ދުނިޔޭގައި މިހާރު ފެތުރެމުންދާ ކޯވިޑް19 ގެ މަލިމަޑުކަމުގައި ބައެއް ޤައުމުތަކުންއަޅާފައިވާ ފިޔަވަޅުތަކާއި ގުޅިގެން ޔުއޭފާ ޔޫރޮޕާ ލީގުގެ ދެވަނަ ބުރުގައި ކުޅެން ހަމަޖެހިފައިވި ބައެއް މެޗްތައް ކުޅޭ ދަނޑުތަށް ބަދަލުކޮށްފިއެވެ. ޔޫއޭފާއިން ހާމަކުރިގޮތުގައި ދެވަނަ ބުރުގެ ތިން މެޗެއްގެ ފުރަތަމަ ލެގްގެ މެޗްތަށްވަނީ ބަދަލުކޮށްފައެވެ.
މިގޮތުން މިމަހުގެ 18 ވަނަ ދުވަހު ޕޯޗުގަލްގެ ޕްރިމެއިރަ ލީގާގެ ބެންފީކާ އާއި އިންގްލިޝް ޕްރިމިއަރ ލީގުގެ އާސެނަލް ބައްދަލުކުރަން ހަމަޖެހިފައިވި ފުރަތަމަ ލެގްގެ މެޗް މިހާރު ކުޅުމަށް ހަމަޖެހިފައިވަނީ އިޓަލީގެ ވެރިރަށް ރޯމްގެ ސްޓާޑިއޯ އޮލިމްޕިކޯގައެވެ. ބެންފީކާގެ ދަނޑުގައި ކުޅުމަށް ހަމަޖެހިފައިވި މިމެޗް ރޯމްއަށް ބަދަލުކުރުމުގައި ބެންފީކާ އާއި އާސެނަލް އަދި އިޓަލީވިލާތުގެ ފުޓްބޯޅަ ފެޑެރޭޝަނާއި އޭއެސް ރޯމާއިން ދިން އެއްބާރުލުމަށް ޔުއޭފާއިން ޝުކުރު އާދާކުރެއެވެ.
މީގެއިތުރުން ސްޕެނިޝް ލަލީގާގެ ރެއާލް ސޮސިއެޑާޑްއާއި އިންގްލިޝް ޕްރިމިއަރ ލީގުގެ މެންޗެސްޓަރ ޔުނައިޓެޑް ބައްދަލުކުރުމަށް ހަމަޖެހިފައިވާ ފުރަތަމަ ލެގްގެ މެޗް އިޓަލީވިލާތުގެ ޓޫރިންގެ ޔުވެންޓަސް ސްޓެޑިއަމްއަށް ބަދަލުކުރިކަންވެސް ޔުއޭފާއިން ވަނީ ހަމަކޮށްފައެވެ. އަދި ނޯވޭގެ އެލީޓް ސެރިއެންގެ މޯލްޑަރ އެފް.ކޭ އާއި ޖަރުމަނު ބުންޑަސްލީގާގެ ޓީ.އެސް.ޖީ. އެއިޓީން ނައިންޓީނައިން ހޯފެންހައިމް ބައްދަލު ކުރާ ފުރަތަމަ ލެގްގެ މެޗް ސްޕެއިންގެ ވިޔަރެއާލްގެ އެސްޓާޑިއޯ ޑެލަ ސެރަމިކާއަށް ބަދަލުކޮށްފައެވެ. ސޮސިއެޑާޑް އާއި މެންޗެސްޓަރ މެޗާއި މޯލްޑަރ އާއި ހޯފެންހައިމްގެ މެޗުވެސް ކުޅުމަށް ހަމަޖެހިފައިވަނީ މިމަހުގެ 18 ވަނަ ދުވަހުގެ ރެއެވެ. އަދި ޔުއޭފާއިންވަނީ މިދެ މެޗް މިގޮތަށް ކުޅޭ ދަނޑު ބަދަލުކުރުމުގައި ހަތަރު ޓީމުން ދިން އެއްބާރު ލުމުގެ އިތުރުން އިޓަލީވިލާތާއި ސްޕެއިންގެ ފުޓްބޯޅަ ފެޑެރޭޝަނަށް ޝުކުރު އަދާކޮށްފައެވެ.