ސީ އެމްބިއުލާންސްއަކާއި ލޯންޗެއް ޖެހި ރޭ ހިނގި އެކްސިޑެންޓްގައި އަނިޔާވި އެކަކަށް އައިޖީއެމް ހޮސްޕިޓަލްގެ އައިސީޔޫގައި ފަރުވާދެމުންދާކަމަށް އެ ހޮސްޕިޓަލުން ބުނެފިއެވެ.
މި އެކްސިޑެންޓް ހިނގާފައިވަނީ ރޭ މ.މުލިން މާލެއައުމަށް ދަތުރުކުރި ސީ އެމްބިއުލާންސްއަކާއި، މާލެއިން ފުރައިގެން ފ.ފީއައްޔަށް ދަތުރުކުރި ލޯންޗެއް ޖެހިގެންނެވެ. މި އެކްސިޑެޓްގައި ސީއެމްބިއުލާންސްގައި ތިބި 8 މީހުނެގެ ތެރެއިން 2 މީހުންނާއި، އަދި ފީއައްޔަށް ދަތުރުކުރި ލޯންޗުގެ ކެޕްޓަނަށްވަނީ އަނިޔާވެފައެވެ.
އެމީހުންގެ ތެރެއިން އައިސީޔޫގައި ފަރުވާދެމުންދަނީ އުމުރުން 43 އަހަރުގެ މީހަކަށެވެ. އައިޖީއެމް ހޮސްޕިޓަލްއިން ވިދާޅުވީ 43 އަހަރުގެ މީހާއަށް އައިސީޔޫގައި ފަރުވާދެމުންދާއިރު، އިތުރު ދެ މީހަކަށް އެމަޖެންސީގައި ފަރުވާދެމުންދާކަމަށެވެ. ނަމަވެސް މި މީހުންނަށް ލިބިފައިވާ އަނިޔާގެ ތަފްސީލެއް ޙާމަކޮށްފައެއް ނުވެއެވެ.
މި ޙާދިސާ ހިނގީ ރޭ 1:25 ހާއިރުއެވެ. އެކްސިޑެންޓް ހިނގީ މާލެ އަތޮޅު އިތާފުށި ރިޒޯޓް ކައިރި ކަނޑުމަތިންނެވެ. މި އެކްސިޑެންޓްގައި ލޯންޏަށްވެސް ބޮޑެތި ގެއްލުންތަކެއް ވަނީ ލިބިފައެވެ. މި މައްސަލަ ފުލުހުން ދަނީ އިތުރަށް ތަޙުޤީގުކުރަމުންނެވެ.