އޮސްޓްރޭލިއަން އޯޕަން ޓެނިސް މުބާރާތުގެ ތިންވަނަ ބުރުން ދުނިޔޭގެ އެއްވަނަ އަންހެން ޓެނިސް ކުޅުންތެރިޔާ އޭޝްލީ ބާރޓީ ޖާގަހޯދައިފިއެވެ. މި މުބާރާތުގެ ތިންވަނަ ބުރުން ބާރޓީ ޖާގަހޯދީ ދެވަނަ ބުރުގައި އޮސްޓްރޭލިއާގެ ޑާރިއާ ގަވްރިލޯވާ އާއި ބައްދަލުކުރިމެޗް ސީދާ ދެސެޓުން މެޗް ކާމިޔާބުކޮށްގެންނެވެ.
މިމެޗްގެ ސެޓްތައް ބާރޓީ ކާމިޔާބުކުރީ ހައެއް އެކެއް އަދި ހަތެއް ހަޔަކުންނެވެ. މިމެޗްގެ ދެވަނަ ސެޓްގައި ފަސް ގޭމް ދެ ގޭމުން ބާރޓީ ކުރީގައި އޮވެ މެޗް ކާމިޔާބު ކުރުމަށް ސަރވް ކުރި ނަމަވެސް ގަވްރިލޯވާވަނީ ދެފަރަށް ގޭމް ބްރޭކްކޮށް ޓައި ބްރޭކަކަށް ދެވަނަ ސެޓް ގެންގޮސްފައެވެ. އަދި ޓައި ބްރޭކްވެސް ބާރޓީއަށް ކާމިޔާބުކުރެވުނީ ނުވައެއް ހަތަކުންނެވެ. ތިންވަނަ ބުރުގައި ބާރޓީ ބައްދަލުކުރާނީ ރަޝިޔާގެ އެކަޓެރީނާ އެލެގްޒަންޑްރޯވާއާއެވެ.
މިމުބާރާތުގެ އެންމެފަހުގެ އަންހެން ޗެމްޕިއަން އެމެރިކާގެ ސޯފިއާ ކެނިންގެ ނަސީބު އެހާ ރަނގަޅެއް ނުވިއެވެ. ދެވަނަ ބުރުގައި އެސްޓޯނިއާގެ ކައިއާ ކަނެޕީ އާއި ބައްދަލުކުރިމެޗުން ސީދާ ދެސެޓުން ކެނިން ވަނީ ބަލިވެފައެވެ. މިމެޗްގައި ކެނިންއަށް މިދިޔަ އަހަރު ދެއްކި މޮޅު ކުޅުމާއި ގާތަށްވެސް ކުޅެވިފައެއް ނުވެއެވެ. މިމެޗްގެ ސެޓްތައް ކަނެޕީ ކާމިޔާބުކުރީ ހައެއް ތިނެއް އަދި ހައެއް ދެއަކުންނެވެ. މެޗަށްފަހު ކެނިން ހާމަކުރިގޮތުގައި ޑިފެންޑިންގ ޗެމްޕިއަންގެ ހައިސިއްޔަތުން ކުޅުމަކީ ވަރަށް ބޮޑު ޕްރެޝަރެއް އޮންނަ ކަމެއް ކަމަށާއި އޭނާއަށް އެ ޕްރެޝަރު ހިފަހައްޓާލެވޭގޮތް ނުވީ ކަމަށެވެ. ތިންވަނަ ބުރުގައި ކަނެޕީ ބައްދަލު ކުރާނީ މުބާރާތުގެ 28 ވަނަ ސީޑް ކްރޮއޭޝިއާގެ ޑޮނާ ވެކިޗްއާއެވެ.
ފަސްވަނައަށް ސިޑް ކުރެވިފައިވާ އެލީނާ ސްވިޓޮލީނާ އާއި އެމެރިކާގެ ކޮކޯ ގައުފް ބައްދަލުކުރިމެޗް ސީދާ ދެސެޓުން ކާމިޔާބުކުރީ ސްވިޓޮލިނާއެވެ. އެއީ ހައެއް ހަތެއް އަދި ހައެއް ތިނަކުންނެވެ. ތިންވަނަ ބުރުގައި ސްވިޓޮލީނާ ބައްދަލުކުރާނީ އެލިސަން ވަން ޔުޓްވަންކް އާއި ބައްދަލުކޮށް ހައެއް ހަތަރެއް، އެކެއް ހައެއް އަދި ހައެއް ދެއަކުން މެޗް ކާމިޔާބުކުރި ޔޫލިއާ ޕުޓިންޓްސޭވާ އާއެވެ.