އަހަރުގެ ފުރަތަމަ ގްރޭން ސްލޭމް މުބާރާތް ކަމަށްވާ އޮސްޓްރޭލިއަން އޯޕަން ޓެނިސް މުބާރާތުގެ ދެވަނަ ބުރުން ދުނިޔޭގެ ފިރިހެން އެއްވަނަ ކުޅުންތެރިޔާ ނޯވަކް ޖޯކަވިޗް އާއި ތަޖްރިބާކާރު އަންހެން ކުޅުންތެރިޔާ ސެރީނާ ވިލިއަމްސް ޖާގަހޯދައިފިއެވެ.
އެންމެ ފަހުގެ ފިރިހެން ޗެމްޕިއަން ޖޯކޮވިޗް މި މުބާރާތުގެ ދެވަނަ ބުރުން ޖާގަހޯދީ ފުރަތަމަ ބުރުގައި ފަރަންސޭސިވިލާތުގެ ޖެރެމީ ޗާޑީއާ ބައްދަލުކުރިމެޗް ފަސޭހަ ކަމާއެކު ސީދާ ތިން ސެޓުން މެޗް ކާމިޔާބުކޮށްގެންނެވެ. މިމެޗްގެ ސެޓްތައް ޖޯކޮވިޗް ކާމިޔާބުކޮށްފައިވަނީ ހައެއް ތިނެއް، ހައެއް އެކެއް އަދި ހައެއް ދެއަކުންނެވެ.
މިމުބާރާތުގެ ފިރިހެނުންގެ ބައިގެ އެހެން މެޗްތަކަށް ބަލާލާއިރު ހަވަނައަށް ސީޑް ކުރެވިފައިވާ ޖަރުމަނުވިލާތުގެ އެލެގްޒެންޑަރ ޒްވެރޭވް އާއި އެމެރިކާގެ މާކޮސް ޖިރޯން ބައްދަލުކުރިމެޗް 3 ސެޓް އެއް ސެޓުން ކާމިޔާބުކުރީ ޒްވެރޭވްއެވެ. އެއީ ހައެއް ހަތެއް، ހަތެއް ހައެއް، ހައެއް ތިނެއް އަދި ހައެއް ދެޔަކުން މެޗް ކާމިޔާބުކޮށްގެންނެވެ.
ތިންވަނައަށް ސީޑް ކުރެވިފައިވާ ޑޮމިނިކް ތިއެމް އާއި ކަޒަކިސްޓާންގެ މިހައިލް ކުކުޝްކިން ބައްދަލުކުރިމެޗް ސީދާ ތިން ސެޓުން ކާމިޔާބުކުރީ ތިއެމް އެވެ. އެއީ ހަތެއް ހައެއް، ހައެއް ދޭއް އަދި ހައެއް ތިނަކުން މެޗް ކާމިޔާބުކޮށްގެންނެވެ. މި މުބާރާތުގެ ފުރަތަމަ ބުރުގައި އެންމެ ބޮޑު ހައިރާން ކަމެއް ގެނުވީ މުބާރާތުގެ ފިރިހެން 10 ވަނަ ސީޑް ފަރަންސޭސިވިލާތުގެ ގައެލް މޮންފީސް އާއި ފިންލަންޑްގެ އެމީ ރޫސުވުއޯރީ ބައްދަލުކުރިމެޗުންނެވެ. ފަސް ސެޓަށް ދިގު ދެމިގެންދިޔަ މިމެޗް 3 ސެޓް ދެ ސެޓުން ކާމިޔާބުކުރީ ފިންލަންޑްގެ ޒުވާން ކުޅުންތެރިޔާ ރޫސުވުއޯރީއެވެ.
މި މުބާރާތުގެ އަންހެނުންގެ މެޗްތަކަށް ބަލާލާއިރު 24 ވަނަ ގްރޭން ސްލޭމް މުބާރާތް ކާމިޔާބު ކުރުމުގެ އަޒުމުގައި މަސައްކަތް ކުރަމުންދާ އެމެރިކާގެ ސެރީނާ ވިލިއަމްސް އާއި ޖަރުމަނުވިލާތުގެ ލައުރާ ސީގެމުންޑް ބައްދަލުކުރިމެޗް ވަރަށް ފަސޭހަކަމާއެކު ސީދާ ދެސެޓުން ކާމިޔާބުކުރީ ސެރީނާއެވެ. އެއީ ހައެއް އެކެއް އަދި ހައެއް އެކަކުންނެވެ.
ޔޫއެސް އޯޕަން ޗެމްޕިއަން ނައޯމީ އޮސާކާ އާއި ރަޝިޔާގެ އަނަސްޓޭޝިއާ ޕަވްލިޔުޗެންކޯވާ ބައްދަލުކުރިމެޗް ސީދާ ދެސެޓުން ކާމިޔާބުކުރީ ނައޯމީއެވެ. އެއީ ހައެއް އެކެއް އަދި ހައެއް ދެއަކުންނެވެ.