އިނގިރޭސި އެފްއޭ ކަޕްގެ ކްއާޓަރ ފައިނަލުން ސަދެމްޓަން ޖާގަހޯދައިފިއެވެ. މިމުބާރާތުގެ ކްއާޓަރ ފައިނަލުން ސަދެމްޓަން ޖާގަހޯދީ ފަސްވަނަ ބުރުގައި ވުލްވަރހެމްޓަން ވޮންޑަރަރސްއާއި ބައްދަލުކުރިމެޗް 2 ލަނޑު ސުންލަނޑުން ކާމިޔާބުކޮށްގެންނެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނަ ހަމަލާ އުފައްދާފައިވަނީ ސަދެމްޓަނުންނެވެ. މިގޮތުން މެޗްގެ ފުރަތަމަ ހާފްގައި ޑެނީ އިންގްސް އާއި ސްޓުއަޓް އާމްސްޓްރޯންގ އަދި މޫސާ ޖެނެޕޯ ލަނޑެއް ޖެހުމާއި ގާތަށް ދިޔައެވެ. މިމެޗްގައި ސަދެމްޓަންގެ ފުރަތަމަ ލަނޑު މެޗްގެ 49 ވަނަ މިނެޓްގައި ޖަހައިދިނީ ޑެނީ އިންގްސްއެވެ. އަދި އެޓީމްގެ ދެވަނަ ލަނޑު މެޗްގެ ފަހު މިނެޓްގައި ޖަހައިދިނީ އާމްސްޓްރޯންގއެވެ. މިއީ ހަތަރު މެޗުން ބަލިވުމަށްފަހު ސަދެމްޓަން މޮޅުވި ފުރަތަމަ މެޗެވެ.
މެޗަށްފަހު ވާހަކަ ދައްކަމުން ސަދެމްޓަންގެ ކޯޗް ރަލްފް ހާސެންހޫޓްލް ބުނީ އޭނާގެ ޓީމުން މިމެޗްގައި ދެއްކި ކުޅުމަށް ބަލައި މިއީ މޮޅުވުން ހައްގު މެޗެއް ކަމަށެވެ. އަދި މިހާރު އޭނާގެ ޓީމުން ބޭނުންވަނީ މިފަހަރުގެ އެފްއޭ ކަޕް ކާމިޔާބުކުރެވޭތޯ މަސައްކަތް ކުރުން ކަމަށެވެ.
ވުލްވްސްގެ ކޯޗް ނޫނޯ އެސްޕިރިޓޯ ސަންޓޯ ހާމަކުރިގޮތުގައި މިއީ ވަރަށް ވާދަވެރި މެޗެއް ކަމަށާއި ދެވަނަ ހާފް ފެށުނުތަނާ ބައިކޮޅަށް ވަން ފުރަތަމަ ގޯލާމެދު އެހާ ހިތްހަމަ ނުޖެހޭ ކަމަށެވެ. އަދި މިމެޗްގައި އޭނާގެ ޓީމަށް މާރަނގަޅު ފުރުސަތުތަކެއް ތަނަވަސް ކުރެވިފައިނުވާކަމަށާއި ނިންމުން ރަނގަޅު ކުރަންޖެހިފައިވާކަމަށް ވުލްވްސްގެ ކޯޗު ބުންޏެވެ.
މިކާމިޔާބީއާއެކު މި މުބާރާތުގެ ކްއާޓަރ ފައިނަލަށް ސަދެމްޓަން ދަތުރުކޮށްފައިވާއިރު ކްއާޓަރގައި ބައްދަލުކުރަންޖެހެނީ ބޯންމޯތުއާއެވެ. ސަދެމްޓަނާއި ވުލްވްސް މިއަންނަ އާދީއްތަ ދުވަހު އަނެއްކާ ޕްރިމިއަރ ލީގުގައިވެސް ވާދަކުރާނެއެވެ. ނަމަވެސް އެމެޗް ކުޅުމަށް ހަމަޖެހިފައިވަނީ ސަދެމްޓަންގެ ދަނޑުގައެވެ.