އިނގިރޭސި އެފްއޭ ކަޕްގެ ހަތަރުވަނަ ބުރުން ވެސްޓް ހޭމް ޔުނައިޓެޑް ޖާގަހޯދައިފިއެވެ. މިމުބާރާތުގެ ހަތަރުވަނަ ބުރުން ވެސްޓް ހޭމް ޖާގަހޯދީ ތިންވަނަ ބުރުގައި ނޭޝަނަލް ލީގުގެ ސްޓޮކްޕޯޓް ކައުންޓީއާ ރޭ ބައްދަލުކުރިމެޗް 1 ލަނޑު ސުން ލަނޑުން މެޗް ކާމިޔާބުކޮށްގެންނެވެ.
ސްޓޮކްޕޯޓްގެ ދަނޑުގައި ކުޅުނު މިމެޗްގެ ހަމައެކަނި ލަނޑު މެޗްގެ 83 ވަނަ މިނެޓްގައި ޖަހައިދިނީ ކްރެއިގް ޑޯސަންއެވެ. މިމެޗް ކުޅެމުންދިޔައިރު ބޯކޮށް ވާރޭ ވެހެމުންދިއުމުގެ ސަބަބުން ދެޓީމުންކުރެ އެއްވެސް ޓީމަކަށް މާއެދެވޭ ކުޅުމެއް ދެއްކިފައެއް ނުވެއެވެ. މިމެޗަށް ވެސްޓް ހޭމްގެ ކޯޗް ޑޭވިޑް މޮޔޭސް ވަރުގަދަ ޓީމެއް ނެރުނު ނަމަވެސް މިމެޗްގެ ފުރަތަމަ ހާފްގައި ސްޓޮކްޕޯޓް ކޮޅަށް ލަނޑެއް ޖެހޭގޮތެއް ނުވިއެވެ.
މިމެޗުން މޮޅުވުމުން މިމުބާރާތުގެ ހަތަރުވަނަ ބުރުގައި ވެސްޓް ހަމް ބައްދަލުކުރާނީ ޑޮންކާސްޓަރ ރޯވަރސްއާއެވެ. އަދި ޑޮންކާސްޓަރ އާ އަމިއްލަ ދަނޑުގައި ބައްދަލުކުރާމެޗުން ވެސްޓެ ހޭމް މޮޅު ވެއްޖެ ނަމަ މިމުބާރާތުގެ ފަސްވަނަ ބުރުގައި މޮޔޭސްއަށް އޭނާގެ ކުރީގެ ޓީމް މެންޗެސްޓަރ ޔުނައިޓެޑާއި ވާދަކުރުމުގެ ފުރުސަތު ލިބިގެން ހިނގައިދާނެއެވެ. ނަމަވެސް އެއީ މެންޗެސްޓަރ އާއި ލިވަޕޫލް ހަތަރު ވަނަ ބުރުގައި ބައްދަލުކުރާމެޗުން މެންޗެސްޓަރ މޮޅުވެއްޖެ ނަމައެވެ.