އިސްރާއީލާއި ޢަރަބި ޤައުމުތަކާއިމެދު ގުޅުންބަދަހިކުރުމުގެ އެއްބަސްވުންތައް އެކުލަވާލުމުގައި ޙަރަކާތްތެރިވި އިސް މުޝީރުންނަށް އެމެރިކާގެ ރައީސް ޑޮނަލްޑް ޓްރަންޕު ޚާއްޞަ އެވޯޑެއް ދެއްވައިފިއެވެ.
ނޭޝަނަލް ސެކިއުރިޓީ މެޑަލް ނުވަތަ ޤައުމީ ސަލާމަތާއިބެހޭ މެޑަލް އަރުވާފައިވަނީ އެމެރިކާގެ ޚާރިޖީ ވަޒީރު މައިކް ޕޮންޕެއޯއަށާއި ޓްރެޝަރީ ސެކެޓްރީ ސްޓީވެން ނޫޝިންއަނާޢި ޤައުމީ ސަލާމަތާއިބެހޭ މުޝީރު ރޮބާޓް އޯ ބްރިއެންގެ އިތުރުން އިސް މުޝީރު ޖެރެޑް ކުޝްނާއަށެވެ. އަދި މީގެ އިތުރުން، މެދުއިރުމައްޗަށް ކަނޑައަޅާފައި ހުންނަވާ ސަފީރު އާވީ ބާކޮވިޓްޒް، އިސްރާއީލަށް އެމެރިކާއިން ކަނޑައަޅާފައި ހުންނަވާ ސަފީރު ޑޭވިޑް ފްރީޑްމަން އަދި ޔޫއޭއީއަށް ކަނޑައަޅާފައި ހުންނަވާ ސަފީރު ޖޯން ރަކޮލްޓާއަށްވެސް ވަނީ މި އެވޯޑް އަރުވާފައެވެ.
ރިޔާސީ އިދާރާ، ވައިޓު ހައުސުން ނެރުނު ބަޔާނެއްގައި ބުނީ އެވޯޑު އަރުވާފައިވާ ބޭފުޅުންގެ މަސައްކަތުން މާޒީގެ މައްސަލަތަކުން އަރައިގަނެ މުޅި ސަރަޙައްދަށް ބޮޑު ބަދަލެއް އައިސްފައިވާކަމަށެވެ.
ފާއިތުވި ހަތަރު މަސް ދުވަހުގެ ތެރޭގައި އެމެރިކާގެ އެހީތެރިކަމާއެކު ހަތަރު ޢަރަބި ޤައުމަކުންވަނީ އިސްރާއީލާއެކު ގުޅުން ބަދަހިކުރުމަށް އެއްބަސްވެފައެވެ. އެގޮތުން ޔޫއޭއީއާއި ބަހުރައިނާއި ސޫދާނާއި މޮރޮކޯއިންވަނީ އިސްރާއީލާއެކު އެފަދަ އެއްބަސްވުންތައް ޤާއިމްކޮށްފައެވެ. ޖަނަވަރީ މަހުގެ 20ވަނަ ދުވަހުގެ އެމެރިކާގެ ވެރިކަން ދޫކުރައްވާ ރައީސް ޓްރަންޕު ވަޑައިގަތުމުގެ ކުރިން އިތުރު އެއް ޢަރަބި ޤައުމާއެކު އެފަދަ އެއްބަސްވުމަކާއި ހަމައަށް އައުމަށް އެމެރިކާއިން އުންމީދުކުރެއެވެ.
ޢަރަބި ޤައުމުތަކުން އިސްރާއީލާއެކު ގުޅުންބަދަހި ކުރާތީ ފަލަސްޠީނުންވަނީ އެކަމާމެދު ވަރަށް ބޮޑަށް ނުރުހުން ފައުޅުކޮށްފައެވެ. އެ އެއްބަސްވުންތަކާއިމެދު ފަލަސްޠީނުން ބުނަމުންދަނީ އިސްރާއީލުން އިސްތިޢުމާރުކޮށްފައިވާ އެ ޤައުމުގައި މިނިވަން ދަޢުލަތެއް ޤާއިމްކުރުމަށް ކުރަމުންދާ މަސައްކަތަށް އިސްރާއީލާއެކު ގުޅުންބަދަހިކުރާ ޢަރަބި ޤައުމުތަކުގެ ސަބަބުން ހުރަސްއެޅޭކަމަށާއި އެ ޤައުމުތަކުން ފަލަސްޠީނަށް ބޭވަފާތެރިވެފައިވާކަމަށެވެ.