ޔުއޭފާ ޗެމްޕިއަންސް ލީގުގެ ދެވަނަ ބުރުގެ ފުރަތަމަ ލެގްގައި ޖަރުމަނު ބުންޑަސްލީގާގެ އާރްބީ ލިޕްޒިގާއި އިންގްލިޝް ޕްރިމިއަރ ލީގުގެ ލިވަޕޫލް ބައްދަލުކުރަން ހަމަޖެހިފައިވި މެޗް ހަންގޭރީގައި ކުޅޭ ގޮތަށް ނިންމައިފިއެވެ.
މިމެޗް ހަންގޭރީގެ ވެރިރަށް ބުޑަޕެސްޓްގައި ކުޅޭ ގޮތަށް ހަމަޖައްސަން ޖެހުނީ ކޮރޯނާ ވައިރަހުގެ ސަބަބުން ޖަރުމާނުވިލާތުން އަޅާފައިވާ ފިޔަވަޅުތަކާއި ގުޅިގެންނެވެ. މިގޮތުން ޖަރުމަނުވިލާތުންވަނީ ކޮރޯނާ ވައިރަހުގެ އާ ވޭރިއަންޓް ހަލުވި ކަމާއެކު ފެތުރެމުންދާ ޤައުމުތަކުން މީހުން އެޤައުމަށް ދިއުން ވަގުތީ ގޮތުން މަނާކޮށްފައެވެ. މީގެތެރޭގައި އިނގިރޭސިވިލާތްވެސް ހިމެނެއެވެ. ޖަރުމަނު ސަރުކާރުންވަނީ ލިޕްޒިގްގެ ދަނޑުގައި ކުޅެން ހަމަޖެހިފައިވި ފުރަތަމަ ލެގްގެ މެޗަށް ލިވަޕޫލްގެ ޓީމް ދަތުރުކުރުމުގެ ހުއްދަ ދޭނެ ހާލަތެއް ނެތް ކަމަށް އަންގާފައެވެ. އަދި އެހެން ކަމުން މިމެޗް އެހެން ދަނޑަކަށް ބަދަލު ކުރަން ޖެހުނީއެވެ. މިގޮތުން މިމެޗް މިހާރު ކުޅެވޭނީ ކުރިންވެސް އޮތް ގޮތަށް މިމަހުގެ 16 ވަނަ ދުވަހު ބުޑަޕެސްޓްގެ ޕުސްކާސް އެރީނާގައެވެ. އަދި ދެވަނަ ލެގް ކުޅޭނީ މާރޗްމަހުގެ 10 ވަނަ ދުވަހު ލިވަޕޫލްގެ އެންފީލްޑް ސްޓޭޑިއަމްގައެވެ.
ޔުއޭފާއިންވަނީ މިމެޗްގެ ކަންތައްތައް ހަމަޖެއްސުމުގައި ދެ ކްލަބްގެ ފަރާތުންވެސް ދީފައިވާ އެއްބާރުލުމަށް ވަރަށް ބޮޑަށް ޝުކުރު އަދާކޮށްފައެވެ. އަދި ހަންގޭރީގައި މިމެޗް ބޭއްވުމުގެ ހުއްދަ ދީފައިވާތީ އެޤައުމުގެ ފުޓްބޯޅަ ފެޑެރޭޝަނަށްވެސް ޔުއޭފާއިންވަނީ ޝުކުރު އަދާކޮށްފައެވެ.