އެން.ބީ.އޭ. ބާސްކެޓްބޯޅަ މުބާރާތުގައި އެންމެފަހުގެ ޗެމްޕިއަން ލޮސް އެންޖަލިސް ލޭކަރސް އާއި އޮކްލޮހޯމާ ސިޓީ ތަންޑަރ ބައްދަލުކުރިމެޗް ލޭކަރސް ކާމިޔާބުކޮށްފިއެވެ. މިމެޗް ލޭކަރސް ކާމިޔާބުކުރީ ހަތަރު ކްއާޓަރ ނިމުނުއިރު ދެޓީމް 110 ޕޮއިންޓުން އެއްވަރު ވުމުން ކުޅުނު އޯވަރޓައިމްގައި 119 ޕޮއިންޓް 112 ޕޮއިންޓުންނެވެ.
މިމެޗްގައި ލޭކަރސްއަށް އެންމެ ރަނގަޅު ކުޅުމެއް ދެއްކީ 28 ޕޮއިންޓް އެޓީމަށް ހޯދައިދީ 14 ރީބައުންޑް ނަގާ 12 އެސިސްޓް ކުރި ލެބްރޮން ޖޭމްސްއެވެ. މީގެއިތުރުން މޮންޓްރެޒްލް ހެރެލްވަނީ އެޓީމަށް 21 ޕޮއިންޓް ހޯދައިދީފައެވެ. މިމެޗްގައި ތަންޑަރއަށް އެންމެ ރަނގަޅު ކުޅުމެއް ދެއްކީ 29 ޕޮއިންޓް ހޯދައިދީ 10 އެސިސްޓް ކުރި ޝައި ގިލްގިއޯސް އެލްގްޒެންޑަރއެވެ.
މިމުބާރާތުގައި ސެން އެންޓޯނިއޯ ސްޕަރސް އާއި ގޯލްޑަން ސްޓޭޓް ވޮރިއަރސް ބައްދަލުކުރިމެޗް 105 ޕޮއިންޓް 100 ޕޮއުންޓުން ކާމިޔާބުކުރީ ސްޕަރސްއެވެ. މިމެޗްގައި ސްޕަރސްއަށް އެންމެ ރަނގަޅު ކުޅުމެއް ދެއްކީ ޑެޖޫންޓޭ މަރީއެވެ. އޭނާވަނީ އެޓީމަށް 27 ޕޮއިންޓް ހޯދައިދީ 10 ރީބައުންޑް ނަގާ ހަތަރު އެސިސްޓް ކޮށްފައެވެ. އަދި ޑިމަރ ޑިރޮޒާންވަނީ ސްޕަރސްއަށް 21 ޕޮއިންޓް ހޯދައިދީ 10 އެސިސްޓް ކޮށްފައެވެ. މިމެޗްގައި ވޮރިއަރސްއަށް އެންމެ ރަނގަޅު ކުޅުމެއް ދެއްކީ ސްޓެފަން ކަރީއެވެ. އޭނާވަނީ 32 ޕޮއިންޓް ހޯދައިދީފައެވެ. މީގެއިތުރުން ކެލީ އޮބްރޭ ޖޫނިއަރވަނީ ވޮރިއަރސްއަށް 24 ޕޮއިންޓް ހޯދައިދީފައެވެ.
އެހެން މެޗްތަކަށް ބަލާލާއިރު މިލްވައުކީ ބަކްސް އާއި ޑެންވަރ ނަގެޓްސް ބައްދަލުކުރިމެޗް 125 ޕޮއިންޓް 112 ޕޮއިންޓުން ކާމިޔާބުކުރީ ބަކްސްއެވެ. މިމެޗްގައި ބަކްސްގެ ކްރިސް މިޑްލްޓަން އެޓީމަށް 29 ޕޮއިންޓް ހޯދާދިންއިރު ނަގެޓްސްއަށް އެންމެ ގިނަ ޕޮއިންޓް ހޯދައިދިނީ 35 ޕޮއިންޓް ހޯދާދިން ނިކޮލާ ޔޮކިޗްއެވެ. އަދި ފީނިކްސް ސަންސް އާއި ކްލީވްލަންޑް ކެވެލިއަރސް ބައްދަލުކުރިމެޗް 119 ޕޮއިންޓް 113 ޕޮއިންޓުން ސަންސް ކާމިޔާބުކުރިއިރު ޓޮރޮންޓޯ ރެޕްޓަރސް އާއި މެމްފިސް ގްރިޒްލީސް ބައްދަލުކުރިމެޗް 128 ޕޮއިންޓް 113 ޕޮއިންޓުން ކާމިޔާބުކުރީ ރެޕްޓަރސްއެވެ.