ނަގާ 11 އެސިސްޓް ކޮށްފައެވެ.
މިމުބާރާތުގައި ކުޅުނު އެހެން މެޗްތަކަށް ބަލާލާއިރު މެމްފިސް ގްރިޒްލީސް އާއި އޮކްލޮހޯމާ ސިޓީ ތަންޑަރ ބައްދަލުކުރިމެޗް 122 ޕޮއިންޓް 113 ޕޮއިންޓުން ގްރިޒްލީސް ކާމިޔާބުކުރިއިރު ޕޯޓްލަންޑް ޓްރެއިލް ބްލޭޒަރސް އާއި ނިއުއޯލިއަންސް ޕެލިކަންސް ބައްދަލުކުރިމެޗް 126 ޕޮއިންޓް 124 ޕޮއިންޓުން ކާމިޔާބުކުރީ ޓްރެއިލް ބްލޭޒަރސްއެވެ. ޝިކާގޯ ބުލްސް އާއި ޑެޓްރޮއިޓް ޕިސްޓަންސް ބައްދަލުކުރިމެޗް 105 ޕޮއިންޓް 102 ޕޮއިންޓުން ބުލްސް ކާމިޔާބުކުރިއިރު އިންޑިއާނާ ޕޭސަރސް އާއި މިނެސޯޓާ ޓިމްބަރވުލްވްސް ބައްދަލުކުރިމެޗް 134 ޕޮއިންޓް 128 ޕޮއިންޓުން ކާމިޔާބުކުރީ ޕޭސަރސްއެވެ.