ފީފާ ކްލަބް ވާރލްޑް ކަޕްގެ ޗެމްޕިއަންކަން ޖަރުމަނު ބުންޑަސްލީގާގެ ބަޔާން މިޔުނިކް ހޯދައިފިއެވެ. މި މުބާރާތުގެ ޗެމްޕިއަންކަން ބަޔާން ހޯދީ ފައިނަލުގައި މެކްސިކޯގެ ތިގްރެސް އާ ބައްދަލުކޮށް އެއް ލަނޑު ސުންލަނޑުން މެޗް ކާމިޔާބުކޮށްގެންނެވެ.
ގަތަރުގެ ވެރިރަށް ދޯހާގައި ކުރިއަށް ދިޔަ މިމުބާރާތުގެ ފައިނަލްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ބަޔާންއެވެ. މިމެޗްގައި ބަޔާންއިން ޖެހި ހަމައެކަނި ލަނޑު މެޗްގެ 69 ވަނަ މިނެޓްގައި ޖަހަދިނީ ބެންޖަމިން ޕަވާޑްއެވެ. ރޮބަޓް ލެވަންޑޯސްކީ އޮފްސައިޑްގައި ހުރުމުގެ ސަބަބުން އެންމެ ފުރަތަމަ އޮފްސައިޑް ލަނޑަކަށް ދެއްކި މިލަނޑު، ލަނޑަކަށް ބެލީ ވީއޭއާރުން ބެލުމަށްފަހުއެވެ. އަދި އޭގެ ކުރިން ޖޯޝުއާ ކިމިޗް ޖެހި ލަނޑެއްވެސް ވަނީ ލެވަންޑޯސްކީ އޮފްސައިޑްގައި ހުރެ ކީޕަރަށް ހުރަސްއެޅިކަމަށް ނިންމާ ލަނޑެއްކަމަށް ޤަބޫލް ނުކޮށްފައެވެ. މިމެޗްގައި ތިގްރެސްއަށް މާ ނުރައްކާތެރި ހަމަލާއެއް އުފެއްދިފައެއް ނުވެއެވެ.
މިކާމިޔާބީއާއެކު ބަޔާން މިވަނީ ވޭތުވެދިޔަ ނުވަމަސް ތެރޭ ހަތަށި ކާމިޔާބުކޮށްފައެވެ. މީގެތެރޭގައި ނިމި ދިޔަ ސީޒަންގެ ބުންޑަސްލީގާއާއި ޖަރުމަނު ލީގު ކަޕާއި ޔުއޭފާ ޗެމްޕިއަންސް ލީގުގެ އިތުރުން މިފަހަރުގެ ޔުއޭފާ ސުޕަރ ކަޕާއި ޖަރުމަނު ސުޕަރ ކަޕާއި، ފީފާ ކްލަބް ވާރލްޑް ކަޕް ހިމެނެއެވެ.
މިއީ ޔޫރަޕްގެ ކްލަބް ތަކުން ފީފާ ވާރލްޑް ކަޕް ޖެހިޖެހިގެން ކާމިޔާބުކުރި 8 ވަނަ ފަހަރެވެ. އާންމުކޮށް މިމުބާރާތުގެ ފައިނަލްގައި ޔޫރަޕްގެ ޗެމްޕިއަނުންނާއި ދެކުނު އެމެރިކާގެ ޗެމްޕިއަނުންގެ މެދުގައި ކުޅޭތަން ފެނުނު ނަމަވެސް މިފަހަރު ދެނުކު އެމެރިކާގެ ޗެމްޕިއަނުންގެ ހައިސިއްޔަތުން ދިޔަ ބްރެޒިލްގެ ޕަލްމެއިރާސްއަށް މާ އެދެވޭ ކުޅުމެއް ދެއްކިފައެއް ނުވެއެވެ.
މި މުބާރާތް ގަތަރުގެ ވެރިރަށް ދޯހާގައި މިފަހަރު ބޭއްވީ މިއަންނަ އަހަރު އެޤައުމުގައި ބޭއްވުމަށް ތައްޔާރުވަމުންދާ ފީފާ ވާރލްޑް ކަޕަށް އެޤައުމު ތައްޔާރުވެފައިވާ މިންވަރު ދެނެގަތުމުގެ ގޮތުންނެވެ.