އޮސްޓްރޭލިއަން އޯޕަން ޓެނިސް މުބާރާތުގެ ދެވަނަ ބުރުން ސްޕެއިންގެ ރަފައެލް ނަދާލް އާއި ރަޝިޔާގެ ޑަނީލް މެޑްވެޑޭވް ޖާގަ ހޯދައިފިއެވެ.
މިމުބާރާތުގެ ދެވަނަ ބުރުން 21 ވަނަ ގްރޭން ސްލޭމް މުބާރާތް ކާމިޔާބުކުރުމުގެ އަޒުމުގައި މަސައްކަތް ކުރަމުންދާ ނަދާލް ޖާގަހޯދީ ފުރަތަމަ ބުރުގައި ސަރބިއާގެ ލާސްލޯ ޔެރޭ އާ ބައްދަލުކޮށް ސީދާ ތިން ސެޓުން މެޗް ކާމިޔާބުކޮށްގެންނެވެ. އެއީ ހައެއް ތިނެއް، ހައެއް ހަތަރެއް އަދި ހައެއް އެކަކުންނެވެ. ދެވަނަ ބުރުގައި މި މުބާރާތުގެ ދެވަނަ ސީޑް ނަދާލް ބައްދަލުކުރާނީ ދުނިޔޭގައި 177 ވަނައަށް ރޭންކް ކުރެވިފައިވާ އެމެރިކާގެ މައިކަލް މޯއާއެވެ.
މިމުބާރާތުގެ ދެވަނަ ބުރުން ހަތަރުވަނައަށް ސީޑް ކުރެވިފައިވާ ރަޝިޔާގެ މެޑްވެޑޭވް ޖާގަ ހޯދީ ފުރަތަމަ ބުރުގައި ކެނެޑާގެ ވަސެކް ޕޮސްޕިސިލް އާއި ބައްދަލުކޮށް ސީދާ ތިން ސެޓުން މެޗް ކާމިޔާބުކޮށްގެންނެވެ. މިގޮތުން މިމެޗް މެޑްވެޑޭވް ކާމިޔާބުކުރީ ހައެއް ދޭއް، ހައެއް ދޭއް އަދި ހައެއް ހަތަރަކުންނެވެ.
މި މުބާރާތުގެ ދެވަނަ ބުރުން ޖާގަހޯދި އެހެން ކުޅުންތެރިންނަށް ބަލާލާއިރު ފަސްވަނަ އަށް ސީޑް ކުރެވިފައިވާ ސްޓެފަނޯސް ސިޓްސިޕާސް ވަނީ ގިލް ސައިމަންއާ ބައްދަލުކުރިމެޗް ސީދާ ތިން ސެޓުން ކާމިޔާބުކޮށްފައެވެ. ނަމަވެސް 13 ވަނަ ސީޑް ޑޭވިޑް ގިފިން އާއި އޮސްޓްރޭލިއާގެ އެލްކްސީ ޕޮޕިރިން ބައްދަލުކުރިމެޗް 3 ސެޓް 2 ސެޓުން ކާމިޔާބުކުރީ ޕޮޕިރިންއެވެ. އަދި 12 ވަނަ އަށް ސީޑް ކުރެވިފައިވާ ރޮބާޓޯ ބައުޓިސްޓާ އަގުޓް އާއި ދުނިޔޭގައި 85 ވަނައަށް ރޭންކް ކުރެވިފައިވާ މޮލްޑޯވާގެ ރާޑޫ އަލްބޮޓް ބައްދަލުކުރިމެޗް 3 ސެޓް އެއް ސެޓުން ކާމިޔާބުކުރީ އަލްބޮޓްއެވެ.