ކޮޕާ އިޓާލިއާގެ ކްއާޓަރ ފައިނަލުން އެޓެލާންޓާ ޖާގަހޯދައިފިއެވެ. މިމުބާރާތުގެ ކްއާޓަރ ފައިނަލުން އެޓެލާންޓާ ޖާގަހޯދީ ކަގްލިއާރީއާ ރޭ ބައްދަލުކުރި މެޗް 3 ލަނޑު އެއް ލަނޑުން ކާމިޔާބުކޮށްގެންނެވެ.
އެޓެލާންޓާގެ ދަނޑުގައި ކުޅުނު މިމެޗްގެ ފުރަތަމަ ލަނޑު ފުރަތަމަ ހާފް ނިމެން ދެ މިނެޓަށް ވެފައިވަނިކޮށް ޖަހާދިނީ އެޓެލާންޓާގެ އެލެކްސީ މިރާންޗުކެވެ. މި ލަނޑާއި އެކު ފުރަތަމަ ހާފް އެޓެލާންޓާ ކުރީގައި އޮވެގެން ނިންމާލި ނަމަވެސް ދެވަނަ ހާފްގެ 55 ވަނަ މިނެޓްގައި ގަގްލިއެލްމޯ ވިކާރިއޯ ތަނަވަސްކޮށްދިން ފުރުސަތެއްގައި ކަގްލިއާރީގެ ރިކާޑޯ ސޮޓިލްވަނީ ލަނޑެއް ޖަހާ މެޗްގެ ނަތީޖާ ހަމަހަމަކޮށްފައެވެ. މިމެޗްގައި ދެވަނަ ފަހަރަށް އެޓެލާންޓާއިން ލީޑު ނެގީ މެޗްގެ 61 ވަނަ މިނެޓްގައި ލުއިސް މޫރިއާލް ޖަހާދިން ލަނޑުންނެވެ. މިލަނޑަކީ ރޮބިން ގޮސެންސް ތަނަވަސްކޮށްދިން ފުރުސަތެއްގައި އޭނާ ޖަހި ލަނޑެކެވެ. މިމެޗްގައި އެޓެލާންޓާގެ ފަހު ލަނޑު އޭގެ ތިން މިނެޓްފަހުން ޖަހާދިނީ ބޮސްކޯ ސުޓާލޯއެވެ.
ކޮޕާ އިޓާލިއާގެ ކްއާޓަރ ފައިނަލުން މިހާތަނަށްވަނީ އެޓެލާންޓާގެ އިތުރުން އޭސީ މިލާނާއި އިންޓަރ މިލާން، ނަޕޯލީ، ޔުވެންޓާސް، ސްޕާލް ޖާގަހޯދާފައެވެ. މިމުބާރާތުގެ ކްއާޓަރ ފައިނަލްގެ ފަހު ދެޖާގަ ކަށަވަރުވެގެން ދާނީ މި ފެށޭ ހަފްތާގައި އޭއެސް ރޯމާ އާއި ސްޕެޒިއާ ބައްދަލުކުރާ މެޗާއި ލާޒިއޯ އާއި ޕާރމާ ބައްދަލުކުރާ ދެމެޗަށްފަހުއެވެ.