އިޓާލިއަން ސެރީއާގައި އޭ.ސީ. މިލާނާއި ކްރޮޓޯނޭ ބައްދަލުކުރިމެޗް ކާމިޔާބުކޮށް ޕޮއިންޓް ތާވަލްގެ އެއްވަނައަަށް އަނެއްކާވެސް މިލާން އަރައިފިއެވެ. މިލާންގެ ސެންސީރޯ ސްޓޭޑިއަމްގައި ކުޅުނު މިމެޗް މިލާން ކާމިޔާބުކުރީ ފަސޭހަ ކަމާއެކު 4 ލަނޑު ސުންލަނޑުންނެވެ.
މިމެޗްގައި މިލާންގެ ފުރަތަމަ ލަނޑު މެޗްގެ 30 ވަނަ މިނެޓްގައި ރަފައެލް ލިއާއޮ ތަނަވަސް ކޮށްދިން ފުރުސަތެއްގައި ކާމިޔާބުކުރީ ތަޖްރިބާކާރު ފޯވަޑް ޒްލަޓަން އިބްރަހިމޮވިޗެވެ. މިއީ ކްލަބް ލެވެލްގައި އިބްރަހިމޮވިޗް ކާމިޔާބުކުރި 500 ވަނަ ލަނޑެވެ. އަދި މެޗްގެ 64 ވަނަ މިނެޓްގައި މިލާންގެ 2 ވަނަ ލަނޑު ޖަހައި އިބްރަހިމޮވިޗް ވަނީ 501 ވަނަ ލަނޑުވެސް ކާމިޔާބުކޮށްފައެވެ. މި ދެލަނޑާއެކު އޭނާ ސެރީއާގައި މިސީޒަންގައި ޖެހި ލަނޑުގެ އަދަދު މިވަނީ 14 އަށް އަރާފައެވެ. މިމެޗްގައި މިލާންގެ ފަހު ދެލަނޑު މެޗްގެ 69 ވަނަ މިނެޓާއި 70 ވަނަ މިނެޓްގައި ޖަހައިދިނީ އެންޓޭ ރެބިޗްއެވެ.
މިކާމިޔާބީއާއެކު މިލާނުން މިހާރުވަނީ ކުޅުނު 21 މެޗުން 49 ޕޮއިންޓް ހޯދައި އަލުން ތާވަލްގެ އެއްވަނައަށް އަރާފައެވެ. އަދި ދެވަނައިގައި އުޅޭ އިންޓަރ މިލާންގެ މައްޗަށް 2 ޕޮއިންޓްގެ ލީޑެއް ނަގާފައެވެ.
ސެރީއާގައި ރޭ ކުޅުނު އެހެން މެޗްތަކަށް ބަލާލާއިރު ބެނެވެންޓޯ އާއި ސަމްޑޯރިއާ ބައްދަލުކުރިމެޗް އެއް ލަނޑު އެއްލަނޑުން ދެޓީމް އެއްވަރުވި އިރު އުދިނޭސޭ އާއި ހެލަސް ވެރޯނާ ބައްދަލުކުރިމެޗް 2 ލަނޑު ސުންލަނޑުން ކާމިޔާބުކުރީ އުދިނޭސޭއެވެ. އަދި ޕާރމާ އާއި ބޮލޯނިއާ ބައްދަލުކުރިމެޗް 3 ލަނޑު ސުންލަނޑުން ކާމިޔާބުކުރީ ބޮލޯނިއާއެވެ.