އަންނަ ހަފުތާގެ ތެރޭގައި ފެށުމަށް ހަމަޖެހިފައިވާ އެމެރިކާގެ ކުރީގެ ރައީސް ޑޮނަލްޑް ޓްރަންޕު އަޒުލްކުރުމުގެ ޝަރީޢަތުގައި ސެނެޓަށް ޖަވާބުދާރީވެވަޑައިނުގަންނަވާނެކަމަށް އެ މަނިކުފާނުގެ ޤާނޫނީ ވަފުދުން ބުނެފިއެވެ. ޓްރަންޕުގެ ވަކީލުންގެ ވަފުދުން އެހެން ބުނެފައިވަނީ ޝަރީޢަތުގައި ޖަވާބުދާރީވެވަޑައިގަތުމަށް އެދި ޓްރަންޕަށް ޑިމޮކްރަޓުން ފޮނުވާފައިވާ ސިޓީއަކާއި ގުޅިގެންނެވެ.
މިދިޔަ ޖަނަވަރީ މަހުގެ 6ވަނަ ދުވަހުގައި ޓްރަންޕަށް ތާއިދުކުރާ ގިނަ ޢަދަދެއްގެ ބަޔަކު ވަނީ އެމެރިކާގެ ޤާނޫނު ހަދާ މަޖިލީސް ހިންގާ ކޮންގެރެސް އިމާރާތަށް ވަދެ، އެތަނުގައި ހަމަނު ޖެހުން ހިންގާފައެވެ. މި ހަމަނުޖެހުންތަކުގައި ފުލުހަކު ހިމެނޭގޮތަށް ފަސް މީހުންވަނީ މަރުވެފައެވެ.
ޓްރަންޕްގެ ސަޕޯޓަރުން އެ އިމާރާތުގައި ހަމަނުޖެހުން އުފައްދާފައިވަނީ ރިޔާސީ އިންތިޚާބު އޮޅުވާލާފައިވާކަމަށް ވިދާޅުވެ، އިންތިޚާބު ކާމިޔާބުކުރެއްވީ ޖޯ ބައިޑަންކަމަށް ޤާނޫނު ހަދާ މަޖިލީހުން ކަށަވަރުކުރާ ވަގުތު ނަތީޖާއާއިމެދު އޮތް ހިތްހަމަނުޖެހުން ފައުޅުކުރުމަށް އެ އިމާރާތް ދޮށަށް އެއްވުމަށް ރައީސް ޓްރަންޕް ގޮވާލެއްވުމުންނެވެ.
އެ ހާދިޘާއާއި ގުޅިގެން ޑިމޮކްރަޓުންވަނީ ޓްރަމްޕް އަޒުލްކުރުމުގެ މަސައްކަތް ފަށައިފައެވެ. ފެބްރުއަރީ މަހުގެ 9ވަނަ ދުވަހުގައި ޓްރަންޕް އަޒުލްކުރުމުގެ އަޑުއެހުންތައް ފެށުމަށް ޤާނޫނު ހަދާ މަޖިލީހުގެ މަތިގޭގައި ތައްޔާރުވަމުންދާއިރު، އެ މަޖިލީހުގެ ތިންބައި ކުޅަ ދެބަޔަށް ޓްރަންޕު ކުށްވެރިވެފައިވާކަމަށް ފެންނަނަމަ ޓްރަންޕަށް ދެން ރައީސްކަމަށް ދުވަހަކުވެސް ކުރިމަތި ނުލެވޭފަދަ ގޮތެއް މެދުވެރިވުމަކީ އެކަށީގެންވާކަމެކެވެ.
ޝަރީޢަތަށް ތައްޔާރުވަމުންދާ މި ދަނޑިވަޅުގައި އަޒުލްކުރުމުގެ މައްސަލައިގައި ޑިމޮކްރަޓުންގެ ފަރާތުން އެންމެ އިސްކޮށް ޙަރަކާތްތެރިވެވަޑައިގަންނަވާ ސެނެޓު މެންބަރު، ޖޭމީ ރަސްކިންސް ޓްރަންޕަށް ފޮނުއްވި ސިޓީއެއްގައި ވަނީ ޖަނަވަރީ 6ވަނަ ދުވަހުގެ ހާދިޘާއާއި ގުޅޭ ގޮތުން ޝަރީޢަތް ފެށުމުގެ ކުރިން ނުވަތަ ޝަރީޢަތުގައިވެސް ޓްރަންޕު ޖަވާބުދާރީވެވަޑައިގަތުމަށް ދަޢުވަތު އަރުވާކަމަށެވެ. ނަމަވެސް ޓްރަންޕުގެ ވަކީލުންވަނީ ސެނެޓުގައި ޖަވާބުރާއީވުމަށް ރަސްކިންސް ހުށަހެޅުއްވި ހުށަހެޅުމަކީ 'ޕަބްލިސިޓީ ސްޓަންޓް'އެއްގެ ގޮތުގައި ސިފަކުރައްވާފައެވެ. އަދި ޣައިރު ދުސްތޫރީ މައްސަލައެއްގައި ޓްރަންޕު ޖަވާބުދާރީ ވެވަޑައިނުގަންނަވާނެކަމަށްވެސް އެމަނިކުފާނުގެ ވަކީލުން ބުނެއެވެ.
މި ހަފުތާގެ ކުރީކޮޅުގައި ޓްރަންޕުގެ ވަކީލުންވަނީ އެމަނިކުފާނު އަޒުލްކުރުމަށް ހުށަހަޅާފައިވާ ދައުވާތަކަށް އިންކާރުކޮށްފައެވެ. އަދި ރައީސްގެ ގޮތުގައި ހުންނަވާ ޓްރަންޕުގެ އެންމެހާ މަސްޢޫލިއްޔަތުތައް އެންމެ ފުރިހަމައަށް ޢަދާކުރައްވާފައިވާކަމަށް އެމަނިކުފާނުގެ ޤާނޫނީ ވަފުދުން ބުނެެއެވެ. ޤާނޫނީ ވަފުދުން ބުނީ ނޮވެމްބަރު މަހުގެ 3ވަނަ ދުވަހުގައި ބޭއްވި އިންތިޚާބުގެ ނަތީޖާ އޮޅުވާލާފައިވާކަމަށް ޓްރަންޕު ކުރައްވަމުންދިޔަ ތުހުމަތުތަކަކީ އެމެރިކާގެ ޤާނޫނު އަސާސީގެ ފުރަތަމަ އިސްލާހުގެ ދަށުން ޤާނޫނާއި ޚިލާފުކަމެއް ނޫންކަމަށެވެ.
ޓްރަމްޕް އަޒުލްކުރުމުގެ ޝަރީޢަތް ކުރިއަށް ގެންދިޔުމަށް ފެންނަކަމަށް ވޯޓުދީފައިވަނީ ރިޕަބްލިކަނުންނަށް ނިސްބަތްވާ އެންމެ ފަސް މެންބަރުންނެވެ. އެއާއިއެކު ޓްރަމްޕް ކުށްވެރިވެރިވެފައިވާކަމަށް ނިންމުމަށް ބޭނުންވާ މަޖިލީހުގެ ތިންބައިކުޅަ ދެބައިގެ އަޣުލަބިއްޔަތު ޑިމޮކްރަޓުންނަށް ލިބޭނެކަމާއިމެދުވަނީ ސުވާލު އުފެދިފައެވެ.