އިނގިރޭސި އެފް.އޭ. ކަޕްގެ ހަތަރު ވަނަ ބުރުގައި އިންގްލިޝް ޕްރިމިއަރ ލީގުގެ ލެސްޓަރ ސިޓީއާއި ޗެމްޕިއަންޝިޕްގެ ބްރެންޓްފަޑް ބައްދަލުކުރިމެޗް ލެސްޓަރ ކާމިޔާބުކޮށްފިއެވެ. ބްރެންޓްފަޑްގެ ދަނޑުގައި ކުޅުނު މިމެޗް ލެސްޓަރ ކާމިޔާބުކުރީ ފަހަތުން އަރާ 3 ލަނޑު އެއްލަނޑުންނެވެ.
ވާދަވެރި ކުޅުމެއް ފެނިގެންދިޔަ މިމެޗްގެ ފުރަތަމަ ލަނޑު މެޗްގެ 6 ވަނަ މިނެޓްގައި ޖަހާފައިވަނީ ބްރެންޓްފަޑްގެ ބެޗް ސޮރެންސަންއެވެ. އަދި ފުރަތަމަ ހާފްގައި ރަގަޅަށް ކުޅެ ގިނަ ހަމަލާ އުފައްދާފައިވަނީވެސް ބްރެންޓްފަޑްއިންެނެވެ. ގިނަ ބަދަލުތަކަކާއެކު މިމެޗަށް ނިކުން ލެސްޓަރއަށް ފުރަތަމަ ހާފްގައި މާއެދެވޭ ކުޅުމެއް ނުދެއްކުނެވެ. ނަމަވެސް މިމެޗްގެ ދެވަނަ ހާފްގައި ލެސްޓަރއިން ވަނީ އެޓީމްގެ ކުޅުން ރަގަޅުކޮށްފައެވެ. އަދި މެޗްގެ 49 ވަނަ މިނެޓްގައި ޗެންގީޒް އުންޑަރ ޖަހާދިން ލަނޑުން ލެސްޓަރއިން މެޗްގެ ނަތީޖާ ހަމަހަމަކުރިއެވެ. އަދި އޭގެ ފަސް މިނެޓްފަހުން ލިބުނު ޕެނަލްޓީއަކުން ލެސްޓަރއަށް މިމެޗްގައި ފުރަތަމަ ފަހަރަށް ލީޑު ނަގާދިނީ ޔޫރީ ޓިއެލެމަންސްއެވެ. މިމެޗްގައި ލެސްޓަރއިން ޖެހި ތިންވަނަ ލަނޑު މެޗްގެ 71 ވަނަ މިނެޓްގައި ޖަހާދިނީ މިމެޗްގައި ރަގަޅު ކުޅުމެއް ދެއްކި ޖޭމްސް މެޑިސަންއެވެ.
މިކާމިޔާބީއާއެކު ލެސްޓަރ މިހާރުވަނީ އެފް.އޭ. ކަޕްގެ ފަސްވަނަ ބުރަށް ދަތުރުކޮށްފައެވެ. ފަސްވަނަ ބުރުގައި ލެސްޓަރ ބައްދަލުކުރާނީ ބްރައިޓަން އެންޑް ހޯވް އެލްބިއަންއާއެވެ. ބްރައިޓަން ފަސްވަނަ ބުރުން ޖާގަހޯދީ ބްލެކްޕޫލް އާ ބައްދަލުކުރިމެޗް ކާމިޔާބުކޮށްގެންނެވެ.