ކުރިއަށް އޮތް ލޯކަލް ކައުންސިލްތަކުގެ އިންތިޚާބަށް ކެމްޕެއިންކުރުމަށް ވާދަވެރި އިދިކޮޅު ފަރާތްތަކަށް ނުލިބޭ ފުރުޞަތެއް އެމްޑީޕީންވެސް ބޭނުންނުކުރާނެ ކަމަށް އެޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ކުރިއަށް އޮތް ލޯކަލް ކައުންސިލްތަކުގެ އިންތިޚާބާއި، އަންހެނުންގެ ތަރައްޤީއަށް މަސައްކަތްކުރާ އިންތިޚާބާއި ގުޅޭގޮތުން، މިއަދު އެމްޑީޕީގެ އޮފީހުގައި ނޫސްވެރިންނާއި ބައްދަލުކުރައްވާ ވާހަކަފުޅު ދައްކަވަމުން ރައީސް ނަޝީދު ވިދާޅުވީ، ކުރިއަށް އޮތް އިންތިޚާބަކީ ވާދަވެރިން ތިންވަނަ ފަހަރަށް ބަލިކުރާނެ އިންތިޚާބުކަމަށާއި، އެ އިންތިޚާބުގައި އިދިކޮޅު ފަރާތްތައް ބޮޑު ބައްޔަކުން ބަލިކުރާނެކަމަށެވެ. އަދި އިންތިޚާބުން އެމްޑީޕީ ބަލިވާނެ އެއްވެސް ފުރުޞަތެއް ނެތްކަމަށްވެސް ރައީސް ނަޝީދު ވިދާޅުވިއެވެ.
ރައީސް ނަޝީދު މިހެން ވިދާޅުވެފައިވާއިރު، އެންމެ ފަހުން ބޭއްވި ދެ އިންތިޚާބުވެސް އެމްޑީޕީން ވަނީ ބޮޑު އަޣްލަބިއްޔަތަކުން ކާމިޔާބުކޮށްފައެވެ. އެގޮތުން ރިޔާސީ އިންތިޚާބާއި، މަޖިލިސް އިންތިޚާބުވެސް ކާމިޔާބުކުރީ އެމްޑީޕީންނެވެ. ރައީސް ނަޝީދު ވިދާޅުވީ، ރާއްޖޭގެ ހުރިހާ ސަރަހައްދެއްގެ އިންތިޚާބުގެ ގޮނޑި ކާމިޔާބުކުރާނީ ވެސް އެމްޑީޕީން ކަމަށެވެ.
"ޕީޕީއެމްއާއި ޕީއެންސީއަށް ނުލިބޭ ފުރުސަތެއް އަޅުގަނޑުމެން ނުނަގާނެ، އެފަދަ ފުރުސަތެއް ސަރުކާރުން ނުވެސް ދޭނެ. އަޅުގަނޑުމެންނަކަށްވެސް ނާޖާއިޒް ފައިދާތަކެއް ނުނެގޭނެ." އެމްޑީޕީގެ ރައީސް މުޙައްމަދު ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ، ރަށްރަށަށް ގޮސް ކަރަންޓީނުގެ މުއްދަތު ފުރިހަމަކުރުމަށްފަހުގައިވެސް، އިންތިޚާބަށް ކެމްޕެއިން ކުރުމަށް ތައްޔާރަށް އެޕާޓީ އޮތްކަމަށެވެ. އެހެންކަމުން އެޕާޓީންކެމްޕެއިން ކުރާނީ އެޗްޕީއޭގެ ގައިޑްލައިނާއި އެއްގޮތަށްކަމަށާއި، ވާދަވެރިންނަށް ނުލިބޭ ފުރުޞަތެއް އެމްޑީޕީންވެސް ބޭނުން ނުކުރާނެކަމަށް ރައީސް ނަޝީދު ވިދާޅުވިއެެވެ. ރައީސް ނަޝީދު ވިދާޅުވީ، ގަސްދުކުރައްވަނީ އެޕާޓީގެ ފަރާތުން ހުރިހާ ރަށެއްގައިސް ކަރަންޓީން ވުމަށްކަމަށާއި، އެއީ އުނދަގޫ މަސައްކަތެއްނަމަވސް ގައިޑްލައިންގެ ތެރެއިން އެކަން ކުރައްވާނެކަމަށެވެ. ރައީސް ނަޝީދު ވިދަޅުވީ ރާއްޖޭގެ އެކި ކަންކޮޅުތަކުގައި ހިންގާ މަޝްރޫޢުތައް ރައްޔިތުންނަށް ވަރަށް ސާފުކޮށް އެނގޭކަމަށެވެ.
އަންނަ އޭޕްރީލް މަހުގެ 10 ވަނަދުވަހު ބޭއްވުމަށް ނިންމާފައިވާ ލޯކަލް ކައުންސިލްތަކާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބަށް ކެމްޕެއިން ކުރުމަށް ފުރުޞަތު ނުލިބޭކަމަށް ބުނެ އިދިކޮޅު ފަރާތްތަކުން ދަނީ ކަންބޮޑުވުން ފާޅުކުރަމުންނެވެ. ނަމަވެސް އިލެކްޝަންސް ކޮމިޝަނުން ބުނެފައިވަނީ، އިންތިޚާބުގައި ވާދަކުރާ ހުރިހާ ފަރާތްތަކަށްވެސް ކެމްޕެއިންކުރުމަށް ހަމަހަމަ ފުރުޞަތު އޮންނާނެކަމަށާއި، އެޗްޕީއޭގެ ގައިޑްލައިނާއި އެއްގޮތަށް އެކަން ކުރެވޭނެކަމަށެވެ.