އިންގްލިޝް ޕްރިމިއަރ ލީގުގެ 40 ކުޅުންތެރިންނާއި އޮފިޝަލުންނަށް މިދިޔަ ހަފްތާގައި ކޮރޯނާ ވައިރަސް ޖެހިފައިވާކަމުގައި ލީގުގެ އޮފިޝަލުން ހާމަކޮށްފިއެވެ.
މިއީ ކުރީ ހަފްތާތަކާ އަޅާބަލާއިރު ދެގުނަ އިތުރު އަދަދެކެވެ. ކުރީ ހަފްތާތަކުގައި ހަފްތާއަކު އެއް ފަހަރު ކުޅުންތެރިން ޓެސްޓް ކުރި ނަމަވެސް މިދިޔަ ހަފްތާގައި ޕްރިމިއަރ ލީގުން 2295 ޓެސްޓް ހަދާފައިވެއެވެ. ޕްރިމިއަރ ލީގުން ހާމަކުރާގޮތުގައި ޑިސެމްބަރ މަހުގެ 28 އިން 31 އަށް 28 ފަރާތެއް ޕޮސިޓިވް ވި އިރު 1 ޖަނަވަރީއާ 3 ޖަނަވަރީއާ ދެމެދު 12 ފަރާތެއް ކޯވިޑް19 އަށް ޕޮސިޓިވް ވެފައިވެއެވެ. މީގެކުރިން އެންމެ ގިނައިން ކުޅުންތެރިން ޕޮސިޓިވް ވެފައިވަނީ އޭގެ ކުރީ ހަފްތާގައެވެ. އެހަފްތާގައި ޕޮސިޓިވް ވެފައިވަނީ 18 ފަރާތެކެވެ.
އިންގްލިޝް ޕްރިމިއަރ ލީގުގެ ގަވައިދު ބުނާގޮތުން ކޮވިޑް ޖެހޭ ކުޅުންތެރިންނާއި އޮފިޝަލުން 10 ދުވަސް ވަންދެން އަމިއްލައަށް ކަރަންޓީން ވާޖެހެއެވެ. މިދިޔަ ހަފްތާގައި ތިން މެޗެއް ވަނީ ކޮރޯނާ ވައިރަހުގެ ސަބަބުން ފަސް ކޮށްފައެވެ. މިގޮތުން ފަސްކޮށްފައިވަނީ ޑިސެމްބަރ 28 ވަނަ ދުވަހު ކުޅުމަށް ހަމަޖެހިފައި އޮތް މެންޗެސްޓަރ ސިޓީއާއި އެވަރޓަންގެ މެޗާއި ފުލަމް ރަށުން ބޭރުގައި ކުޅެން ހަމަޖެހިފައި އޮތް ދެމެޗް ކަމުގައިވާ 30 ޑިސެމްބަރުގައި ޓޮޓްނަމްއާ ބައްދަލުކުރަން އޮތް މެޗާއި އަދި 3 ޖެނުއަރީގައި ބަރންލީ އާ ދެކޮޅަށް ކުޅެން އޮތް މެޗެވެ.
މެންޗެސްޓަރ ސިޓީއާއި ޗެލްސީ ބައްދަލުކުރި މެޗްގައި ސިޓީއިން ކުޅެފައިވަނީ ފުރަތަމަ ޓީމްގެ މުހިންމު 6 ކުޅުންތެރިޔަކާއި ނުލައެވެ. މިދިޔަ ހަފްތާގައި ކޮރޯނާ ވައިރަސް ޖެހުނު ކުޅުންތެރިންގެ އަދަދު އިތުރުވެފައިމިވަނީ އާއަހަރާއި ދިމާކޮށް ބައެއް ކުޅުންތެރިން ޕްރިމިއަރ ލީގުން އެކުލަވާލައިފާވާ އުސޫލްތަކާއި ހިލާފުވެފައިވަނިކޮށެވެ.