އިންގްލިޝް ޕްރިމިއަރ ލީގުގައި ލީޑްސް ޔުނައިޓެޑާއި ކްރިސްޓަލް ޕެލަސް ބައްދަލުކުރިމެޗް ލީޑްސް ކާމިޔާބުކޮށްފިއެވެ. މިމެޗް ލީޑްސް ކާމިޔާބުކުރީ އަމިއްލަ ދަނޑުގައި ކުޅެ 2 ލަނޑު ސުންލަނޑުންނެވެ.
ދެޓީމްގެ ފަރާތުންވެސް ވާދަވެރި ކުޅުމެއް ފެނިގެންދިޔަ މިމެޗްގެ ފުރަތަމަ ލަނޑު މެޗްގެ 3 ވަނަ މިނެޓްގައި ލީޑްސްއަށް ކާމިޔާބުކޮށްދިނީ ޖެކް ހެރިސްއެވެ. އަދި އެޓީމްގެ ދެވަނަ ލަނޑު މެޗްގެ 52 ވަނަ މިނެޓްގައި ކާމިޔާބުކޮށްދިނީ މިސީޒަންގައި ލީޑްސްގައި މޮޅު ކުޅުމެއް ދައްކަމުންދާ ފޯވަޑް ޕެޓްރިކް ބެމްފަޑްއެވެ. މިއީ ލީގުގައި އޭނާ ކާމިޔާބުކުރި 12 ވަނަ ލަނޑެވެ. އަދި އޭނާގެ ކެރިއަރގައި ކާމިޔާބުކުރި 100 ވަނަ ލަނޑެވެ. ބެމްފަޑް ޖަހާފައިވާ 100 ގޯލަށް ބަލާލާއިރު ހިމެނެނީ އެމްކޭ ޑޮންސްއަށް ޖަހާދީފައިވާ 21 ލަނޑާއި ޑަރބީ ކައުންޓީއަށް ޖަހާދިން 8 ލަނޑާއި މިޑިލްސްބަރަރއަށް ކާމިޔާބުކޮށްދިން 33 ލަނޑުގެ އިތުރުން ލީޑްސްއަށް ޖަހާދީފައިވާ 38 ލަނޑެވެ.
މެޗަށްފަހު ވާހަކަދައްކަމުން ބެމްފަޑްވަނީ 100 ލަނޑު ޖެހުނީތީ ހިތްހަމަ ޖެހޭ ކަމަށާއި ނަމަވެސް މުހިންމީ މިމެޗުން ލިބުނު ތިން ޕޮއިންޓް ކަމަށެވެ. މި ކާމިޔާބީއާއެކު ލީޑްސް މިހާރުވަނީ ކުޅުނު 22 މެޗުން ލިބިފައިވާ 32 ޕޮއިންޓާއެކު ތާވަލްގެ 10 ވަނައަށް ކުރިއަށް ޖެހިލާފައެވެ. އަދި ކްރިސްޓަލް ޕެލަސް އުޅެނީ 23 މެޗުން ލިބިފައިވާ 29 ޕޮއިންޓާއެކު ތާވަލްގެ 13 ވަނައިގައެވެ.