އިންގްލިޝް ޕްރިމިއަރ ލީގުގައި ނިއުކާސްލް ޔުނައިޓެޑާއި ލެސްޓަރ ސިޓީ ބައްދަލުކުރިމެޗް ކާމިޔާބުކޮށް ޕޮއިންޓް ތާވަލްގެ 3 ވަނަ އަށް ލެސްޓަރ ޖެހިލައިފިއެވެ. މިމެޗް ލެސްޓަރ ކާމިޔާބުކުރީ 2 ލަނޑު 1 ލަނޑުންނެވެ.
ނިއުކާސްލްގެ ދަނޑު ސެއިންޓް ޖޭމްސް ޕާރކްގައި ކުޅުނު މިމެޗްގެ ފުރަތަމަ ހާފްގައި ދެޓީމުންކުރެ އެއްވެސް ޓީމަކަށް ލަނޑެއް ޖެހިފައެއް ނުވެއެވެ. މިމެޗްގެ ފުރަތަމަ ލަނޑު މެޗްގެ 55 ވަނަ މިނެޓްގައި ޖަހައިދިނީ ލެސްޓަރގެ ޖޭމްސް މެޑިސަންއެވެ. އަދި އެޓީމްގެ ދެވަނަ ލަނޑު މެޗްގެ 72 ވަނަ މިނެޓްގައި ޖަހާދިނީ ޔޫރީ ޓިއެލަމަންސްއެވެ.
މިމެޗްގައި ނިއުކާސްލްއިން ޖެހި ހަމައެކަނި ލަނޑު މެޗްގެ 82 ވަނަ މިނެޓްގައި ޖަހާދިނީ އެންޑީ ކެރޯލްއެވެ. މިއީ 2019 ގައި ނިއުކާސްލްއާ އަލުން ކެރޯލް ގުޅުނުފަހުން އެޓީމަށް ކާމިޔާބުކޮށްދިން ފުރަތަމަ ލަނޑެވެ. އަދި މިއީ ވޭތުވެދިޔަ ހަތަރު މެޗްގައި ނިއުކާސްލްއަށް ކާމިޔާބު ކުރެވުނު ފުރަތަމަ ލަނޑެވެ.
މިކާމިޔާބީއާއެކު ލެސްޓަރއަށް ޕޮއިންޓް ތާވަލްގެ ތިންވަނައަށް ކުރިއަށް ޖެހިލީ ކުޅުނު 17 މެޗުން ލިބިފައިވާ 32 ޕޮއިންޓާއެކުގައެވެ. އަދި ނިއުކާސްލްވަނީ ކުޅުނު 16 މެޗުން ލިބިފައިވާ 19 ޕޮއިންޓާއެކު ތާވަލްގެ 15 ވަނައިގައެވެ.