ސަރުކާރުގެ މައި ހޮސްޕިޓަލް އައިޖީއެމްއެޗުގައި ހަދާފައިވާ ރެސްޕިރޭޓަރީ މެޑިސިން ޑިޕާޓްމަންޓްގެ މަސައްކަތް ކޮށްފައިވަނީ ފިނޭންސް މިނިސްޓްރީން ހުއްދަދިން އަގަށްވުރެ ބޮޑު އަގުގައިކަން އޮޑިޓް ރިޕޯޓުން ހާމަވެއްޖެއެވެ.
މި ޑިޕާޓްމަންޓްގެ ޢަމަލީ މަސައްކަތަކީ 2018ވަނަ އަހަރު އެ ހޮސްޕިޓަލުން ސިފައިންގެ ވެލްފެއަރ ކުންފުނި ސިވެކާ ޙަވާލުކޮށްގެން ކުރިއަށްގެންދިޔަ މަސައްކަތެކެވެ.
އޮޑިޓަރ ޖެނެރަލްގެ އޮފީހުން ނެރެފައިވާ އައިޖީއެމްއެޗްގެ 2018ވަނަ އަހަރުގެ އޮޑިޓް ރިޕޯޓްގައިވަނީ، އެކި މަސައްކަތްތައް ޙަވާލުކުރުމާއި އެކަށީގެންވާގޮތަށް އެއްބަސްވުންތައް ނެތި ފައިސާއާގުޅޭ އެކިއެކި މުޢާމަލާތްތައް ކޮށްފައިވާ މައްސަލަތައް ހާމަކޮށްފައެވެ.
ޕްރޮކިއުންމަންޓާ ގުޅޭ އެންމެބޮޑު މައްސަލައެއްގެ ގޮތުގައި ފާހަގަކުރައްވާފައިވަނީ އައިޖީއެމްއެޗްގައި 2018ވަނަ ހެދި ނެވާލާނިޒާމާ ގުޅޭ ބަލިތަކުގެ ޑިޕާޓްމަންޓްގެ މައްސަލައެވެ. އޮޑިޓް އޮފީހުން ވިދާޅުވީ މިމަސައްކަތް ކުރުމަށް ފިނޭނެސް މިނިސްޓްރީން ހުއްދަދިނީ 36.8 މިލިއަން ރުފިޔާއަށްކަމަށެވެ. ނަމަވެސް ބަދަލުގެނެސްފައިވާ ކޯޓޭޝަންގައި މިޢަދަދު ވަނީ 38 މިލިއަން ރުފިޔާއަށް އިރުރުކޮށްފައެވެ. މިއީ ކަނޑައެޅި އަގަށްވުރެ 1،276،023 (އެއް މިލިއަން ދުއިސައްތަ ހަތްދިހަ ހަ ހާސް ތޭވިސް ރުފިޔާ)ރުފިޔާ އިތުރު ޢަދަދެކެވެ.
Audit Report: Indira Gandhi Memorial Hospital (IGMH) Audit Report Financial Year 2018https://t.co/PZYO4bspFt
— AGO (@AuditMV) January 12, 2021
ކޯޓޭޝަންތަކުގައިވާ އަގު ހުއްދަދީފައިވާ އަގަށްވުރެ ބޮޑުކޮށްފައިވަނީ ރެސްޕިރޭޓަރީ މެޑިސިން ޑިޕަރޓްމަންޓަށް ބޭނުންވާ މެޝިނަރީއާއި އިކުއިޕްމަންޓް ހޯދުމަށެވެ. އެގޮތުން އޮފީސް ޑެސްކާއި ކޮންސަލްޓޭޝަން ޑެސްކާއި ސައިޑް ޓޭބަލާއި ބަލިމީހުން ތިބޭ ގޮނޑިއާއި ހަތަރު ސީޓުގެ ގޮނޑި، އަދި ޖީއެސްޓީގެ ގޮތުގައި އިތުރުވި ހަތްދިހަ ދެ ހާސް ރުފިޔާއާއެކު ޖުމްލަ 1،276،023ރުފިޔާވަނީ އިތުރަށް ހިމަނާފައެވެ.
އަދި ހޯދަން އުޅުނު ބައެއް މެޝިނާއި އިކުއިޕްމަންޓް ނުލިބުމުގެ ސަބަބުން ބަދަލުގެނައި ކޯޓޭޝަންތަކަށް ތަކެތި ގަނެފައިވަނީ، މިނިސްޓްރީ އޮފް ފިނޭންސްއަށް ހުށަހަޅައި ހުއްދަ ހޯދައިގެން ނޫންކަމަށް އޮޑިޓް އޮފީހުން ވިދާޅުވެއެވެ. މިތަކެތި ހޯދުމަށް އައިޖީއެމްއެޗްއިން 2،249،632 (ދެ މިލިއަން ދުއިސައްތަ ސާޅީސް ނުވަ ހާސް ހަ ސަތޭކަ ތިރީސް ދޭއް) ރުފިޔާ ޚަރަދުކޮށްފައިވެއެވެ. ނަމަވެސް މި ތަކެތި ގަތުމަށް ހުއްދަދިން ފައިސާއަށްވުރެ އިތުރަށް ފައިސާ ޚަރަދުކޮށްފައެއް ނުވެއެވެ.
ދަޢުލަތުގެ މާލިއްޔަތު ޤާނޫނު ބުނާގޮތުން މެޝިނަރީއާއި އަގުބޮޑު އިކުއިޕްމަންޓް ގަންނަންވާނީ ގެރެންޓީދޭ، އެ ބާވަތްތަކުގެ ތަކެތި އާއްމުކޮށް ވިއްކާ ތަންތަނުންނެވެ. ނަމަވެސް އައިޖީއެމްއެޗްއިން މުދާ ގަތުމުގައި މި ޤަވައިދާ އެއްގޮތަށް ޢަމަލުކޮށްފައި ނުވާކަމަށް އޮޑިޓް ރިޕޯޓްގައިވެއެވެ. އަދި ތަކެތި އޯޑަރުކޮށްފައިވާގޮތަށް ހަމައަށް ތަކެތި ހުރިތޯ ނުބަލައި ތަކެއްޗާ ހަވާލުވެ ފައިސާ ދައްކާފައިވާ މައްސަލަތަކެއްވެސް ފާހަގަކޮށްފައިވެއެވެ. އަދި ޤަވައިދާ ޚިލާފަށް އެޑްވާންސްގެ ގޮތުގައިވެސް ފައިސާ ދައްކާފައިވެއެވެ.
އޮޑިޓް އޮފީހުންވަނީ، މިގޮތަށް ތަކެތި ހޯދުމާއި، ކުރާ މަސައްކަތުގައި ފިނޭންސް މިނިސްޓްރީން ލަފާދޭ އަގުތަކުގައި މަސައްކަތްކުރުމާއި ބަދަލެއް ގެންނަންޖެހިއްޖެނަމަ މިނިސްޓްރީގެ ހުއްދަ ހޯދުމަށް އައިޖީއެމްއެޗްއަށް ލަފާދެއްވާފައެވެ.