އެން.ބީ.އޭ. ބާސްކެޓްބޯޅަ މުބާރާތުގައި ގޯލްޑަން ސްޓޭޓް ވޮރިއަރސް އާއި ޑެލަސް މެވްރިކްސް ބައްދަލުކުރިމެޗް ވޮރިއަރސް ކާމިޔާބުކޮށްފިއެވެ. މިމެޗް ވޮރިއަރސް ކާމިޔާބުކުރީ 147 ޕޮއިންޓް 116 ޕޮއިންޓުންނެވެ.
މިމެޗްގައި ވޮރިއަރސްއަށް އެންމެ ރަނގަޅު ކުޅުމެއް ދެއްކީ 40 ޕޮއިންޓް ހޯދައިދީން ކެލީ އޮބްރޭ ޖޫނިއަރއެވެ. މިއީ އޭނާގެ ކެރިއަރގައި އެންމެ ގިނަ ޕޮއިންޓް ހޯދުނު މެޗެވެ. މީގެއިތުރުން ސްޓެފަން ކަރީވަނީ އެޓީމަށް 28 ޕޮއިންޓް ހޯދައިދީފައެވެ. މެވްރިކްސްއަށް އެންމެ ރަނގަޅު ކުޅުމެއް ދެއްކީ 27 ޕޮއިންޓް ހޯދައިދިން ލޫކާ ޑޮންޗިޗްއެވެ. އަދި ކްރިސްޓެޕްސް ޕޯޒިންގީޒްވަނީ އެޓީމަށް 25 ޕޮއިންޓް ހޯދައިދީފައެވެ.
މި މުބާރާތުގައި ޔޫޓާ ޖޭޒް އާއި އެޓްލާންޓާ ހޯކްސް ބައްދަލުކުރިމެޗް 112 ޕޮއިންޓް 91 ޕޮއިންޓުން ކާމިޔާބުކުރީ ޖޭޒްއެވެ. މިމެޗްގައި ޖޭޒްއަށް އެންމެ ރަނގަޅު ކުޅުމެއް ދައްކަދިނީ 23 ޕޮއިންޓް ހޯދާދިން ޖޯޑަން ކްލާކްސަންއެވެ. މީގެއިތުރުން ބޯޖާން ބޮގްޑަނޮވިޗްވަނީ އެޓީމަށް 21 ޕޮއިންޓް ހޯދައިދީފައެވެ. ހޯކްސްއަށް އެންމެ ގިނަ ޕޮއިންޓް ހޯދާދިނީ 17 ޕޮއިންޓް ހޯދާދިން ޖޯން ކޮލިންސްއެވެ.
ޕޯޓްލަންޑް ޓްރެއިލް ބްލޭޒަރސް އާއި ފިލަޑެލްފިއާ ސެވަންޓީ ސިކްސަރސް ބައްދަލުކުރިމެޗް 121 ޕޮއިންޓް 105 ޕޮއިންޓުން ކާމިޔާބުކުރީ ޓެރެއިލް ބްލޭޒަރސްއެވެ. ގިނަ ބަޔަކަށް ހައިރާންކަން ގެނުވި މި ނަތީޖާ ނެރުމުގައި ޓެރެއިލް ބްލޭޒަރސްއަށް އެންމެ މުހިންމު ދައުރެއްް އަދާކުރީ 24 ޕޮއިންޓް މިމެޗްގައި އެޓީމަށް ހޯދާދިން ގެރީ ޓްރެންޓް ޖޫނިއަރއެވެ. އަދި އެނެސް ކާންޓަރވަނީ 17 ޕޮއިންޓް ހޯދާދީ 18 ރީބައުންޑް ނަގާފައެވެ. މިމެޗްގައި ސިކްސަރސްއަށް އެންމެ ރަނގަޅު ކުޅުމެއް ދެއްކީ 37 ޕޮއިންޓް ހޯދާދިން ޖޮއެލް އެމްބިޑްއެވެ. މީގެއިތުރުން ހިއުސްޓަން ރޮކެޓްސް އާއި މެމްފިސް ގްރިޒްލީސް ބައްދަލުކުރިމެޗް 115 ޕޮއިންޓް 103 ޕޮއިންޓުން ކާމިޔާބުކުރީ ރޮކެޓްސްއެވެ.