ސަޢުދީ ޢަރަބިއްޔާއިން އިސްވެ ޔަމަނުގެ ހޫޘީންނާއި ދެކޮޅަށް ދެމުންދާ ޙަމަލާތަކަށް އެމެރިކާއިން ސަޢުދީ ޢަރަބިއްޔާއަށް އިތުރަށް ވާގިވެރިވެވެން ނެތްކަމަށް އެމެރިކާގެ ރައީސް ޖޯ ބައިޑަން އިޢުލާނުކުރައްވައިފިއެވެ.
އެމެރިކާގެ ސްޓޭޓު ޑިޕާޓްމަންޓުގައި ވާހަކަދައްކަވަމުން ބައިޑަން ވިދާޅުވީ ސަޢުދީ ޢަރަބިއްޔާއާއި ހޫޘީންނާއި ދެމެދު ކުރާ ހަނގުރާމަ ނިމުމަކަށް އަންނަންޖެހޭކަމަށެވެ. އަދި އެކަން ހާޞިލްކުރުމަށްޓަކައި ޔަމަނުގެ ހަނގުރާމައަށް އެމެރިކާއިން ދެމުންދިޔަ ހުރިހާ އެއްބާރުލުމެއް ހުއްޓާލުމަށް އެ ޤައުމުން ނިންމާފައިވާކަމަށް ބައިޑަން ވިދާޅުވިއެވެ. އޭގެ ތެރޭގައި އެ ހަނގުރާމައާއި ގުޅުންހުރި ހަތިޔާރު ވިއްކުމުގެ އެއްބަސްވުންތައްވެސް ހިމެނޭކަމަށް ބައިޑަން ވިދާޅުވިއެވެ.
ބައިޑަން ވިދާޅުވީ ހޫޘީންނަށް ހަމަލާ ދިނުމަށް އެމެރިކާއިން ވާގިވެރި ނުވިނަމަވެސް އީރާނުން ވާގިވެރިވާ އެކި ހަނގުރާމަވެރި ޖަމާޢަތްތަކުން ސަޢުދީ ޢަރަބިއްޔާއަށް އަމާޒުކޮށް ދެމުންދާ މިސައިލް ޙަމަލާތަކާއި ޑްރޯން ޙަމަލާތަކާއި އެހެނިހެން ނުރައްކާތަކުން ސަޢުދީ ޢަރަބިއްޔާ ރައްކާތެރިކޮށް، އެ ޤައުމުގެ އިސްތިޤުލާލާއި ރައްޔިތުން ދިފާޢުކުރުމަށް އެމެރިކާއިން އެހީތެރިވަމުންދާނެކަމަށެވެ.
ބައިޑަންގެ ވާހަކަފުޅަށް ސަޢުދީ ޢަރަބިއްޔާއިންވަނީ މަރުޙަބާ ކިޔައިފައެވެ. ޚާއްޞަގޮތެއްގައި ސަޢުދީ ޢަރަބިއްޔާގެ ދިފާޢުގައި އެމެރިކާއިން މަސައްކަތްކުރާނެކަމުގެ ޔަޤީންކަން އެމެރިކާއިން ދީފައިވުމަކީ އެ ޤައުމުން ބަލައިގަންނަ ކަމެއްކަމުގައި ސަޢުދީ ޢަރަބިއްޔާގެ ދަޢުލަތުގެ ނޫސް އިދާރާއިންވަނީ ބުނެފައެވެ.
އެމެރިކާގެ ޤައުމީ ސަލާމަތާއިބެހޭ މުޝީރު، ޖޭކް ސަލިވަން ވިދާޅުވީ ހޫޘީންނާއި ދެކޮޅަށް ސަޢުދީ ޢަރަބިއްޔާއިން ދެމުންދާ ޙަމަލާތަކަށް އެމެރިކާއިން ވާގިވެރި ނުވުމަކީ ޔަމަނުގައި މަރުކަޒުވެފައިވާ އަލް-ޤައިދާ ޖަމާޢަތާއި ދެކޮޅަށް އެމެރިކާއިން ކުރަމުންދާ މަސައްކަތްތަކަށް އަސަރުކުރާނެކަމެއް ނޫންކަމަށެވެ.
ބައިޑަންވަނީ ޔަމަނަށް ކަނޑައަޅާފައި ހުންނަވާ ޚާއްސަ މަންދޫބެއްގެ ގޮތުގައި ތިމޮތީ ލެންޑާކިންގު ހޮއްވަވާފައިވާކަން އިޢުލާނުކުރައްވާފައެވެ. ލެންޑާކިންގަކީ ޔަމަނާއި ގަލްފުގެ ސަރަޙައްދުތަކާއިގުޅޭ މައްސަލަތަކުގައި ތަޖުރިބާކާރު ބޭފުޅެކެވެ. މީގެ ކުރިން އޭނާވަނީ ޑެޕިއުޓީ އެސިސްޓަންޓް ސެކްރެޓަރީ އޮފް ސްޓޭޓް ފޮރ ގަލްފް އެފެއާޒްގެ މަޤާމުވެސް ފުރުއްވާފައެވެ. އަދި ރިޔާޟުގައި ހުންނަ އެމެރިކާގެ އެމްބަސީގައިވެސް އޭނާވަނީ މަސައްކަތް ކުރައްވާފައެވެ.