މީގެ ގާތްގަނޑަކަށް 20 އަހަރު ކުރިން ބަންގްލަދޭޝްގެ މިހާރުގެ ބޮޑުވަޒީރު ޝައިޚު ހަސީނާގެ މޮޓޯކޭޑަށް ދިން ހަމަލާއަކާއި ގުޅިގެން އިދިކޮޅުގެ 50 އެކްޓިވިސްޓުން 10 އަހަރާއި 6 މައަށް ޖަލަށްލުމަށް ބަންގްލަދޭޝްގެ ކޯޓަކުން ހުކުމްކޮށްފިއެވެ.
2002ވަނަ އަހަރުގައި އޭރު އަވާމީ ލީގުގެ އިދިކޮޅު ލީޑަރުގެ ގޮތުގައި ހުންނެވި ޝައިޚު ހަސީނާ ގޮވައިގެން ދަތުރުކުރި މޮޓޯކޭޑަކަށް ބަޔަކުވަނީ ގަލާއި ބެޓަނާއި ކޯރާޑި ބޭނުންކޮށްގެން ޙަމަލާދީފައެވެ. މޮޓޯކޭޑަށް ޙަމަލާދިނުމާއި ގުޅިގެން ދައުވާ އުފުލާފައިވާ މީހުންގެ ތެރޭގައި ބަންގުލަޑޭޝް ނޭޝަނަލް ޕާޓީ، (ބީއެންޕީ)އަށް ނިސްބަތްވާ ޤާނޫނުހަދާ މަޖިލީހުގެ ކުރީގެ މެންބަރެއް ހިމެނެއެވެ. ހާދިޘާ ހިންގިއިރު އެ ޤައުމުގެ ވެރިކަން ކުރަމުން ދިޔައީ ބަންގްލަދޭޝް ނޭޝަނަލް ޕާޓީއެވެ.
އެ ޙަމަލާ ދިނުމުގައި ބައިވެރިވި މީހުންގެ ތެރެއިން ކުރީގެ މަޖިލީސް މެންބަރު ހިމެނޭގޮތަށް 3 މީހަކަށްވަނީ 10 އަހަރުގެ ޖަލު ހުކުމެއް އިއްވާފައެވެ. ބާކީ ތިބި މީހުންނަށް 4.5 އަހަރުން ފެށިގެން މަތީގެ ޖަލު ހުކުމްތައްވަނީ އިއްވާފައެވެ. އެ ހުކުމްތައް އިއްވާފައިވަނީ ބަންގްލަދޭޝްގެ ސަތުޚީރާ ސިޓީގެ ޑިސްޓްރިކްޓު ކޯޓުންނެވެ. ކޯޓުން ހުކުމް އިއްވާފައިވާ މީހުންގެ ތެރެއިން 12 މީހުންނަކީ މިހާރުވެސް ފިލައިގެން އުޅޭ މީހުންނެވެ.
މައްސަލާގައި ބައިވެރިވި ޕްރޮސެކިއުޓަރުން ބުނީ 2002ވަނަ އަހަރު ޝައިޚު ހަސީނާއަށް ދީފައިވާ ޙަމަލާއަކީ އެކަމަނާގެ ފުރާނައަށް ގެއްލުން ދިނުމަށް ދީފައިވާ އެތައް ޙަމަލާތަކުގެ ތެރެއިން ޙަމަލާއެއްކަމަށެވެ. އެ ހާދިޘާގައި އެކަމަނާގެ ހަށިކޮޅަށް އެއްވެސް ގެއްލުމެއް ލިބިފައެއް ނުވެއެވެ. ނަމަވެސް އަވާމީ ލީގުގެ ގިނަ ޢަދަދެއްގެ ސަޕޯޓަރުންނާއި ނޫސްވެރިން އެ ހާދިޘާގައިވަނީ ޒަޚަމްވެފައެވެ.
ކޯޓުން ކުރި ހުކުމާއިގުޅޭގޮތުން އިދިކޮޅު ބީއެންޕީން މިހާތަނަށް އެއްވެސް އެއްޗެއް ބުނެފައެއް ނުވެއެވެ. އެ ޕާޓީގެ ލީޑަރު އަދި ބޮޑުވަޒީރު ހަސީނާގެ ހަތުރުކަމުގައިވާ ޚާލިދާ ޒިޔާ މިވަގުތުދަނީ ކޮރަޕްޝަންގެ މައްސަލައެއްގައި 17 އަހަރުގެ ޖަލު ހުކުމެއް ފުރިހަމަ ކުރައްވަމުންނެވެ. 2002ވަނަ އަހަރުގެ ހާދިޘާ ހިންގި އިރު ބަންގްލަދޭޝްގެ ބޮޑުވަޒީރުގެ މަޤާމުގައި ހުންނެވި ޚާލިދާ ޒިޔާއާއި ދެކޮޅަށް ހުކުމްކޮށްފައިވަނީ 2018ވަނަ އަހަރުގެ ތެރޭގައެވެ.
ބީއެންޕީންވަނީ ބޮޑުވަޒީރު ޝައިހު ހަސީނާ ވެރިކަމުގައި ހުންނެވި 12 އަހަރު ދުވަހުގެ ތެރޭގައި އެ ޕާޓީއަށް ނިސްބަތްވާ އެތައްހާސް އެކްޓިވިސިންޓުންނެއް ބޭއިންސާފުން ޖަލަށް ލަމުންދާކަމުގެ ތުހުމަތުކޮށްފައެވެ. 2004ވަނަ އަހަރުގައި ބޭއްވި ޝައިޚު ހަސީނާގެ އެއްވުމަކަށް ދިން ގްރެނޭޑު ޙަމަލާއެއްގައި ޚާލިދާ ޒިޔާގެ ދަރިކަލުންކަމުގައިވާ ތާރިޤު ރަޙްމާން ޢަދާކޮށްފައިވާ ދައުރަށް އޭނާ އުމުރަށް ޖަލަށްލުމަށްވެސް 2018ވަނަ އަހަރުގައިވަނީ ހުކުމްކޮށްފައެވެ. ނަމަވެސް 2008ވަނަ އަހަރުގެ ތެރޭގައި އޭނާއާއި އޭނާގެ ޢާއިލާއިންވަނީ ބަންގުލަދޭޝް ދޫކޮށް އިނގިރޭސިވިލާތުގެ ލަންޑަނަށް ހިޖުރަކޮށްފައެވެ. ގުރެނޭޑު ޙަމަލާއާއި ގުޅިގެން 19 މީހަކު މެރުމަށްވެސް ކޯޓުންވަނީ ހުކުމްކޮށްފައެވެ.