ކޯވިޑް-19 ފެތުރެން ފެށިތާ އަހަރެއް ފަހުން އިންޑިޔާގައި ފަރުވާ ހޯދާ މީހުންގެ އަދަދު ވަރަށް ބޮޑަށް ދަށަށް ގޮސްފިއެވެ.
އިންޑިޔާގައި މިހާތަނަށް 10.7 މިލިއަން މީހުންނަށް ކޯވިޑް-19 ޖެހިފައިވާއިރު އެ ބަލީގައި 154،000އަށްވުރެ ގިނަ މީހުންވަނީ މަރުވެފައެވެ. އެ ޤައުމު އޮތީ ދެވަނައަށް އެންމެ ގިނަ ޢަދަދެއްގެ މީހުންނަށް ބަލިޖެހިފައިވާ ޤައުމުގެ ގޮތުގައެވެ. ފާއިތުވި 24 ގަޑިއިރުގެ ތެރޭގައި އެ ޤައުމުގައި ބަލިޖެހިފައިވަނީ 13،055 މީހުންނަށެވެ. އަދި އިއްޔެއާއި ހަމައަށް ބަލިން ފަސޭހަ ނުވާ މީހުންގެ ޢަދަދު ހުރީ 171،808ގައެވެ. އެއީ ފާއިތުވި ހަތް މަސް ދުވަހުގެ ތެރޭގައި ބައްޔަށް ފަރުވާ ހޯދާ މީހުންގެ ޢަދަދު އެ ޤައުމުގައި އެންމެ ދަށްވި މިންވަރެވެ.
އިންޑިޔާގައި ކޯވިޑް-19 ޖެހިފައިވާ މީހަކު އެންމެ ފުރަތަމަ ފެނިފައިވަނީ މީގެ އެއް އަހަރު ކުރިން އެ ޤައުމުގެ ކެރެލާ ސްޓޭޓުންނެވެ. އޭނާއަކީ އެންމެ ފުރަތަމަ ބަލި ފެތުރެންފެށި ޗައިނާގެ ވުހާން ސިޓީއިން އިންޑިޔާއަށް ދަތުރުކުރި ދަރިވަރެކެވެ.
މިދިޔަ އަހަރުގެ މާރިޗު މަހުގެ ތެރޭގައި އިންޑިޔާގައި ބަލި ފެތުރުން ހުއްޓުވުމަށް އިންޑިޔާގެ ބޮޑުވަޒީރު ނަރެންދްރާ މޯދީގެ ސަރުކާރުންވަނީ މުޅި ޤައުމުގައި ހަރުކަށި ފުރަބަންދެއް ޤާއިމްކޮށްފައެވެ. އެ ފުރަބަންދާއިއެކު އެ ޤައުމުގެ އެތެރޭގެ ދަތުރުތަކާއި ބައިނަލްއަޤްވާމީ ދަތުރުތައް ހުއްޓުމަކަށް އައިސް، ކާރުޚާނާތަކާއި މަދަރުސާތަކާއި އިދާރާތަކާއި ކޮންމެހެން ދޭންޖެހޭ ޚިދުމަތްތައްދޭ ވިޔަފާރިތައް ނޫން ވިޔަފާރިތައްވަނީ ބަންދުކޮށްފައެވެ. ނަތީޖާއެއްގެ ގޮތުން އެ ޤައުމުގެ އިޤްތިޞާދަށް ބޮޑު ހީނަރުކަމެއްވަނީ އައިސްފައެވެ. އޭރުންސުރެ ހިންގަމުންދާ ފިސްކަލް އަހަރު މި އަހަރުގެ މާރިޗު މަހުގެ 31ވަނަ ދުވަހުގައި ހަމަވުމުން އިންޑިޔާގެ އިޤްތިޞާދަށް 7.7 އިންސައްތައިގެ ހީނަރުކަމެއް އަންނާނެކަމަށްވަނީ ބެލެވިފައެވެ.
