މިދިޔަ ހޯމަދުވަހު ގއ.މާމެންދޫގައި ހިނގި މާރާމާރީއެއްގައި މަރުވި އަހުމަދު އުދައްޔުގެ ޕޯސްޓް މޯޓަމް ހެދުމަށް ރާއްޖެއިން ބޭރަށް ގެންދިއުމަށް އޭނާގެ ހަށިގަނޑު މާލެ ގެނެސްފިއެވެ.
17 އަހަރުގެ އުދައްޔު މަރާލާފައިވަނީ، އޭނާގެ އުފަން ރަށް ގއ.މާމެންދޫގައި ދެ ގްރޫޕެއްގެ މެދުގައި ހިންގި މާރާމާރީއެއްގައެވެ. ފުލުހުން ވިދާޅުވީ އުދައްޔުގެ ހަޑިގަނޑު މާލެ ގެނެސްފައިވަނީ ރޭގަކަމަށެވެ. އަދި ހަށިގަނޑު ރާއްޖެއިން ބޭރަށް ފޮނުވުމަށް ކުރަންޖެހޭ މަސައްކަތްތައް ކުރިއަށްދާކަމަށް ފުލުހުން ވިދާޅުވެއެވެ.
ހަމަލާއާއި ގުޅިގެން ފަރުވާދިނުމަށް އުދައްޔުގެ ހަޑިގަނޑު ފުރަތަމަ ގެންދިޔައީ ގއ.އަތޮޅު ރީޖަނަލް ހޮސްޕިޓަލަށެވެ. ނަމަވެސް ލިބިފައިވާ ޒަހަމުތަކުގެ ސަބަބުން ހޮސްޕިޓަލަށް ގެންދިޔައިރުވެސް މަރުވެފައިވާކަމަށް އުދައްޔު ބެލި ޑޮކްޓަރާ ހަވާލާދީ ހޮސްޕިޓަލުން ބުނެފައިވެއެވެ.
އޭނާ ހަށިގަނޑުގެ އެކި ތަންތަނަށް ވަޅިން ހަމަލާދީފައިވާއިރު، 4 އިންޗިއާއި 5 އިންޗި ފުނަށް ވަޅި ހަރާފައިވާ ތަންތަންވެސް ބުރަކަށީގައި ހުރިކަމަށް ހޮސްޕިޓަލުން މަޢުލޫމާތުދެއެވެ.
މި ޙާދިސާއާ ގުޅިގެން މިހާތަނަށް 5 މީހުން ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. މީގެތެރޭގައި ހިމެނެނީ އުމުރުން 27 އަހަރުގެ މީހަކާ، 25 އަހަރުގެ މީހަކާ، 23 އަހަރުގެ މީހަކާ، 18 އަހަރުގެ 2 މީހުންނެވެ. މީގެތެރެއިން 3 މީހުން ހައްޔަރުކޮށްފައިވަނީ ޙާދިސާ ހިނގި ރެއެވެ. ފުލުހުން ވިދާޅުވީ ބަންދުގައި ބައިތިއްބައިގެން ތަޙުޤީޤު ކުރިއަށްގެންދިއުމަށް، މީގެތެރެއިން 2 މީހުންނަށް ކޯޓުން 15 ދުވަހުގެ މުއްދަތު ޖަހާފައިވާކަމަށެވެ. އަދި އަނެއް މީހާއަށް 10 ދުވަހުގެ މުއްދަތެއް ކޯޓުން ދީފައިވާކަމަށް ފުލުހުން ބުނެއެވެ. މިމައްސަލާގައި އެންމެ ފަހުން ހައްޔަރުކުރި ދެ މީހުންގެ ބަންދަށްވެސް ކޯޓުންވަނީ 15 ދުވަހުގެ މުއްދަތު ޖަހައިފައެވެ.
މި މާރާމާރީގައި އުދައްޔުގެ އިތުރުން އޭނާގެ ބޭބެއަށްވެސް ވަނީ، ވަޅިން ޙަމަލާ ދީފައެވެ. އޭނާއަށް ދަނީ ގދ.ތިނަދޫ ހޮސްޕިޓަލްގައި ފަރުވާ ދެމުންނެވެ. އަދި މި މާރާމާރީ ތަޙުޤީގުކުރުމަށްޓަކާ ފުލުހުންގެ ޚާއްސަ ޓީމެއްވެސް މިހާރު ދަނީ މާމެންދޫގައި ހަރަކާތްތެރިވަމުންނެވެ.