އެމެރިކާގެ ދެކުނުގެ ސަރަޙައްދުތަކަށް ފިނީގެ ތޫފާނެއް އަރާ 21 މީހުން މަރުވެ، ގިނަ ސަރަޙައްދުތަކަކުން ކަރަންޓު ކެނޑިއްޖެއެވެ.
ފިނިމޫސުމުގައި އާންމުކޮށް ފިނިނުވާ މިންވަރަށް އެމެރިކާގެ ސްޓޭޓުތަަކަށް މި އަހަރުދަނީ ފިނިވަމުންނެވެ. އެގޮތުން އެޤައުމުގެ ޓެކްސަސް ސްޓޭޓުގެ ފިނިހޫނުމިން ވަނީ ފާއިތުވި 30 އަހަރު ދުވަހުގެ ތެރޭގައި ދަށަށް ނުދާ މިންވަރަށް ދަށްވެފައެވެ. އެ ސްޓޭޓުގެ ބައެއް ސަރަޙައްދުތަކުގެ ފިނިހޫނުމިން ހުރީ 0 ފެރެންހެއިޓު ނުވަތަ މައިނަސް 18 ޑިގްރީ ސެލްސިއަސްގައެވެ. އެމެރިކާގެ ރައީސް ޖޯ ބައިޑަން މިހާރުވަނީ އެ ސްޓޭޓުގައި ކުއްލި ޙާލަތު އިޢުލާނުކުރުމުގެ ޙުއްދަ ދެއްވާފައެވެ.
ޓެކްސަސް ސްޓޭޓުގެ ކަރަންޓުގެ ޚިދުމަތްދޭ ގުރިޑުތަކަށް ބާރުބޮޑުވެ އެކި ސަރަޙައްދުތަކުންދަނީ އިރުއިރުކޮޅާ ކަރަންޓުގެ ޚިދުމަތް ކެނޑެމުންނެވެ. އޭގެ ސަބަބުން ފިނި މޫސުމުގެ މި ޙާލަތުގައި ޓެކްސަސްގެ 4 މިލިއަން މީހުން ތިބީ ކަރަންޓުގެ ޚިދުމަތް ނުލިބިއެވެ.
ޓެކްސަސްގެ ގެތަކަކީ އާންމުކޮށް ފިނި މޫސުމަށް އިންސިއުލޭޓުކޮށްފައި ހުންނަ ގޭގެކަމުގައި ނުވާތީ ކަރަންޓު ކެނޑި ގޭތެރެ ހޫނުކޮށް ބަހައްޓައިދޭ ހީޓިން ސިސްޓަމް މަސައްކަތްނުކުރުމުން ގޭގެ އެތެރޭގެ ފިނިހޫނުމިން ދަނީ ނުރައްކާތެރި މިންވަރަށް ވެއްޓެމުންނެވެ. އަދި ފިނީގެ ސަބަބުން ގޭގެއަށް އަޅާފައިވާ ހޮޅި ލައިނުތައް ފަޅައިގެން ދިޔުންފަދަ ހާދިޘާތައްވެސް ދަނީ ހިންގަމުންނެވެ. އޭގެ ސަބަބުން ފެން ލިބުމުގެ ދަތިތައްވެސްދަނީ ދިމާވަމުންނެވެ. އޭގެ އިތުރުން މަގުތަކުގައި އައިސް ޖެހުމުގެ ސަބަބުން ދުއްވާ އެއްޗެއްސަށް ނުރައްކާ ބޮޑުވެ، އެކްސިޑަންޓުތައް ހިންގާ މިންވަރުވެސްވަނީ އިތުރުވެފައެވެ.
ފިނީގެ ތޫފާނުގެ ސަބަބުން ޓެކްސަސް، ލޫސިއާނާ، ކެންޓަކީ، ނޯތު ނެރޮލިނާ އަދި މިސޫރީގައި މީހުންވަނީ މަރުވެފައެވެ. އޭގެ ތެރޭގައި ޓްރެފިކް އެކްސިޑެންޓުތަކުގައި މަރުވި މީހުންނާއި، ގޭތެރެ ހޫނުކުރުމަށް ކާރާއި ޖެނެރޭޓަރު ޖެއްސުމުގެ ސަބަބުން ކާބޮންމޮނޮކްސައިޑުން ވިހަވި މީހުން ހިމެނެއެވެ. އަދި ގޭތެރޭގައި އުއްބަތި ބޭނުންކުރުމުގެ ސަބަބުން ދިމާވިކަމަށް ބެލެވޭ އަލިފާނުގެ ހާދިޘާތަކުގައި މަރުވެފައިވާ މީހުންނާއި ފިނިބޮޑުވުމުގެ ސަބަބުން މަރުވެފައިވާ މީހުންވެސް އޭގެ ތެރޭގައި ހިމެނެއެވެ.
އެމެރިކާގެ ނޭޝަނަލް ވެދާ ސާވިސް (އެންޑަބްލިއުއެސް)އިން ބުނީ ފިނިމޫސުމުގެ ސަބަބުން ކުރިމަތިވާ ތޫފާނަށް 150 މިލިއަނަށްވުރެ ގިނަ މީހުން ހުށަހެޅިފައިވާކަމަށެވެ. އެންޑަބްލިއުއެސްއިން ބުނީ އެމެރިކާގެ 73 އިންސައްތައަށް މިހާރު އޮތީ ސްނޯ ފައިބާފައިކަމަށެވެ.
އެމެރިކާއަށް އަރާފައިވާ ފިނީގެ ތޫފާން މިހާރުވަނީ މެކްސިކޯގެ އުތުރާއި މެދުތެރޭ ސަރަޙައްދުތަކަށްވެސް ފޯރާފައެވެ. އެ ޤައުމުގައިވެސް އެތައް މިލިއަން މީހުން ތިބީ ކަރަންޓުގެ ޚިދުމަތް ނުލިބިއެވެ.
ސައިންސުވެރިންވަނީ މޫސުމީ ބަދަލުތަކުގެ ސަބަބުން ދުނިޔޭގެ އެކި ސަރަޙައްދުތަކަށް ބޮޑެތި މޫސުމީ ކާރިޘާތައް މެދުވެރިވަމުންދަކަން ފާހަގަކުރަމުންނެވެ.