އިންޑިޔާގައި ތަންފީޒުކޮށްފައިވާ ފުރަބަންދުގެ އުސޫލުތަކަށް ލުއި ދޭން ފަށާފައިވަނީ މިދިޔަ އަހަރުގެ ޖޫން މަހުގެ ތެރޭގައެވެ. އޭޕްރިލް މަހާއި ހަމައަށް ބަލިޖެހޭ މީހުންގެ ޢަދަދު ދަށްކޮށް ހުރުމަށްފަހު މެއި މަހުން ފެށިގެން ބަލިޖެހޭ މީހުންގެ ޢަދަދު އަނެއްކާވެސްވަނީ އިތުރުވާން ފަށައިފައެވެ. އެ ޤައުމުގައި ބަލިޖެހޭ މީހުންގެ ޢަދަދު އެންމެ ބޮޑަށް އިތުރުވީ މިދިޔަ ސެޕްޓެމްބަރު މަހުގެ މެދުތެރޭގައެވެ. އޭރު ދުވާލަކު 100،000 މީހުންނަށް ދިޔައީ ބަލިޖެހެމުންނެވެ.
ސެޕްޓެމްބަރު މަހަށްފަހު އިންޑިޔާގައި ބަލިފެތުރޭ މިންވަރު އަނެއްކާވެސްވަނީ މަޑުޖެހިލައިފައެވެ. ފާއިތުވި 24 ގަޑިއިރުގެ ތެރޭގައި 13،083 މީހުންނަށް ބަލިޖެހިފައިވާއިރު އެއީ މިހާތަނަށް ދުވާލެއްގެ މައްޗަށް ބަލިޖެހުނު މީހުންގެ ޢަދަދު އެންމެ ދަށްވި އެއް ދުވަހެވެ. މި މަސް ފެށުނު އިރު ދުވާލެއްގެ މައްޗަށް 20،000 މީހުންނަށް ދިޔައީ ބަލިޖެހެމުންނެވެ.
އިންޑިޔާގައި ކޯވިޑް-19އަށް މިވަގުތު ފަރުވާ ހޯދަމުންދަނީ 170،000އެއްހާ މީހުންނެވެ. މީގެ ކުރިން އެ ޢަދަދާއި އެއްވަރަށް މީހުން ފަރުވާ ހޯދަމުންދިޔައީ މިދިޔަ އަހަރުގެ ޖޫން މަހުގެ ތެރޭގައެވެ. އެ ޤައުމުގައި ގިނަ ޢަދަދެއްގެ މީހުންނަށް ބަލިޖެހިފައިވާ ނަމަވެސް އޭގެ ތެރެއިން ބަލީގައި މަރުވެފައިވަނީ 154،147 މީހުންނެވެ. އެއީ ބަލި ޖެހުނު މީހުންގެ ނިސްބަތުން ބަލާނަމަ ދަށް ޢަދަދެކެވެ. ބެލެވޭ ގޮތުގައި އެ ޤައުމުގައި ބަލީގައި މަރުވާ މީހުންގެ ޢަދަދު ދަށީ އެ ޤައުމުގެ އާބާދީގެ ބޮޑު ބައެއް ޙިއްޞާކުރަނީ ޒުވާނުންކަމުގައި ވާތީއެވެ.
އިންޑިޔާގައި ކޯވިޑް-19އަށް ވެކްސިން ދޭން ފަށާފައިވަނީ މިމަހުގެ 16ވަނަ ދުވަހުގައެވެ. ދުނިޔޭގެ ދެވަނައަށް އެންމެ ބޮޑު އާބާދީއެއް އޮންނަ އިންޑިޔާގައި ވެކްސިން ދޭން ފެށުމުގެ ފުރަތަމަ ދެ ހަފުތާގެ ތެރޭގައި ޞިއްޙީ ޚިދުމަތްތެރިންގެ ތެރޭގައި ހިމެނޭ 3.5 މިލިއަން މީހުންނަށްވަނީ ވެކްސިން ދީފައެވެ. މި އަހަރުގެ ޖުލައި މަހާއި ހަމައަށް އިންޑިޔާގެ 300 މިލިއަން މީހުންނަށް ވެކްސިން ދިނުމަށް އެ ޤައުމުންވަނީ އަމާޒު ހިފާފައެވެ.