ސަރުކާރުގެ އެންމެ އިސް މަޤާމުތަކުގައި އަންހެނުން ބޭފުޅުން މިވަގުތު ތިބި ހަމައެކަނި ޤައުމަށް އެސްޓޯނިއާ ވެއްޖެއެވެ.
އެސްޓޯނިއާގެ ރައީސްގެ މަޤާމާއި ބޮޑުވަޒީރުގެ މަޤާމު މިވަގުތު ފުރުއްވަމުންދަނީ އަންހެން ދެ ބޭފުޅުންނެވެ. އެއީ ރައީސާ ކޭސްޓީ ކަލްދިއުލައިދާއި ބޮޑުވަޒީރު ކަޔާ ކައްލާސްއެވެ. އެ ދެ ކަނބަލުންވެސް މަޤާމަށް ހޮވިވަޑައިގެންފައިވަނީ ވޯޓުންނެވެ.
އެސްޓޯނިއާގައި ނޫނަސް ޤައުމުގެ އިސްވެރިޔާ އަދި ބޮޑުވަޒީރުގެ މަޤާމުގައި އަންހެން ބޭފުޅުން ތިން ޤައުމެއްގައި ތިއްބަވައެވެ. އެއީ ނިއުޒީލެންޑާއި ބާބަޑޮސް އަދި ޑެންމާކުގައެވެ. ނިއުޒީލޭންޑާއި ބާބަޑޮސްގެ ބޮޑުވަޒީރުންނަކީ އަންހެން ބޭކަނބަލުންނަށްވީނަމަވެސް އެ ދެ ޤައުމުގެ ހެޑް އޮފް ސްޓޭޓަކީ އިނގިރޭސިވިލާތުގެ ރާނީ އެލިޒަބެތު ދެވަނައެވެ. ޑެންމާކުގެ ބޮޑުވަޒީރުގެ މަޤާމުގައި އަންހެން ބޭފުޅަކު ހުންނެވިއިރު އެ ޤައުމުގެ ހެޑް އޮފް ސްޓޭޓަކީ ރާނީ މާގުރިތާ ދެވަނައެވެ. އެ ޤައުމުތަކާއި އެސްޓޯނިއާއާއި ހުރި ތަފާތަކީ އެސްޓޯނިއާގެ އެންމެ މަތީ ދެ ވެރިންވެސް ހޮވިވަޑައިގެންފައިވަނީ ވޯޓުން ކަމަށްވުމެވެ.
އެސްޓޯނިއާގެ މިހާރުގެ ރައީސާ، ކޭސްޓީ ކަލްދިއުލައިދު ރައީސްކަމުގެ މަޤާމަށް ޤާނޫނު ހަދާ މަޖިލީހުން ހޮވީ 2016ވަނަ އަހަރުގައެވެ. އެކަމަނާ ވެގެންގޮސްފައިވަނީ އެސްޓޯނިއާގެ ރައީސްކަން ކުރައްވާ ފުރަތަމަ އަންހެން ކަނބަލަށެވެ. މި މަހުގެ 26ވަނަ ދުވަހުން ފެށިގެން އެސްޓޯނިއާގެ ސަރުކާރުގެ ވެރިއެއްގެ ގޮތުގައި ކަޔާ ކައްލާސްވަނީ އައްޔަނުކޮށްފައެވެ. ކަޔާ ކައްލާސްއަކީ އެސްޓޯނިއާގެ ރިފޯމް ޕާޓީގެ ލީޑަރެވެ. އެކަމަނާއަކީ އެސްޓޯނިއާގެ ބޮޑުވަޒީރުގެ މަޤާމު ފުރުއްވާ ފުރަތަމަ އަންހެން ބޭފުޅާވެސް މެއެވެ.
އެސްޓޯނިއާގެ ވެރިކަން ކުރަމުންދިޔަ ސެންޓަރ ޕާޓީގެ ކޯލިޝަން މިމަހުގެ 14 ވަނަދުވަހު ރޫޅުމުން އައު ސަރުކާރު އެކުލަވާލުމަށް ބޮޑުވަޒީރުކަން ދިނުމަށް ކައްލާސްގެ ނަން ހުށައެޅުއްވީ ރައީސް ކަލްދިއުލައިދުއެވެ. ކައްލާސްއާއި އެކަމަނާގެ ވަޒީރުންނަށް ޤާނުނު ހަދާ މަޖިލީހުން ރުހުން ދިނީ މިދިޔަ ހޯމަދުވަހުއެވެ. އެއާއިއެކު އެކަމަނާ ހުންނަވާނީ ރިފޯމް ޕާޓީއާއި ސެންޓަރ ޕާޓީއާއި ދެމެދު އުފައްދާފައިވާ ކޯލިޝަންގެ ލީޑަރުގެ ގޮތުގައެވެ.
ކައްލާސް ވަޒީރުންގެ މަޖިލީހުގެ 46.7 އިންސައްތަ ޙިއްޞާކުރާނީ ވެސް އަންހެން ވަޒީރުންނެވެ. އެއީ އެ ޤައުމުގެ ވަޒީރުންގެ މަޖިލީހެއްގައި އެހާ ގިނަ ޢަދަދެއްގެ އަންހެން ވަޒީރުން ހިމެނޭ ފުރަތަމަ ފަހަރެވެ.
މީގެ ކުރިން ފިންލޭންޑުގެ އެންމެ އިސް ދެ މަޤާމުގައި ދެ އަންހެން ބޭފުޅުން ތިއްބެވި އިރެއްވެސް ދިޔައެވެ. 2000ވަނަ އަހަރުން 2012ވަނަ އަހަރަށް ފިންލޭންޑުގެ ރައީސާގެ މަޤާމުގައި ތާރިޔާ ހަލޯނެން ހުންނެވިއިރު ސަރުކާރުގެ އެންމެ އިސް ބޭފުޅުންގެ މަޤާމުގައި ދެ އަންހެން ބޭފުޅުން ތިއްބެވިއެވެ. އެއީ 2003ވަނަ އަހަރާއި 2010ވަނަ އަހަރާއި 2011ވަނަ އަހަރުގައެވެ.
އޭގެ އިތުރުން ސްރީލަންކާގައިވެސް އަންހެން ރައީސަކާއި ބޮޑުވަޒީރަކު ހުންނެވި އިރެއްވެސް ދިޔައެވެ. އެއީ 1994ވަނަ އަހަރުން 2005ވަނަ އަހަރާއި ހަމައަށް ރައީސާކަން ކުރެއްވި ޗަންދްރިކާ ކުމާރުތުންގާގެ ވެރިކަމުގައެވެ. އެގޮތުން އެކަމަނާގެ ވަރިކަމުގައި 1994ވަނަ އަހަރުން 2000ވަނަ އަހަރުގެ ނިޔަލަށް ބޮޑުވަޒީރުގެ މަޤާމުގައި ހުންނެވީ ސިރިމާވޯ ބަންޑާރަނަޔަކައެވެ.