"މެރިޓައިމް އޭޝިއާ ހެރިޓޭޖް ސަރވޭ"، ރާއްޖޭގެ އާސާރީ ތަންތަނުގެ ބޮޑު ދިރާސާއެއް

ރާއްޖޭގައި ހުރި އާސާރީ ތަންތަނުގެ މަޢުލޫމާތު އެއްކުރުމަށް ކުރިއަށްގެންދިޔަ "މޯލްޑިވްސް ހެރިޓޭޖް ސަރވޭ"ގެ ދެވަނަ ބައެއް ފެށުމަށް ތައްޔާރުވެފައިވާކަމަށް ސަޤާފީ ތަރިކަ ރައްކާތެރިކުރާ ޤައުމީ މަރުކަޒުން ވިދާޅުވެއްޖެއެވެ.

ދިރާސާގެ ދެވަނަ ފިޔަވަހި ކުރިއަށްގެންދިއުމަށް ހަމަޖެހިފައިވަނީ "މެރިޓައިމް އޭޝިއާ ހެރިޓޭޖް ސަރވޭ"ގެ ނަމުގައެވެ. ދެވަނަ ފިޔަވަހީގައިވެސް އިސްކޮށް މަސައްކަތް ކުރައްވާނީ ފުރަތަމަ ފިޔަވަހި ކުރިއަށްގެންދިއުމުގައިވެސް އިސްކޮށް ހުންނެވި ޕްރޮފެސަރ މައިކަލް ފީނަރއެވެ. މި މަސައްކަތް ކުރިއަށްގެންދާނީ ސަޤާފީ ތަރިކަ ރައްކާތެރިކުރާ ޤައުމީ މަރުކަޒާ، މައިކަލް ފީނަރ މިހާރު މަސައްކަތްކުރައްވަމުންދާ ޖަޕާނުގެ ކިޔޯޓޯ ޔުނިވަރސިޓީގެ "ސެންޓަރ ފޯ ސައުތްއީސްޓް އޭޝިއަން ސްޓަޑީޒް"ގެ ޓީމް ބައިވެރިވާނެއެވެ.

މި ދިރާސާގައި ރާއްޖޭގެ ރަށްރަށުގައި ހުރި އާސާރީ ތަންތަނާއި، ތަކެއްޗާއި އެތަކެތީގެ ކުރެހުންތަކާއި، އެކަމާއި ގުޅޭ މަޢުލޫމާތުތައް ދިރާސާކުރާނެއެވެ. ދިރާސާގެ ދެވަނަ ފިޔަވަހީގެ އެއްބަސްވުމުގައި ސަޤާފީ ތަރިކަ ރައްކާތެރިކުރާ ޤައުމީ މަރުކަޒުގެ ފަރާތުން ސޮއިކުރެއްވީ މިނިސްޓަރ އޮފް އަރޓްސް ކަލްޗަރ އެންޑް ހެރިޓޭޖް ޔުމްނާ މައުމޫންއެވެ. އަދި ކިޔޯޓޯ ޔުނިވަރސިޓީގެ ފަރާތުން ސޮއިކުރެއްވީ ޔުނިވަރސިޓީގެ ސެންޓަރ ފޯ ސައުތްއީސްޓް އޭޝިއަން ސްޓަޑީޒްގެ ޑިރެކްޓަރ ޔޯކޯ ހަޔާމީއެވެ.

މިނިސްޓަރ @yumna_maumoon، ޕްރޮފެސަރ މައިކަލް ފީނަރ އާއި ބައްދަލުކުރައްވައި މޯލްޑިވްސް ހެރިޓޭޖް ސަރވޭގެ 2ވަނަ ފިޔަވައްސާއި ގުޅިގެން ވެވިފައިވާ ފަހުމުނާމާއާއި އެއްގޮތަށް ސަރވޭގެ އަމަލީ މަސައްކަތް ފެބްރުއަރީ މަހު ފެށުމަށް ވަމުންްދާ ތައްޔާރީތަކާއި ގުޅޭގޮތުން މަޝްވަރާ ކުރައްވައިފި
1/3 pic.twitter.com/dwtEDZmxTg

— National Center for Cultural Heritage (@HeritageMv) January 5, 2021

ސަރވޭގެ މަސައްކަތް އަންނަ މަހު ފެށުމަށް ނިންމަފައިވީނަމަވެސް، ކޯވިޑް-19އާއި ގުޅިގެން ދަތުރުފަތުރުކުރުމަށް އަޅާފައިވާ ފިޔަވަޅުތަކާއި ގުޅިގެން މަސައްކަތުގެ ތާވަލަށް ބަދަލުއައުން އެކަށީގެންވާކަމަށް ސަޤާފީ ތަރިކަ ރައްކާތެރިކުރާ ޤައުމީ މަރުކަޒުން ވިދާޅުވެއެވެ. ދެވަނަ ފިޔަވަހިވެސް ކުރިއަށްދާނީ އާކޭޑިއާ ޗެރިޓަބަލް ޓްރަސްޓްއިން ފަންޑްގެ އެހީގައެވެ.

މޯލްޑިވްސް ހެރިޓޭޖް ސަރވޭ މަޝްރުޢު ފެށީ 2018ވަނަ އަހަރުގެ އޭޕްރިލްމަހުއެވެ. 2އަހަރުދުވަހަށް ކުރިއަށްގެންދިޔަ މި މަސައްކަތުގައިވަނީ ރާއްޖޭގެ 5އަތޮޅުއްގެ 152 ރަށުގެ، 288 ސައިޓް ދިރާސާކޮށްފައެވެ. މި އަތޮޅުތަކަކީ ހދ، ކ، ލ، ސ އަދި ޏ އަތޮޅެވެ.
މި ސަރވޭގެއާއި ގުޅޭ މަޢުލޫމާތާއި ހޯދުންތައް https://maldivesheritage.oxcis.ac.uk/ ވެބްސައިޓްގައިވަނީ ޝާއިރުކޮށްފައެވެ.

5 އަހަރު ތެރޭގައި މުޅި ރާއްޖޭގައި ހުރި މާއްދީ ސަގާފީ ތަރިކަ ދަފުތަރުކުރުމަކީ މި ސަރވޭގެ އެންމެ ބޮޑު އަމާޒެވެ.