ފަސް ޚިދުމަތަކަށް ހިޔާ ކޮމާޝަލްއިން ޖާގަ ދޫކުރުމަށް ހައުސިންގ ޑިވެލޮޕްމަންޓް ކޯޕަރޭޝަން އެޗްޑީސީން ހުޅުވާލައިފިއެވެ. ހުޅުމާލޭ ދެވަނަ ފިޔަވަހީގައި އަޅާފައިވާ ހައުސިންގ ޔުނިޓްތަކުގެ ގްރައުންޑް ފްލޯތައް ޚާއްސަކޮށްފައިވަނީ ޢާއްމު ޚިދުމަތްތައް ދިނުމަށެވެ.
ހިޔާ ކޮމާޝަލްއިން ޖާގަ ދޫކުރުމަށް އެޗްޑީސީން ހުޅުވާލާފައިވަނީ ޒަރޫރީ ބޭނުންތަކަށާއި އާންމު ޚިދުމަތްތައް ލިބޭނެ ތަންތަން ޤާއިމް ކުރުމަށެވެ. އެގޮތުން ކްލިނިކް ހެދުމަށް 2196 އަކަފޫޓުގެ ޖާގަ ދޫކުރުމަށް ވަނީ ކަނޑައަޅާފައެވެ. މީގެ އިތުރުން ބޭސްފިހާރަ ހިންގުމަށްވެސް 542 އަކަފޫޓުގެ ސްލޮޓެއްވަނީ ކަނޑައަޅާފައެވެ. ހުޅުމާލޭ ދެވަނަ ފިޔަވަހީގައި ކްލިނިކާއި ބޭސްފިހާރަ ހިންގަން ބޭނުންވާ ފަރާތްތަކުން އަންނަ މަހުގެ 21 ވަނަ ދުވަހުގެ ކުރިން ބީލަން ހުށައެޅުމަށް އެޗްޑީސީންވަނީ ފުރުޞަތު ހުޅުވާލާފައެވެ.
މީގެ އިތުރުން އެޗްޑީސީން ވަނީ ހިޔާ ފްލެޓް 6 އާއި 14 އިން 3000 އަކަފޫޓަށްވުރެ ބޮޑު ދެ ޖާގަ، ސުޕަރމަރކެޓް ހިންގުމަށް ކަނޑައަޅާފައެވެ. ކާބޯތަކެތި ވިއްކާ ކުދި ފިހާރަތަކަށް ޖާގަ ދޫކުރުމަށް ނިންމާފައިވަނީ ހިޔާ ފްލެޓް 12 އާއި 16 އިންނެވެ. އެއީ 1000 އަކަފޫޓުގެ ޖާގައެވެ. ކާބޯތަކެތި ވިއްކާ ފިހާރަ ހިންގަންބޭނުންވާ މީހުންނަށް ބީލަން ހުށައެޅޭނެ ފަހު ތާރީޚަކީ 20 ޖެނުއަރީ ކަމަށާއި ސުޕަމަރކެޓް ހިންގަން ބޭނުންވާ ފަރާތްތަކުން 20 ޖެނުއަރީގެ ކުރިން ބީލަން ހުށައަޅަންޖެހޭ ކަމަށް އެޗްޑީސީން މަޢުލޫމާތުދެއެވެ.
އެޗްޑީސީންވަނީ ހިޔާ ފްލެޓުގައި ކެފެޓީރިއާ ހެދުމަށްވެސް 2 ޖާގަ ޚާއްސަކޮށްފައެވެ. އެއީ ހިޔާ ފްލެޓް 12 އިން 926 އަކަފޫޓާއި ހިޔާ ފްލެޓް 15 އިން 1085 އަކަފޫޓުގެ ޖާގައެވެ. މިކަމަށް އެދި އަންނަ މަހުގެ 20ގެ ކުރިން ބީލަން ހުށައަޅަންޖެހެއެވެ.
ހިޔާ ފްލެޓްތަކަށް ދިރިއުޅުން ބަދަލުކުރުމުގެ ކުރިން، އެތަނުގައި އާއްމު ޚިދުމަތްތައް ޤާއިމުކުރުމުގެ މަސައްކަތް އެޗްޑީސީންވަނީ ފަށާފައެވެ. އެގޮތުން މިސްކިތާއި ސްކޫލް އެޅުމުގެ މަސައްކަތްދަނީ ކުރަމުންނެވެ. އަދި ދެވަނަ ފިޔަވައްސަށް އާއްމު ދަތުރުފަތުރުގެ ޚިދުމަތް ފޯރުކޮށްދޭނެ ބަޔަކު ހޯދުމަށްވެސްވަނީ އިޢުލާންކޮށްފައެވެ.